ތުރުކީ އިން ރާއްޖެއަށް ގެނައުމަށް ހަމަޖެހިފައިވާ ކާޑުގެ ބާވަތްތައް އޭޕްރީލް މަހުން ފެށިގެން ލިބެމުންދާކަމަށް އެސްޓީއޯއިން ބުނެފިއެވެ.

ކާޑުގެ ބާވަތްތަކަށް ވަކި ގައުމަކަށް ބަރޯސާވުން ދޫކޮށްލުމުގެ ގޮތުން، ދިވެހިރާއްޖެއަށް ކާޑުގެ ބާވަތްތައް ގެނައުމަށް ތުރުކީވިލާތާއެކު ރައީސް ޑރ.މުޙައްމަދު މުޢިއްޒު ވަނީ އެއްބަސްވުމެއްގައި ސޮއި ކުރައްވާފައެވެ.

މިކަމާއި ގުޅިގެން އިދިކޮޅު ފަރާތްތަކުން އަންނަނީ ތުރުކީން ގެންނަ ކާޑުގެ ބާވަތްތައް ކޮބައިތޯ ބުނެ ސަރުކާރަށް ފާޑުކިޔަމުންނެވެ. މިގޮތުން، 19 ވަނަ ރައްޔިތުންގެ މަޖިލީހުގައި އުނގޫފާރު ދާއިރާގެ މެމްބަރުކަން ކުރެއްވި މުހައްމަދު ވަހީދު (ވައްޑެ) އެކްސްގައި ކުރެއްވި ޕޯސްޓެއްގައި ވަނީ އެންމެ ދިމާލަކަށް ބަރޯސާނުވާން ތުރުކީން ގެންނަ ބާވަތްތައް މިހާރު އަތުވެއްޖެތޯ ބުނެ ސަރުކާރަށް ފާޑު ވިދާޅުވެފައެވެ.

އެކަމާއި ގުޅިގެން، އެސްޓީއޯގެ މީޑިއާ އޮފިޝަލް ޔޫސުފް ޝާހް ވިދާޅުވީ، ތުރުކީން ރާއްޖެ އަށް ގެނައުމަށް ހަމަޖެހިފައިވާ ކާޑު އޭޕްރިލް މަހުގެ 20 ވަނަ ދުވަހު މާލެއަށް އައިސްފައިވާ ކަމަށެވެ.

ތުރުކީ އިން ރާއްޖެ އަށް ގެނައި ކާޑު-- ފޮޓޯ: އެކްސް؛ @lucasjalyl

ޔޫސުފް ޝާހް އިތުރަށް ވިދާޅުވީ، ތުރުކީން ރާއްޖެއަށް ގެނައި ފުށުގެ ފުރަތަމަ ޝިޕްމަންޓް ދެމަހެއް ކުރިން ރާއްޖެ ގެނެސް ވިކިފައިވާ ކަމަށާއި، އެ ޝިޕްމެންޓް  އައިއިރު 20،008 ފުށް ބަސްތާ ގެނައި ކަމަށެވެ.

ކާޑުގެ ބާވަތްތަކާއި އެހެނިހެން ޒަރޫރީ ތަކެތި ކައިރި އެހެން ގައުމުތަކުން ގެނައުމަކީ އެކި ގައުމުތަކުން ކުރާ ކަމެއްކަން ފާހަގަކުރައްވަމުން އެސްޓީއޯގެ މީޑިއާ އޮފިޝަލް ވިދާޅުވީ، މިހާރު ވެސް މިފަދަ ޝިޕްމަންޓުތަކަށް އޯޑަރު ޖަހާފައިވާ ކަމަށެވެ.