ކުދި އަދި މެދުފަންތީގެ ވިޔަފާރިތަކުގެ ހިމާޔަތަށްޓަކައިވެސް ފެނަކައިގެ ޚިޔާނާތުގެ މައްސަލަތައް ބަލަންޖެހޭ ކަމަށް ހެންވޭރު ދެކުނު ދާއިރާގެ މެންބަރު ހުސައިން އިމްރާން ލަތީފް (އިއްމު) ވިދާޅުވެއްޖެއެވެ.
ނިމިދިޔަ އިބްރާޙިމް މުހައްމަދު ޞާލިޙްގެ ސަރުކާރުގައި، ފެނަކައިން ހިންގާފައިވާ ކޮރަޕްޝަންގެ މައްސަލަތައް ބެލުމަށް ގޮވާލައި މަޖިލީހަށް މިއަދު ހުށަހެޅުނު ކުއްލި މައްސަލައަށް ބަހުސް ކުރައްވަމުން ޢިމްރާން ވިދާޅުވީ، ސަރުކާރުގެ ކުންފުނިތަކަށް ރާއްޖެއިން ބޭރާއި ރާއްޖޭގެ ވިޔަފާރިތަކުން ކުރަމުން އައި އިތުބާރު ގެއްލިފައިވާ ކަމަށެވެ.
މިއާއެކު އިމްރާން ވަނީ ފެނަކައިގެ ކުރީގެ އެމްޑީ، އަޙްމަދު ސަޢީދު މުޙައްމަދު، މަގާމާއި ހަވާލުވެވަޑައިގެންނެވުމަށްފަހު ކޮރަޕްޝަން ނައްތާލާނެ ކަމަށް ވިދާޅުވި ނަމަވެސް ކޮރަޕްޝަންގެ އެތަކެއް ޢަމަލުތަކެއް ހިންގާފައިވާ ކަމަށް ވިދާޅުވެފައެވެ:
“ފެނަކައިގެ އެމްޑީ 2019 ވަނަ އަހަރު ވިދާޅުވި، ލޫޕްހޯލްތައް ތިމަންނަމެން ހޯދާނަމޭ، ކޮރަޕްޝަނަށް މަގުފަހިވާ ގޮތަށް ހުރިހުރިހާ ކަންތައް ތަކެއް ބަންދުކުރަން. އަޅުގަނޑު ދަންނަވާނީ، ލޫޕްހޯލްތައް ހޯދައިގެން، ކޮރަޕްޝަނަށް މަގުފަހިވާ ހުރިހާ ކަމެއް ހޯދާފައި، އެ ލޫޕްހޯލްތަކުގެ ބޭނުން އެންމެ ފުރިހަމައަށް ކޮށްގެން އޭނާ މިއަދު އެހުރީ ބޮޑު ވިޔަފާރިވެރި މަހުޖަނަކަށް ވެފައި… ފެނަކަ މިދިޔަ ފަސް އަހަރު ހިންގާފައި ވަނީ ދިވެހި ކުދި އަދި މެދު ފަންތީގެ ވިޔަފާރިވެރިން ގައިން ލޭ ބޮއިގެން.
މެންބަރު ހުސައިން އިމްރާން ލަތީފް (އިއްމު)
އިމްރާން ވިދާޅުވި ގޮތުގައި ކޮރަޕްޝަންގެ އަމަލުތައް ހިންގުމަށް، ފެނަކައިގެ 8 ވަރަކަށް މުވައްޒަފުން ވަނީ ސައީދަށް އެހީތެރިވެފައެވެ.
8 ބޭފުޅުން ނިވާ ފަތްގަނޑަކަށް ހަދައިގެން ހިންގާފައި މިވާ ކޮރަޕްޝަނުގެ މައްސަލަ އެބަޖެހޭ ބަލަން. އެހެން ނޫން ނަމަ 20 ވަނަ މަޖިލީހުން އެންމެ ފުރިހަމަ ގޮތުގައި މަސައްކަތް ކުރެވޭ ތަނެއް ނުފެންނާނެ. ސަރުކާރުން އެބަ ޖެހޭ ކުދި އަދި މެދުފަންތީގެ ވިޔަފާރުވެރިންގެ ހިމާޔަތުގައިވެސް މިކަން(ފެނަކައިގެ ކޮރަޕްޝަން މައްސަލަ) ބަލަން.
މެންބަރު ހުސައިން އިމްރާން ލަތީފް (އިއްމު)
އިމްރާން ވިދާޅުވުގޮތުގައި، ފެނަކަ ސައީދު، ކޮރަޕްޝަންގެ އަމަލުތައް ހިންގާފައިވަނީ ކުރީ ސަރުކާރުގެ މަތިފަޑީގައި ތިއްބެވި ބޭފުޅުންގެ ހިމާޔަތާއި އެއްބާރުލުމާވެސް އެކީގައެވެ.
Advertisement
This content is created and paid for by advertisers and does not involve Voice Journalists
