ޖޫން މަހުގެ 21 ވީ ހުކުރު ދުވަހު، އައްޑޫ ފިޝަރީޒް ކޮމްޕްލެކްސް (އޭއެފްސީ) ސަރަހައްދުގައި މަސްވެރިން ކުރަމުންދިޔަ މުޒާހަރާ ހުއްޓާލައި، އޭއެފްސީ އަލުން އޮޕަރޭޝަނަށް ގެނެސްފިއެވެ.

މިކަމާއި ގުޅިގެން މިފްކޯއިން ބުނީ، ޖޫން މަހުގެ 21 ވީ ހުކުރު ދުވަހުގެ 15:19 ގައި އައްޑޫ ފިޝަރީޒް ކޮމްޕްލެކްސް (އޭއެފްސީ) ސަރަހައްދުގައި 15 ވަރަކަށް މަސް ދޯނީގެ މަސްވެރިންތަކެއް ފެށި މުޒާހަރާ އިއްޔެ ނިންމާލީ އެ ދޯނިފަހަރުގެ ވެރީންނަށް އެދުވަހުގެ ހަވީރުގެ ވަގުތެއްގައި ފައިސާ ޖަމާވާން ފެށުމުންކަމަށެވެ.

މި މުޒާހަރާގެ ސަބަބުން އޭއެފްސީގައި މަސައްކަތްކުރާ 125 އެއްހާ މުވައްޒަފުންގެ ވަޒީފާގެ މާހައުލު ގެއްލި، އިންސާނީ އަސާސީ ޙައްޤުތައް ހަނިވެގެން ދިޔަކަމަށާއި، މުޒާހަރާގެ ފުރަތަމަ ދުވަހު، ހުރިހާ މުވައްޒަފުން ވަގުތީ އެކޮމޮޑޭޝަނަކަށް ބަދަލުކޮށް، ނިދުމާއި، ފާޚާނާ ކުރުމާއި، ކެއިން ބުއިމާއި އެނޫންވެސް ޒަރޫރީ ކަންކަން ހަމަޖައްސަން ޖެހުނުކަމަށް މިފްކޯއިން ބުނެއެވެ.

މީގެ އިތުރުންވެސް މިފްކޯއިން ބުނީ، އޭއެފްސީގައި މަސައްކަތްކުރާ 7 ސީނިއަރ މުވައްޒަފުންނަށް މުޒާހަރާގެ ބައިވެރިންގެ ފަރާތުން ކުރިމަތިވި ދުއްތުރާތަކުގެ ސަބަބުން މުޅި އޮޕަރޭޝަން ހުއްޓި، އޭއެފްސީން ކަރަންޓު ކަނޑާލަން ޖެހުކަމަށެވެ. އެވަގުތު އެ ފެސިލިޓީގައި ރައްކާކޮށްފައި ހުރި މަހުގެ ޓަނޭޖުގެ އަދަދު 390 އާ ގާތްކުރާކަމަށް މިފްކޯއިން މަޢުލޫމާތު ދެއެވެ.

މުޒާހަރާގެ ބައިވެރިން، މުވައްޒަފުންގެ މެސް ރޫމުގެ ދޮރު ހަލާކުކޮށްލައިގެން ވަދެ، ކައިބޮއި ހަދާފައިވާ ކަމަށާއި، މިފްކޯގެ ދިދަ ޕޯސްޓަށް ނަގާފައިވާ ދިދަ ބޭލުމަށްފަހު ތަން ހިސާރުކޮށް، އޭއެފްސީގެ ފަހަތުން ވަންނަ ދޮރުވެސް މުޒާހަރާގެ ބައިވެރިން ބަންދުކުރިކަން މިފްކޯއިން ފާހަގަކުރިއެވެ.

މުޒާހަރާގެ ބައިވެރިންގެ ބިރުދެއްކުމާއި އިންޒާރުތައް އިތުރުވުމާ ގުޅިގެން، ސީނިއަރ މުވައްޒަފުންނަށް ޖެހުނީ ފުލުހުންގެ ހިމާޔަތް ހޯދަންޖެހުނެވެ. މީގެ އިތުރުން ހަމަނުޖެހުން ބޮޑުވެ، އޭއެފްސީގެ މުވައްޒަފަކަށްވެސް ވަނީ އަނިޔާވެފައިވާ ކަމަށް ވެސް މިފްކޯއިން ބުނެއެވެ.

މިފްކޯއިން ބުނީ، މި ދަތި ހާލަތުގައި މުވައްޒަފުން ދެއްކި ހިތްވަރާއި ކެތްތެރިކަމަކީ ތަޢުރީފު ޙައްޤު ކަމެއް ކަމަށެވެ. އަދި އޭއެފްސީގެ އޮޕަރޭޝަން އަލުން ފެށުމަށް މުވައްޒަފުން ކުރި މަސައްކަތަށް ޝުކުރު އަދާކުރިއެވެ.  

އެ ހާލަތުގައި ވެސް އޭއެފްސީގެ މުވައްޒަފުންގެ ކިބައިން ފެނިގެންދިޔައީ ކެތްތެރިކަމާއި ހިކުމަތްތެރިކަން ކަމަށާއި، ޚާއްޞަކޮށް އިސް މުވައްޒަފުން ވަނީ އަމިއްލަ އިސްނެގުމުގެ މަތިން އެހެން މުވައްޒަފުންގެ ހައްޤުގައި ކަންކަން ތަރުތީބުކޮށް، ފުލުހުންނާ ގުޅިގެން ހާލަތު ހަމަޖެއްސުމަށް މަސައްކަތްކޮށްފައިކަން މިފްކޯއިން ފާހަގަކުރިއެވެ.

މިފްކޯއިން ބުނީ، މުވައްޒަފުން ދެއްކި ހިތްވަރާއި ކެތްތެރިކަމަކީ ތަޢުރީފު ޙައްޤު ކަމެއް ކަމަށާއި، އަދި އަމިއްލަ މަޞްލަޙަތަށްވުރެ ކުންފުނީގެ މަޞްލަޙަތު އިސްކޮށް، މުޒާހަރާގެ ބައިވެރިންނާ މުޢާމަލާތްކޮށް، ފެސިލިޓީ ބެލެހެއްޓުމުގައި މުވައްޒަފުން ދެއްކި ހިތްވަރު ފާހަގަކުރާ ކަމަށެވެ.

މިފްކޯއިން އިތުރަށް ބުނީ، 10 ދުވަހުގެ މުޒާހަރާއާ ގުޅިގެން އޭއެފްސީއަށާއި ކުންފުންޏަށް ލިބުނު ގެއްލުން ދެނެގަތުމަށް އެސެސްމަންޓެއް ހަދަމުންދާ ކަމަށާއި، އޭގެ ތަފްޞީލު ރިޕޯޓު ވީހާވެސް އަވަހަކަށް ހާމަކުރާނެ ކަމަށެވެ. އަދި މިހާލަތުގައި ފުލުހުންގެ ފަރާތުން ލިބުނު އެއްބާރުލުމާއި އެހީތެރިކަންވެސް މިފްކޯއިން ޝުކުރުވެރިކަމާއެކު ފާހަގަކުރިއެވެ.