ރާއްޖެ އިން ތުރުކީ އަށް ކަނޑައަޅާ ސަފީރު ކަމަށް ޗީފް އޮފް ޑިފެންސް ފޯސް، ލެފްޓިނެންޓް ޖެނެރަލް، ރިޓަޔާޑް އަބްދުއްރަހީމް އަބްދުލްލަތީފް އަދި ޕާކިސްތާނު ސަފީރަކަށް ފޮރިންގެ ސްޓޭޓް މިނިސްޓަރު ކަމުގައި ހުންނެވި މުހައްމަދު ތޯހާ އައްޔަން ކުރުމަށް ރައްޔިތުންގެ މަޖިލީހުން ރުހުން ދީފިއެވެ.

މި ދެބޭފުޅުން މި މަގާމަށް އައްޔަނުކުރެއްވުމަށްޓަކައި ރައީސް ޑރ.މުޙައްމަދު މުޢިއްޒު، އެ ދެ ބޭފުޅުންގެ ނަން މިދިޔަ މޭމަހުގެ 11 ވަނަ ދުވަހު މަޖިލިހަށް ފޮނުއްވާފައިވާއިރު، އެ މައްސަލަ ދިރާސާކުރި މަޖިލީހުގެ ހާރިޖީ ކޮމިޓީން ވަނީ އެ ދެބޭފުޅުން އެ މަގާމަށް އައްޔަން ކުރުމަށް ފެންނަ ކަމަށް ނިންމާފައެވެ.

އެއާއިއެކު، ރައްޔިތުންގެ މަޖިލީހުގެ މިއަދުގެ ޖަލްސާގައި ދެ ބޭފުޅުންނަށް ރުހުން ދިނުމަށް ނިންމާފައިވަނީ 82 މެމްބަރުންގެ ވޯޓުންނެވެ.

ރާއްޖެއިން ތުރުކީ އަށް ކަނޑައަޅުއްވާ ސަފީރު، އަބްދުއްރަހީމް އަކީ  ސިފައިންގެ ގާނޫނުގައި ބުނާ ގޮތުން އުމުރުން 60 އަހަރު ފުރުމުން، 39 އަހަރަށް ފަހު، އެމްއެންޑީއެފްގެ ހިދުމަތުން ރިޓަޔާ ކުރެއްވި ބޭފުޅެކެވެ. 

މިދިޔަ އަހަރުގެ ޑިސެންބަރުމަހު ތުރުކީ އަށް ރައީސް ޑރ.މުޢިއްޒު ކުރެއްވި ދަތުރުފުޅުގައި އެގައުމުގައި އެމްބަސީއެއް ގާއިމުކުރުމަށް ހަމަޖެހިފައިވާކަން ހާމަކުރައްވާފައިވާއިރު، އެމްބަސީ ގާއިމުކޮށްފައިވާކަން ސަރުކާރުން އިއުލާނު ކުރީ މިއަހަރުގެ ފެބްރުއަރީމަހުގެ ތެރޭގައިއެވެ.