ދިވެހިރާއްޖެއިން، އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯ.އޭ.ސީ.ޕީ.އެސް.) ގެ "ސަމޯއާ އެގްރީމަންޓް" ގައި ބައިވެރިވުމަށް ރައްޔިތުންގެ މަޖިލީހުން ރުހުންދީފިއެވެ.

މި އެއްބަސްވުމުގައި ބައިވެރިވުމަށް ވަޒީރުންގެ މަޖިލީހުން ލަފާދެއްވުމާއި ގުޅިގެން ރައްޔިތުންގެ މަޖިލީހުގެ ރުހުން ހޯދުމަށް ހުށަހެޅުއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވައި، މަޖިލީހުގެ ހާރިޖީ ގުޅުންތަކުގެ ކޮމިޓީއަށް ފޮނުއްވާފައިވަނީ މިމަހުގެ 26 ވަނަ ދުވަހުއެވެ.

އެ ކޮމިޓީގެ ބައްދަލުވުމުގައި އެ އެއްބަސްވުމުގައި ސޮއިކޮށް ތަސްދީގުކުރާއިރު، މި މައްސަލާގައި ހިމަނާފައިވާ ޑެކްލަރޭޝަން އަދި ރެޒަވޭޝަން ހުށަހަޅާ ގޮތަށް އެއްބަސްވުމުގައި ރާއްޖެއިން ބައިވެރިވުމަށް ރުހުން ދޭން ފެންނަަ ކަމަށް ވަނީ ނިންމާފައެވެ.

އެއާއިއެކު، ކޮމިޓީން ނިންމި ގޮތަށް، މަޖިލީހުގެ ޖަލްސާގައި މިއަދު ނެގި ވޯޓުގައި ބައިވެރިވި 82 މެމްބަރުންގެ ވޯޓުން މި ރިޕޯޓް ވަނީ ފާސްކޮށްފައެވެ.

މަޖިލީހުގެ ހާރިޖީ ގުޅުންތަކުގެ ކޮމިޓީން އެކުލަވާލި ރިޕޯޓްގައިވާ ގޮތުން، 1980ގެ އަހަރުތަކުން ފެށިގެން ރާއްޖެއިން އޯއޭސީޕީއެސްގެ މެމްބަރު ގައުމަކަށް ވުމަށް މަސައްކަތް ކޮށްފައިވާއިރު، އޯއޭސީޕީއެސްގެ ފުރިހަމަ މެމްބަރުކަން ރާއްޖެއަށް ލިބިފައިވަނީ 2022 ވަނަ އަހަރުގެ ޑިސެންބަރު މަހުގެ 9 ގައެވެ. އެއަށްފަހު ދެން ފުރިހަމަކުރަން ޖެހޭ މަރުހަލާއަކީ ސަމޯއާ އެގްރީމަންޓުގައި ސޮއިކޮށް ތަސްދީގުކުރުން ކަމަށްވާއިރު، މި އެއްބަސްވުމުގައި ސޮއިކުރުމަށް ހުޅުވާލާފައިވާ މުއްދަތަކީ މިިދިޔަ އަހަރުގެ 15 ނޮވެމްބަރުން ފެށިގެން މިއަދުގެ ނިޔަލަށެވެ.

މިއީ ރިއަށް އޮތް ވިހި އަހަރަށް އީ.ޔޫ. – އޯ.އޭ.ސީ.ޕީ.އެސް. ގުޅުމުގެ މައިގަނޑު 6 ދާއިރާއަކަށް ބިނާވެފައިވާ ޤާނޫނީ އޮނިގަނޑު ހާމަކޮށްދޭ އެގްރީމަންޓެއް ކަމަށް ރައީސް އޮފީހުން ވަނީ ބުނެފައެވެ.

އެ މައިގަނޑު 6 ދާއިރާއަކީ: 

1) ހިއުމަން ރައިޓްސް އެންޑް ޑިމޮކްރަސީ

2) ޕީސް އެންޑް ސެކިއުރިޓީ

3) ޑިވެލޮޕްމަންޓް

4) އިކޮނޮމިކް ގްރޯތް

5) ކްލައިމެޓް ޗޭންޖް

6) މައިގްރޭޝަން އެންޑް މޮބިލިޓީ

ރައީސް އޮފީހުން ބުނީ، މި އެއްބަސްވުމުގައި ބައިވެރިވެ، އޯ.އޭ.ސީ.ޕީ.އެސް. ގެ ފުރިހަމަ މެންބަރަކަށް ވުމުން ޔޫރަޕްގެ އިއްތިޙާދުން އެކި ދާއިރާތަކުން ފަހިކޮށްދޭ ފުރުޞަތުތައް ރާއްޖެއަށް ލިބުމުގައި ފަސޭހަ އިންތިޒާމްތަކެއް ހަމަޖެހިގެންދާނެކަމަށާއި، ދިވެހިރާއްޖެއިން ބޭރަށް އެކްސްޕޯޓު ކުރާ ކަނޑުމަހުގެ އެކި ބާވަތްތަކަށް ރަނގަޅު އަގެއް ހޯދުމަށް އިތުރު ދޮރުތަކެއް ހުޅުވުމަށް މަގުފަހިވުން އޭގެ ތެރޭގައި ހިމެނޭ ކަމަށެވެ.