ޔަހޫދީ ފައުޖުން ޣައްޒާގައި ކުރިއަށްގެންދާ ގަތުލުއާއްމާއި ގުޅިގެން، ޔަހޫދީންގެ ޣައިރު ގާނޫނީ ދައުލަތްކަމަށްވާ އިސްރާއީލުގެ ހައްދުފަހަނައަޅާފައިވާ ބޮޑުވަޒީރު ބެންޖަމިން ނަތަންޔާހޫ ހިމެނޭހެން އެ ސަރުކާރުގެ 7 މީހަކާއި ދެކޮޅަށް ދެކުނު ކޮރެއާގައި ދައުވާ ކޮށްފިއެވެ.

ދެކުނު ކޮރެއާގެ އެންޖީއޯއެއް ކަމަށްވާ ޕީޕަލްސް ސޮލިޑަރިޓީ ފޯ ޕާޓިސިޕޭޓަރީ ޑިމޮކްރަސީ (ޕީއެސްޕީޑީ) އިން އިސްވެ ހުށަހެޅި މި ދައުވާގައި އޭޝިއަން ޑިގްނިޓީ އިނިޝިއޭޓިވްސް އާއި ދެކުނު ކޮރެއާގެ ގާނޫނު ހަދާ މަޖިލީހުގެ މެމްބަރުން ހިމެނޭ ގޮތަށް 5،000 އަށް ވުރެ ގިނަ މީހުން ވަނީ ބައިވެރިވެފައެވެ.

ޕީއެސްޕީޑީ އިން ބުނީ އެމީހުން މި މައްސަލައިގައި ދައުވާ ކުރި އިސްރާއީލުގެ ވެރިންނަކީ އިންސާނިއްޔަތާ ދެކޮޅަށް ހިންގާ ޖަރީމާތަކާއި ނަސްލު ނައްތާލުމާއި ހަނގުރާމައިގެ ޖަރީމާތައް ރާވައި ހިންގުމުގައި ބައިވެރިވި ބައެއް ކަމަށެވެ.

Advertisement

މިގޮތުން، ދެކުނު ކޮރެއާގައި މި ދައުވާ އުފުލާފައިވާ ޔަހޫދީ ވެރިންނަކީ:
1) ބޮޑުވަޒީރު ބެންޖަމިން ނަތަންޔާހޫ

2) ރައީސް އައިސާކް ހެރްޒޮގް

3) އައިޑީއެފްގެ ޗީފް އޮފް ސްޓާފް ހެރްޒީ ހަލެވީ

4) ޑިފެންސް މިނިސްޓަރު ޔޯއަވް ގަލަންޓް

5) ފޮރިން މިނިސްޓަރު އިސްރާއީލް ކަޓްޒް

6) ފިނޭންސް މިނިސްޓަރު ބެޒާލެލް ސްމޮޓްރިޗް

7) ނޭޝަނަލް ސެކިއުރިޓީ މިނިސްޓަރު އިޓަމާ ބެން ގްވިރް

މި އަނިޔާވެރިންގެ މައްޗަށް ޕީއެސްޕީޑީ އިން އުފުލި ދައުވާގައި އެމީހުން ހިންގި ޖަރީމާތައް ތަފްސީލުކޮށްފައިވާއިރު، އޭގެ ތެރޭގައި ޣައްޒާއަށް އިންސާނީ އެހީ ވެއްދުން ހުއްޓުވުމާއި، ސިއްހީ ނިޒާމަށް އަމާޒުކޮށް ހަމަލާދިނުމާއި، ކެމިކަލް ހަތިޔާރު ބޭނުންކުރުމާއި، ހަނގުރާމައިގެ އުކުޅެއްގެ ގޮތުގައި ޣައްޒާގެ ރައްޔިތުން ބަނޑުހައިހޫނުކަމުގައި ބޭތިއްބުން ހިމެނެއެވެ.

މި މައްސަލަ މިހާރު ދެކުނު ކޮރެއާ ގެ ފުލުހުންގެ އިދާރާއަށް ހުށަހަޅާފައިވާއިރު، އަނިޔާވެރިކަން ހައްދުފަހަނަ އަޅާފައިވާ ޔަހޫދީ ވެރިންގެ މައްޗަށް ދައުވާކުރަން އެގައުމުގެ ޕްރޮސެކިއުޓަރ ޖެނެރަލް އަށް ފޮނުވުން އޮތީ މިހާރު އެގައުމުގެ ފުލުހުންގެ އަތްމަތީގައެވެ.