އެމްޑީޕީ ސަރުކާރަށް މިފަހަރު ވެރިކަން ލިބުނު ނަމަ ވެލާނާ އިންޓަނޭޝަނަލް އެއާޕޯޓު (ވީއައިއޭ) ވިއްކާލަން ރޭވި ކަމަށް ރައްޔިތުންގެ މަޖިލީހުގެ އިނގުރައިދޫ ދައިރާގެ މެމްބަރު އިބްރާހިމް ފަލާހް ވިދާޅުވެއްޖެއެވެ.

މިއަދު ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހެޅި ދައުލަތުގެ ދަރަންޏަށް ޒިންމާވުމުގެ ބިލުގެ ބަހުސްގައި ވާހަކަދައްކަވަމުން ފަލާހް ވިދާޅުވި ގޮތުގައި، ކުރީ ސަރުކާރުގެ ވެރިކަމުގެ އެންމެ ފަހު ދެމަހަށް ވީއިރު، ވަޒީރުން ވަނީ އޭރު ވެރިކަމުގައި ހުންނެވި، ރައީސް އިބްރާހިމް މުހައްމަދު ޞާލިހަށް އެއާޕޯޓު ވިއްކާލުމަށް ލަފާދީފައެވެ.

މިއީ ކުރިންވެސް އެއްފަހަރު ވިއްކާލާފައިވާ އެއާޕޯޓެއް ކަން ފާހަގަކުރައްވަމުން ފަލާހް ވިދާޅުވީ، އެފަހަރު ވެސް ވީއައިއޭ ސަލާމަތްކުރީ ޕީޕީއެމްގެ ވެރިކަމެއްގައި ކަމަށެވެ.

ފަލާހް ވިދާޅުވީ، މިފަހަރުވެސް އެމްޑީޕީއަށް ވެރިކަން ލިބިއްޖެ ނަމަ، ރާވާފައިއޮތީ ވެރިކަން ލިބޭ ފުރަތަމަ މަހު އެއާޕޯޓު ވިއްކާލަން ސޮއި ކުރަން ކަމަށާއި، އެކަމަށް ފައިސާ ވެސް ނެގި ކަމަށެވެ.

މީގެ އިތުރުންވެސް، ފަލާހް ވަނީ އެމްޑީޕީގެ ސަރުކާރުން ދައުލަތަށް ލިބެނީ އެއް ރުފިޔާކަމަށްވާނަމަ، ދެ ރުފިޔާ ހޭދަކުރި ނަމަވެސް މި ސަރުކާރަށް ރުފިޔާއެއް ލިބޭނަމަ މި ސަރުކާރުން ހަރަދުކުރާނީ ބައި ރުފިޔާ ކަމަށް ވެސް ވިދާޅުވެފައެވެ.

ސަރުކާރުގެ ފަރާތުން މިފަދަ ބިލުތައް ހުށަހެޅުމުގެ ބޭނުމަކީ ވެސް ދައުލަތުގެ ދަރަނި މެނޭޖުކުރުމުގައި އިގުތިޞާދާއި މުސްތަގުބަލުގައި އަންނަން އޮތް ޖީލްތަކަށް މިގައުމު އެންމެ ރަގަޅު ގޮތުގައި ވާސިލް ކުރުމަށް ފަލާހް ވިދާޅުވިއެވެ.