މާފުށީ ޖަލުގައި ޝަރީޢަތް ނިމެންދެން ބަންދުކޮށްފައި ހުރި ގައިދީއެއް ކަމަށްވާ މުޙައްމަދު ޖަމީލް ހަރަކާތެއް ނެތި 4 ގަޑިއިރު ވަންދެން ސަޖިދައިގައި އޮތް ކަމަށް ފުލުހުން ހާމަކޮށްފިއެވެ.

ޖަމީލުގެ މަރާއި ގުޅިގެން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ، ޖަމީލްގެ އަނގައާއި ނޭފަތުން ފޮނު ޒާތުގެ ތަކެތި ފާހަގަކުރެވިފައިވާ ކަމަށާއި، ގޮޅިންނާއި ހަށިގަނޑުން ވެސް އޭނާ އަށް ކުޑަކަމުދެވިފައި ހުރި ކަން ފާހަގަކުރެވިފައިވާ ކަމަށެވެ.

އޭނާގެ ނިތްކުރިއާ މޫނުމަތި ނޫފައިގެންފައި ވަނީ ގިނަ އިރުތަކެއް ވާންދެން އެއް ގޮތަކަށް އޮތުމުން ކަމަށް ވެސް ފުލުހުން ބުނެފައިވެ އެވެ.

މިކަމާއި ގުޅިގެން ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިހުސާން ވިދާޅުވީ، އޮޓޮޕްސީ ހަދަން ނިންމީ،ނިޔާވެފައި އޮންނަ މީހެއްގެ ހަށިގަނޑު އޮންނަ އޮތުމުން ހަށިގަނޑުގެ ކުލައަށާއި އައިސްފައި ހުންނަ ބަދަލުތައް އެއީ ބަޔަކު އަނިޔާކޮށްގެން ދީފައިވާ ގެއްލުންތަކެއްކަން ދޭހަވާ ގޮތަށް ވާހަކަތައް ދެކެވެން ފެށި ހިސާބުން ކަމަށެވެ. 

އެހެންނަމަވެސް، އޮޓޮޕްސީ ހެދުމަށް ޖަމީލުގެ އާއިލާއަށް އާދޭސް ދެންނެވުމުންވެސް، އާއިލާއިން އެކަން ކުރަން ބޭނުން ނުވާ ކަމަށާއި ޖަމީލުގެ މަރުވީ ގަސްތުގައި މީހުން ގެއްލުންދީގެން ކަމަށް ގަބޫލުނުކުރާ ކަމަށާއި ޕޯސްޓްމޯޓަމް ހަދައިގެން ހަށިގަނޑަށް އިތުރަށް ގެއްލުންދޭން ބޭނުން ނުވާ ކަމަށް އޭނާގެ އާއިލާއިން ބުނެފައިވާކަން ވަޒީރު އިހުސާން ފާހަގަކުރެއްވިއެވެ.

ހަމައެއާއިއެކު، ވަޒީރު ވަނީ  އާއްމު އުސޫލުގެ ދަށުން ގައިދީއަކު އަޅުކަމުގައި އުޅޭނަމަ އޮފިސަރުން އެ ބަޔަކަށް އުދަނގޫ ނުކުރާ ކަމަށާއި، މީގެ ކުރިން ވެސް ގައިދީން ނަމާދުކުރުމުގައި ހާއްސަކޮށް، ސުޖޫދުގައި ވަރަށް ގިނައިރު ހޭދަކުރާކަން ފާހަގަކޮށްފައެވެ.

އެހެންނަމަވެސް، މީގެ ފަހުން ކަރެކްޝަނަލް ސާވިސް އިން އެއް ގަޑިއިރު ތެރޭގައި ކޮންމެ ގައިދީއަކު ބަލާނެ ކަމަށާއި، އަޅުކަމުގެ ހަރަކާތެއްގައި އޮތަސް އެ މީހާ ފުރާނަ ހުރިތޯ ނުވަތަ ހަރަކާތް ކުރޭތޯ ބަލާނެ ކަމަށް ވަޒީރު ވިދާޅުވިއެވެ.