ޔޫރޯ 2024 ގެ ގުރޫޕް އީގައި ބެލްޖިއަމް އާއި ޔުކްރެއިން ވާދަކުރި މެޗުގައި ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން އެއްވަރުވެ، ޔުކްރެއިން މުބާރާތުން ކަޓައިފިއެވެ.

މުބާރާތުގައި ބެލްޖިއަމު ކުޅުނު ފުރަތަމަ މެޗުގައި 1-0 ގެ ނަތީޖައަކުން ސްލޮވާކިއާ އަތުން އެޓީމު ބަލިވި ނަމަވެސް ދެވަނަ މެޗުގައި އެޓީމުން ވަނީ 2-0 ގެ ނަތީޖާއަކުން ރޫމޭނިއާ ބަލިކޮށްފައެވެ. އަދި ޔުކުރެއިންގެ ފުރަތަމަ މެޗުގައި ރޫމޭނިއާ އަތުން 3-0 ގެ ނަތީޖާއަކުން އެޓީމު ބަލިވި ނަމަވެސް ދެވަނަ މެޗުގައި އެޓީމުން ވަނީ 2-1 ގެ ނަތީޖާއަކުން ސްލޮވާކިއާ ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

Advertisement

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައިވެސް ދެޓީމުން ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ދެވަނަ ހާފުގެ 73 ވަނަ މިނެޓުގައި ބެލްޖިއަމްއަށް ވަނީ މެޗުގެ ލީޑު ހޯދުމަށް ވަރަށް ހުސް ފުރުސަތެއް ލިބިފައެވެ. ނަމަވެސް އެޓީމުގެ ފޯވާޑް ލުކާކޫ ތަނަވަސްކޮށްދިނަ ފުރުސަތެއްގައި ޔުކްރެއިންގެ ޕެނަލްޓީ އޭރިއާ ތެރެއިން އެޓީމުގެ ޔަނެކް ކަރަސްކޯ ފޮނުވާލި ބާރު ހަމަލާ، ޔޫކްރެއިންގެ ކީޕަރު ޓްރުބިން ވަނީ ހުޝިޔާރުކަމާއެކު ދިފާއުކޮށްފައެވެ.

އޭގެ އިތުރުން މިހާފުގައި ޔޫކްރެއިނަށް ވެސް ވަނީ ކައިރިކައިރީގައި ރަނގަޅު ދެ ފުރުސަތެއް ބޭނުންކުރެވޭގޮތް ނުވެފައެވެ.އެގޮތުން ބެލްޖިއަމްގެ ޕެނަލްޓީ އޭރިއާ ތެރެއިން އެޓީމު ފޯވާޑް އާޓެމް ޑޮބްވީކް ފޮނުވާލި ބާރު ހަމަލާ ބެލްޖިއަމް ގޯލާއި އަމާޒުނުވެ ދަނޑިކައިރިން ބޭރަށް ދިޔަ އިރު، ރުސްލާން މަލިނޮވްސްކީ ނަގައިދިން ކޯނަރު ގޯލަށް ވަންނަން ދަނިކޮށް، ބެލްޖިއަމް ކީޕަރު ކަސްޓީލްސް އެ ބޯޅަ ދިފާއުކުރީ ގޯލު ރޮނގުމަތިންނެވެ.

މީގެ އިތުރުންވެސް މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު ކުޅުނު ތިން މެޗުން މިދެޓީމަށް ވެސް ހަތަރު ޕޮއިންޓް ލިބިފައިވާއިރު، ލަނޑުގެ ތަފާތުން ގުރޫޕްގެ ދެވަނަ ޓީމުގެ ގޮތުގައި ބެލްޖިއަމް މުބާރާތުގެ ދެވަނަ ބުރުން ވަނީ ޖާގަ ހޯދާފައެވެ. އަދި ޔުކްރެއިން މުބާރާތް ނިންމާލީ މިގުރޫޕުގައި އޮތް އަނެއް ތިން ޓީމާއި އެއްވަރަށް ޕޮއިންޓް ލިބުނު ނަމަވެސް ލަނޑުގެ ތަފާތުން ގުރޫޕްގެ ފުލުގައި އޮވެގެންނެވެ.