ޙައްދު ޖެހުމަށް ހުކުމް ކުރާ މީހުންގެ ޙައްދު ޖެހުމުގެ އެންމެހާ މަސައްކަތްތަކެއް ކޮށްދޭނެ ދޭވާނީއަކު ހޯދަން ކްރިމިނަލް ކޯޓުން އިއުލާންކޮށްފިއެވެ.

ކްރިމިނަލް ކޯޓުން ކުރި މި އިއުލާނުގައި ބުނީ، ދޭވާނީގެ ޒިންމާއަކީ ޙައްދު ޖެހުމަށް ސެކްޝަނުން ޙަވާލުކުރާ މީހުންގެ ޙައްދު ޖެހުމުގެ އެންމެހާ މަސައްކަތްކުރުމާއިއެކު، ކޯޓަށް ޙާޟިރުވުމުގެ އަމުރު ބަހައި، މެޖިސްޓްރޭޓް ކޯޓުތަކުގެ ހެކިބަސް ނެގުމުގެ މަސައްކަތުގައި ސެކްޝަނަށް އެހީތެރިވެދިނުން ކަމަށެވެ.

މަގާމުގެ ޝަރުތުތަކުގެ ތެރޭގައި ލިޔަންކިޔަން ދަންނަ މީހަކަށްވުން ހިމެނޭއިރު، ކްރިމިނަލް ކޯޓުން ބުނީ، މި ވަޒީފާއަށް ކުރިމަތިލާ މީހާއަށް 18 އަހަރު ފުރިފައިވުމާއިއެކު، ވަޒީފާއަށް އައްޔަންކުރެވޭ ކޯޓުގެ މުވައްޒަފެއްގެ ގާތްތިމާގެ މީހަކު ކަމުގައި ވެގެންނުވާނެ ކަމަށާއި، ކޯޓުގައި ޓާމް ޑިއުޓީ ކުރެވޭ، އޮފީހުގެ މަސައްކަތުގައި ގިނަވަގުތު ހޭދަކުރެވޭނެ ފަރާތެއް ކަމުގައިވާންވާނެ ކަމަށެވެ.

ދޭވާނީގެ މުސާރައިގެ ގޮތުގައި 3,100 ރުފިޔާ ލިބޭއިރު، އޭގެ އިތުރުން، ޖުޑީޝަލް އެލެވަންސް އާއި، ސަރވިސް އެލަވަންސް އަދި ލިވިން އެލަވަންސާއި އެކު ޖުމްލަ 8040 ރުފިޔާ ލިބޭނެއެވެ. މީގެ އިތުރުންވެސް ކަނޑައެޅިފައިވާ އުޞޫލުން އިތުރު ގަޑީގެ ފައިސާ އާއި ދިވެހިރާއްޖޭގެ ޕެންޝަނާ ބެހޭ ޤާނޫނުގެ ދަށުން ލިބިދެވޭ ޕެންޝަން ފައިސާވެސް ހިމެނޭ ކަމަށް ކްރިމިނަލް ކޯޓުގެ އިއުލާނުގައި ވެއެވެ.

ކްރިމިނަލް ކޯޓުން ބުނީ ކްރިމިނަލް ކޯޓުގެ ވެބްސައިޓުން، ކޯޓުގެ ކައުންޓަރުން އަދި http://criminalcourt.gov.mv/?page_id=75 މެދުވެރިކޮށް ފޯމް ލިބެން ހުންނާނެ ކަމަށާއި، ފޯމާއި، މަޤާމަށް އެދި ހުށަހަޅަންޖެހޭ ތަކެތި ހުށަހަޅާނީ 03 ޖުލައި 2024 ގެ 11:00 ގެ ކުރިން ކްރިމިނަލް ކޯޓަށް ކަމަށާއި، ވަޒީފާއަށް އެދޭ ފޯމާއި ލިޔުންތައް އީ-މެއިލް [email protected] މެދުވެރިކޮށް ވެސް ބަލައިގަނެވޭނެ ކަމަށެވެ.