ދިވެހިރާއްޖެއަކީ ތަޢުލީމަށް ލޯބިކުރާ ބަޔަކު އުޅޭ ތަނަކަށްވާއިރު، ރާއްޖޭގެ ރައްޔިތުންގެ މަޖިލީހުގައި ތިބޭ މެމްބަރުންގެ ވަކި ކޮލިފިކޭޝަނެއް އޮންނަންޖެހޭ ކަމަށް ހުރާ ދާއިރާގެ މަޖިލިސް މެންބަރު ޑރ. އަނާރާ ނަޢީމް ވިދާޅުވެއްޖެއެވެ. 

ރައްޔިތުންގެ މަޖިލީހުގެ މެންބަރަކަށް ވުމުގެ ޝަރުތު ތަކުގެ ތެރޭގައި، އެކަމަށް ކުރިމަތިލާ މީހުންގެ ޢިލްމީ ޤާބިލްކަން މިނެ ކިރުމަށް ޚާއްސަކޮށް އެއްވެސް ޝަރުތެއް ހިމަނާފައެއް ނޯވެއެވެ. މިހާރު އޮތް ގޮތުން އެއްވެސް ވަރަކަށް ތަޢުލީމް ހާސިލް ނުކޮށް ހުރި މީހަކަށްވެސް މެންބަރަކަށް ވެވޭނެއެވެ. 

އެކަމާއި ގުޅިގެން ގިނަ ރައްޔިތުންގެ ކަންބޮޑުވުން އޮތް އިރު، ރައްޔިތުންގެ މަޖިލީހުގެ މިއަދުގެ ޖަލްސާގައި، މަޖިލީހުގެ މެންބަރުންގެ އަދަދު މަދުކުރުމާ ގުޅޭގޮތުން ބާރަށު ދާއިރާގެ މެންބަރު އިބްރާހިމް ޝުޖާއު ހުށަހެޅުއްވި ގަރާރަށް ބަހުސްކުރެއްވަމުން އަނާރާ ވަނީ މެންބަރުންގެ އަދަދު މަދު ކުރާ ވާހަކަ ދައްކާއިރު މެންބަރުންގެ ތައުލީމީ ފެންވަރަށް ބެލުމުގެ މުހިންމު ކަމަށްވެސް އަލިއަޅުވާލަން ޖެހޭކަން ފާހަގަކުރައްވާފައެވެ. 

އަނާރާ ވިދާޅުވީ 20 ވަނަ މަޖިލީހުގެ މެޖޯރިޓީ އަކީ ރަނގަޅަށް ވަކާލާތު ކުރަން އެނގޭ މެންބަރުން ކަމަށެވެ. އެހެން ނަމަވެސް، ކުރިއަށް އޮތް ތަނުގައުވެސް، ތަޢުލީމީ، އަދި ވަކާލާތު ކުރުމުގެ ހުނަރު ހުރި ފަރާތްތަކަށް ފުރުސަތު ފަހިކޮށްދިނުމަށް މަޖިލީހުގެ މެންބަރުންގެ ވަކި ތައުލީމީ ފެންވަރެއް ހުންނަން ޝަރުތު ކުރަންޖެހޭ ކަމަށް އޭނާ ވިދާޅުވުއެވެ. 

އަނާރާ މިހެން ވިދާޅުވެފައިވާއިރު، މަޖިލިސް މެންބަރު ކަމަށް ކުރިމަތިލާ މީހުންގެ  ތަޢުލީމީ ފެންވަރު ބަލަންޖެހޭ ކަމަށް އާއްމުންގެ ތެރެއިން ގިނަ ބަޔަކު އަބަދުވެސް ވަކާލާތު ކުރެއެވެ.  

ަ