އިދިކޮޅު މައި ޕާޓީ އެމްޑީޕީ ކުރިން އެނބުރުނީ، އަދި މިހާރުވެސް އެނބުރެންވީ ބަރުލަމާނީ ގެނައުމުގެ އަމާޒަށް ކަމަށް ކުރީގެ ރައީސް، އަދި އެމްޑީޕީގެ ކުރީގެ ރައީސް މުހައްމަދު ނަޝީދު ވިދާޅު ވެއްޖެ އެވެ.
އެމްޑީޕީގެ 19 ވަނަ އަހަރީ ދުވަހާ ގުޅިގެން އެކަމުގެ ތަހުނިޔާ ފޮނުވައި ނަޝީދު އެކްސްގަައި ކުރެއްވި ޕޯސްޓެއްގައި ވިދާޅުވީ އެމްޑީޕީގެ އެންމެ އަސާސީ އެއް އުސޫލަކީ ރައްޔިތުންނަށް ފައިދާހުރި ވެެރިކަމެއް ހިންގޭނީ ޕާލިމަންޓަރީ ސިސްޓަމް، ނުވަތަ ބަރުލަމާނީ ނިޒާމަކުން ކަމަށް ދެކޭ ދެކުން ކަމަަށެވެ.
އަދި އެ ޕާޓީގެ އޮނިގަނޑު ރޭވިފައި ވަނީ ވެސް އެ ހަމައަށް ކަމަށް އެމަނިކުފާ ުވިދާޅުވިއެވެ.
"[އެމްޑީޕީ] އަދި ވެސް އެނބުރެންވީ އެ [ބަރުލަމާނީ ގެނައުމުގެ] މިސްރާބަށް،"
ކުރީގެ ރައީސް ނަޝީދު
ނަޝީދަކީ ފެށުނީއްސުރެވެސް ބަރުލަމާނީ ނިޒާމް ރާއްޖެއަށް ގެނައުމަށް ވަކާލާތު ކުރެއްވި ބޭފުޅެކެވެ. ދިވެހި ރާއްޖޭގައި އޮންނާނެ ނިޒާމަކާއި ގުޅޭގޮތުން ރައްޔިތުންނަށް ފެންނަ ނުފެންނަ ވޯޓް ނެގިއިރު، އެމްޑީޕީ އިންވެސް ވާކާލާތު ކޮށއފައިވަނީ ބަރުލަމާނީ ނިޒާމަށެވެ.
އެހެންނަމަވެސް، ރައްޔިތުން ނިންމީ ރާއްޖޭގައި އޮންނަން ފެންނަނީ ރިޔާސީ ނިޒާމެއް ކަމަށެވެ.
އޭގެ ފަހުން އަދާއި ޖެހެންދެންވެސް ނަޝީދު ގޮވާލައްވަމުން އަންނަނީ ބަރުލަމާނީ ނިޒާމަށް ވެރިކަން ކުރުމުގެ ނިޒާމް ބަދަލު ކުރެއްވުމަށެވެ. އެމްޑީޕީ ބައިބައިވެ، ނަޝީދާއި އެމަނިކުފާނަށް ތާއިދު ކުރައްވާ މެންބަރުން އެ ޕާޓީން ވަކިވުމުގެ ފަހަތުގައުވެސް އޮތް އެއް ސަބަބަކީ، ރާއްޖެއަށް ބަރުލަމާނީ ނިޒާމް ގެންނަން ފެންނަ ނުފެންނަ ވޯޓެއް ނެގުމަށް ކުރީގެ ރައީސް އިބްރާހިމް މުހައްމަދު ޞާލިހާއި، އެމަނިކުފާނަށް ތާއިދު ކުރައްވާ އެމްޑީޕީ މެންބަރުން އެއްބަސް ނުވުމެވެ.
Advertisement
This content is created and paid for by advertisers and does not involve Voice Journalists
