ރައްޔިތުންގެ މަޖިލީހަށް ސަރުކާރުން ހިންގާ މައި ޕާޓީ، ޕްރޮގްރެސިވް ކޮންގްރެސް ކޯލިޝަން (ޕީއެންސީ) ގެ ފަރާތުން އިންތިހާބުވެވަޑައިގެންނެވި މެމްބަރުންނަށް ރައީސުލްޖުމްހޫރިއްޔާގެ ރަސްމީ ގެކޮޅުން މަހަކު 50،000 ރުފިޔާ ދޭކަމަށް ދެކެވެމުންދިޔަ ވާހަކަތައް ރައީސް އޮފީހުން ދޮގުކޮށްފިއެވެ.
މުލިއާގެ އިން ޕީއެންސީ މެންބަރުންނަށް ފައިސާ ދެމުންދާ ކަމުގެ ތުހުމަތު އިދިކޮޅު އެމްޑީޕީގެ ޗެއާޕާސަން ފައްޔާޒް އިސްމާއީލް ކުރުމާއި ގުޅިގެން ރައީސް އޮފީހުގެ ތަރުޖަމާނު ހީނާ ވަލީދު އެކްސް ގައި ކުރެއްވި ޕޯސްޓެއްގައި ވިދާޅުވީ، ޕީއެންސީ މެމްބަރުންނަށް މުލިއާގެއިން މަހަކު 50،000 ރުފިޔާދޭ ކަމަށް ބުނެ ފައްޔާޒް ދެއްކެވި ވާހަކައަކީ ކަނޑައެޅިގެން ދޮގެއް ކަމަށެވެ.
"ޕީއެންސީގެ މަޖިލިސް މެމްބަރުންނަށް މުލިއާގެއިން މަހަކު 50،000ރ. ދޭކަމަށް އެމްޑީޕީގެ ޗެއާޕާސަން ފައްޔާޒް އިސްމާޢީލް ދެއްކެވި ވާހަކައަކީ ކަނޑައެޅިގެން ބުހުތާނު ދޮގެއް."
ހީނާ ވިދާޅުވިއެވެ.
މުލިއާގެއިން ޕީއެންސީ މެމްބަރުންނަށް ރުފިޔާދޭ ކަމަށް ފައްޔާޒް ތުހުމަތުކުރެއްވީ މިދިޔަ ބުދަ ދުވަހު ރާއްޖެ ޓީވީގެ 'ފަލަ ސުރުހީ' ޕްރޮގްރާމްގައި ވާހަކަފުޅު ދައްކަވަމުންނެވެ.
މިގޮތުން ފައްޔާޒް ވަނީ، މަޖިލިސް މެންބަރުން ވަކި ގޮތަކަށް ތިބުމަށްޓަކައި ރައީސް ޑރ.މުޙައްމަދު މުޢިއްޒުގެ ފަރާތުން މެންބަރުންނަށް ކޮންމެ މަހަކު ވެސް ފައިސާ ދެމުންދާ ކަމަށާއި، ކޮންމެ މެންބަރަކަށް މުލިއާގެއިން 50،000 ރުފިޔާ ދޭ ކަމަށް އަޑުއިވިފައިވާ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
