އައްޑޫ ސިޓީގައި ސޯޝަލް ޕްރޮޓެކްޝަން އެޖެންސީ (އެންސްޕާ) އޮފީހެއް ގާއިމުކުރުމުގެ މަސައްކަތް ކުރަމުންދާ ކަމަށް އެންސްޕާގެ ސީއީއޯ ވަލީދު ވިދާޅުވެއްޖެއެވެ.
ދައުލަތުގެ މީޑިއާގެ ޕްރޮގްރާމަކަށް ރޭ ދެއްވި އިންޓަވިއުއެއްގައި ހީނާ ވިދާޅުވީ، އައްޑޫގައި 1000 ވަރަކަށް ނުކުޅެދުންތެރިކަން ހުންނަ ފަރާތްތައް އެންސްޕާގެ ދަފްތަރުގައި ރަޖިސްޓްރީކޮށްފައިވާއިރު، ދަފްތަރު މޮނީޓާ ކުރުމާއި އަޕްޑޭޓް ކުރުމާއި އިވެލުއޭޓް ކުރުމުގައި ގޮންޖެހުންތައް ހުރިކަމަށެވެ.
އެހެންކަމުން، އައްޑޫ ސިޓީ ކައުންސިލާއި ސްޓޭކްހޯލްޑާސްއާއި ބައްދަލުކޮށް، މިފަދަ ކަންކަން ހަރުދަނާ ކުރެވޭނެ ކަންކަމާއި ގުޅޭ މަޝްވަރާތައް ކުރަމުންދާ ކަމަށާއި، ކުރިއަށް އޮތް ތަނުގައި އައްޑޫ ސިޓީގައި އެންސްޕާގެ އޮފީހެއް ގާއިމުކުރުމަށް ވިސްނާކަމަށް ހީނާ ވިދާޅުވިއެވެ.
"އެހެންވީމަ، އަޅުގަނޑުމެން ކައުންސިލާއި ސްޓޭކްހޯލްޑާސްއާއި ބައްދަލުކޮށް، މީޓިންތައް ބާއްވާ، މިކަމުގައި ހަރުދަނާ ކުރެވޭނެ ކަންކަމާއި ގުޅޭ މަޝްވަރާތައް ކުރަމުން މިދަނީ. އެހެންވީމަ، އަޅުގަނޑުމެންގެ ވިސްނުމެއް އެބައޮތް ކުރިއަށް އޮތް ތަނުގައި އައްޑޫ ސިޓީގައި އެންސްޕާގެ އޮފީހެއް ގާއިމުކުރަން"
ހީނާ ވިދާޅުވިއެވެ.
ހީނާ އިތުރަށް ވިދާޅުވީ، މިކަމުގެ ސަބަބުން އައްޑޫއާއި ކައިރީގައި އޮންނަ ފުވައްމުލަކާއި އެހެން ރަށްރަށުގައި ތިބި އެންސްޕާގެ މާލީ އެހީތެރިކަން ފޯރުކޮށްދޭ ފަރާތްތަކުގެ މައުލޫމާތުތައް އަޕްޑޭޓް ކުރެވިގެންދާނެ ކަމަށާއި، އެންސްޕާގެ ބެެފިޝަރީސްގެ ހިދުމަތްތައް ބަލާ މޮނީޓާ ކުރުން ހަރުދަނާ ނިޒާމެއްގެ ތެރެއިން ކުރިއަށް ގެންދިއުމަށް ވަރަށް ބޮޑަށް ފަސޭހަ ވެގެންދާނެ ކަމަށެވެ.
އައްޑޫގައި އެންސްޕާ އޮފީހެއް ހިންގުމާއި ގުޅޭ ގޮތުން އެ ސިޓީގެ ކައުންސިލާއި އެކު ބައްދަލުވުމެއް ބާއްވާފައިވާއިރު، ކުރިއަށް އޮތް ތަނުގައި މި މަސައްކަތް ކުރާނެ ތަނެއް ބޭނުންވާކަމަށް ވެސް ހީނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
