ކޮންމެ 5 އަހަރަކުން ރައްޔިތުންގެ މަޖިލީހުގެ މެމްބަރުންގެ އަދަދު އިތުރުވަމުންދާތީ، އެކަމާއި ގުޅޭގޮތުން މެމްބަރުންގެ ހިޔާލު ހޯދުމަށް ހުށަހެޅި ގަރާރު މަޖިލީހުން ބަލައިގަނެ، މިނިވަން މުއައްސަސާތަކުގެ ކޮމިޓީއަށް ފޮނުވައިފިއެވެ.

ބާރަށު ދާއިރާގެ މެންބަރު އިބްރާހީމް ސުޖާޢު މަޖިލީހަށް ހުށަހެޅި މި ގަރާރު ކޮމިޓީއަށް ފޮނުވާފައިވަނީ 78 މެންބަރުންގެ އިއްތިފާގުންނެވެ.

މި ގަރާރުގައި 17 ވަނަ ރައްޔިތުންގެ މަޖިލީހުން ފެށިގެން، ކޮންމެ ފަސް އަހަރަކުން މަޖިލީހަށް މެންބަރުންގެ ޢަދަދު އިތުރުވަމުންދާކަމަށް ބަޔާންކޮށްފައިވާއިރު، ގައުމުގެ އާބާދީ އާ އަޅާ ބަލާއިރު ރާއްޖޭގެ މަޖިލީހަށް އިންތިހާބުކުރަން ޖެހޭ މެންބަރުންގެ އަދަދު އިތުރުވަމުންދާ ކަމަށާއި މިކަމަށް ހައްލެއް ހޯދަން ޖެހޭ ކަމަށް ސުޖާއު ވިދާޅުވިއެވެ.

މި ގަރާރުގައި، މެންބަރުންގެ ޢަދަދު މަދުކުރުމަށް ނުވަތަ ވަކި ޢަދަދެއްގައި ހިފެހެއްޓުމަށް ޤާނޫނު އަސާސީގެ 71 އަދި 72 ވަނަ މާއްދާއަށް މުހިންމު އިސްލާހުތަކެއް ގެންނަންޖެހޭކަމަށާއި، މަޖިލީހުގެ އިންތިޚާބީ ދާއިރާތައް ކަނޑައެޅުމާބެހޭ ޤާނޫނަށްވެސް ބަދަލު ގެންނަން ޖެހޭކަމަށް ސުޖާއު ވަނީ ވިދާޅުވެފައެވެ.

17 ވަނަ ރައްޔިތުންގެ މަޖިލީހުން ފެށިގެން މި ހިނގާ 20 ވަނަ ރައްޔިތުންގެ މަޖިލީހާއި ހަމައަށް 16 މެންބަރުން އިތުރުވެފައިވާކަމަށް މި ގަރާރުގައި ބުނެފައިވެއެވެ.

މިގޮތުން، 17 ވަނަ މަޖިލީހުގައި 77 މެންބަރުން ތިއްބެވިއިރު 18 ވަނަ މަޖިލީހުގައި 85 މެންބަރުން، 19 ވަނަ މަޖިލީހުގައި 87 މެންބަރުން ތިއްބެވިއެވެ. އަދި މިހިނގަމުންދާ 20 ވަނަ މަޖިލީހުގައި 93 މެންބަރުން ތިއްބަވައެވެ.