ކޮޕާ އެމެރިކާ ފުޓްބޯޅަ މުބާރާތުގެ ގުރޫޕް ސީގައި މިއަދު ހެނދުނު ބްރެޒިލް އާއި ޕެރަގުއޭ ވާދަކުރި މެޗު 4-1 ގެ ނަތީޖާއަކުން ކާމިޔާބުކޮށް ބްރެޒިލް އިން ކުއާޓާ ފައިނަލްގެ ފުރުސަތު ބޮޑުކޮށްފިއެވެ.

މުބާރާތުގައި ޕެރަގުއޭ ކުޅުނު ފުރަތަމަ މެޗުގައި ކޮލަމްބިއާ އަތުން 2-1 ގެ ނަތީޖާއަކުން އެޓީމު ބަލިވެފައިވާއިރު، ކޮސްޓަރީކާ އާއި ދެކޮޅަށް ބްރެޒިލް އިން ކުޅުނު ފުރަތަމަ މެޗު ނިމުނީ ދެޓީމުންކުރެ ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުންނެވެ.

މެޗުގެ ފުރަތަމަ ހާފުގެ ފުރަތަމަ 30 މިނެޓު ތެރޭގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މެޗުގެ އޮއެވަރު ބަދަލުވީ ފުރަތަމަ ހާފުގެ 31 ވަނަ މިނެޓުގައި ޕެރަގުއޭގެ ޕެނަލްޓީ އޭރިއާ ތެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމާއި ގުޅިގެން މެޗުގެ ރެފްރީ ބްރެޒިލްއަށް ޕެނަލްޓީއެއް ދިން ހިސާބުންނެވެ.

ނަމަވެސް ބްރެޒިގެ މިޑްފީލްޑަރު ލޫކަސް ޕަކުއެޓާ ފޮނުވާލި ޕެނަލަޓީ ދިޔައީ ގޯލާއި އަމާޒުނުވެ ދަނޑިކައިން ބޭރަށެވެ. އަދި އޭގެ ހަތަރު މިނެޓު ފަހުން ޕަކުއެޓާ ތަނަވަސްކޮށްދިން ފުރުސަތެއްފައި ވިނީޝިއަސް ޖޫނިއަރ ވަނީ ލަނޑެއް ކާމިޔާބުކޮށް އެޓީމަށް ލީޑު ހޯދައިދީފައެވެ.

ބްރެޒިލް އިން ލީޑު ފުޅާކުރި ލަނޑު ފުރަތަމަ ހާފުގެ 43 ވަނަ މިނެޓިގައި ޒުވާން ފޯވާޑް ސަވިއޯ ކާމިޔާބުކުރިއިރު، އިތުރު ވަގުތުގެ ތެރޭގައި ވިނީޝިއަސް ވަނީ އިތުރު ލަނޑެއް ކާމިޔާބުކޮށްފައެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ،3-0 ގެ ލީޑަކާއެކު ބްރެޒިލަ ކުރީގައި އޮވެގެންނެވެ.

މެޗުގެ ދެވަނަ ހާފު ވަރުގަދަކޮށް ފެށީ ޕެރަގުއޭ އިންނެވެ. ނަތީޖާއެއްގެ ގޮތުން ދެވަނަ ހާފު ފެށިގެން ތިންވަނަމިނެޓުގައި އެޓީމުން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ޑިފެންޑަރު އުމަރު އަލްޑެރޭޓް އެވެ. މިއީ ބްރެޒިލްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިމެޗުގައި ބްރެޒިލް އިން ކާމިޔާބުކުރި ހަތަރުވަނަ ލަނޑު ދެވަނަ ހާފުގެ 65 ވަނަ މިނެޓުގައި ކާމިޔާބުކޮށްދިނީ ލޫކަސް ޕަކުއެޓާ އެވެ. އަދި މީގެ އިތުރުން ދެވަނަ ހާފުގެ 81 ވަނަ މިނެޓިގައި ޕެރަގުއޭގެ މިޑްފީލްޑަރ އަންދްރޭސް ކުބާސް ކުރި ކުށަކާއި ގުޅިގެން މެޗުގެ ރެފްރީ ވަނީ އޭނާއަށް ސީދާ ރަތް ކާޑެއް ދައްކައި ދަނޑު ފޮނުވާލާފައެވެ.މިއާއެކު މެޗުގެ ބާކީބައި އެޓީމުން ފުރިހަމަ ކުރީ އެއް ކުޅުނަތެރިއަކު މަދުކޮށެވެ.

މީގެ އިތުރުން ދެވަނަ ހާފުގެ ފަހު ވަގުތުކޮޅުގެ ތެރޭގައި ޕެރަގުއޭ އިން ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮޕްސައިޑް ލަނޑެއްކަމަށެވެ. މިއާއެކު މެޗުގެ ކުޅުން މިމިގެންދިޔައީ 4-1 ގެ ނަތީޖާއަކުން ބްރެޒިލް ކުރީގައި އޮވެގެންނެވެ. އަދި މިނަތީޖާއެކު މުބާރާތުގައި ކުޅުނު ދެމެޗުން ލިބުނު ހަތަރު ޕޮއިންޓާއެކު ބްރެޒިލް މިވަގުތު އޮތީ ގުރޫޕްގެ ދެވަނައިގައެވެ. އަދި މިމެޗުން ބަލިވި ޕެރަގުއޭ ކުޅުނު ދެމެޗުން ބަލިވެފައިވާއިރު، ބާކީ އެއް މެޗު އޮއްވައި އެޓީމު ވަނީ މުބާރާތުން ކަޓާފައެވެ.