ނިމިދިޔަ ރައީސް އިބްރާހިމް މުޙައްމަދު ޞާލިހުގެ ސަރުކާރުން ވޭރިއޭޝަންގެ ނަމުގައި، ނަހަމަ ގޮތުގައި ގިނަ ކުންފުނިތަކަކަށް ފައިސާ ދީފައިވާކަން ހާމަވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީން މާލީ ވުޒާރާއި އެކު ބޭއްވި ބައްދަލުވުމުގައި އެ ވުޒާރާއިން ވަނީ ވޭރިއޭޝަންގެ ނަމުގައި އެކި ކުންފުނިތަކަށް ފައިސާ ދިނުން، މިދިޔަ ސަރުކާރުގައި އާމްދަނީ ހޯދާ ނިޒާމަކަށް ބަދަލުވެފައިވާކަމަށް ބުނެފައެވެ.
މިގޮތުން އެވުޒާރާގެ ޑެޕިއުޓީ މިނިސްޓަރ އަހްމަދު ސާއިދު މުސްތަފާ ވިދާޅުވީ މަޝްރޫއުތަކުގެ ބިޑަށް ހުޅުވާލުމާއިއެކު، އެންމެ ކުޑަ އަގެއް ހުށަހަޅައި، ބިޑު ކާމިޔާބު ކުރުމަށްފަހު ވޭރިއޭޝަންގެ ނަމުގައި އިތުރަށް ގިނަ އަދަދެއްގެ ފައިސާ ކުންފުނިތަކުން ނަގާފައިވާ ކަމަށެވެ.
ސާއިދު ވިދާޅުވީ، ޓެންޑަރިން ޕްރޮސެސިންގައި އަގު ކުޑަކުރަން ބޭނުންވުމުުން، ކުޑަ އަގެއް ހުށަހަޅައި، ޓެންޑަރ ކާމިޔާބު ކުރެވޭނެކަން ކުންފުނިތަކަށް އެނގޭ ކަމަށެވެ. މިގޮތުން ބައެއްފަހަރު ދޮރު ފަދަ ތަކެތި ޖެހުން ފަދަ މަސައްކަތްތަކަށް 20 މިލިއަން ނުވަތަ 25 މިލިއަން ރުފިޔާ އިތުރު ކުރަން ކުންފުނިތަކުން އެދޭކަން ފާހަގަކުރައްވަމުން ސާއިދު ވިދާޅުވީ، މިފަދަ އެތައް ކަމެއް މިދިޔަ ސަރުކާރުގެ ތެރޭގައި ހިނގާފައި އެބަހުރި ކަމަށެވެ.
"ވޭރިއޭޝަން މިގޮތަށް އަންނަން ދިމާވާ މައްސަލައަކީ ޕްރޮޖެކްޓް މިއޮތީ އެވޯޑް ކުރެވިފައި. ބައެއް ފަހަރު އެބައާދޭ ދޮރުތައް ޖަހަން 20 މިލިއަން, 25 މިލިއަން އިތުރު ކުރަން. މިކަހަލަ އެތައް ކަމެއް އެބަހުރި. ދައުލަތުން ބޭސް ސަޕްލައި ކުރުމުގައި ވެސް ނުވަތަ ރީއެޖެންސް ސަޕްލައި ކުރުމުގައި ވެސް. ވޭރިއޭޝަން އަކީ އާމްދަނީ ހޯދުމުގެ މަގަކަށް ވެފައި މިއޮންނަނީ."
ސާއިދު ވިދާޅުވިއެވެ.
މާލީ ނިޒާމުތެރެއިން ނާޖާއިޒް ފާއިދާ ނެގޭ ގޮތަށް އޮތް މި ކަންތައް މާލިއްޔަތު ޤާވާއިދަށް އިސްލާހު ގެނެސްގެން މިކަން ހައްލުކުރުމަށް މަސައްކަތްކުރައްމުންދާ ކަމަށް ސާއިދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
