އިންޑިއާގެ މަނިޕާލް ހޮސްޕިޓަލުން ދޭ ފަރުވާތަކުގެ އަގު ބޮޑުވުމުގެ ސަބަބުން، އެ ހޮސްޕިޓަލަށް އާސަންދަ ދިނުން ވަގުތީ ގޮތުން މެދުކަނޑާލައިފިއެވެ.
ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ސީއީއޯ ހީނާ ވަލީދު ވިދާޅުވީ، އެ ހޮސްޕިޓަލްގެ އަގުތައް ބޮޑުކަމުން، އަގު ހެޔޮކުރުމުގެ މަޝްވަރާކުރަމުން އަންނާތީ، މިދިޔަ ހަފްތާގެ ހޯމަ ދުވަހުން ފެށިގެން އިންޑީއާގެ މަނިޕާލަށް އާސަންދައިގެ ހިދުމަތް ދިނުން މެދުކަނޑާލައިފައިވާ ކަމަށެވެ.
އެ ހޮސްޕިޓަލަށް އާސަންދައިން ކަނޑައަޅާފައިވާ ރޭޓްގެ އިތުރަށް ބަލި މީހުންގެ އަތުން ފައިސާ ނަގާ ކަމުގެ ޝަކުވާތައް ވަރަށް ގިނައިން ލިބޭކަން ފާހަގަކުރައްވަމުން ހީނާ ވިދާޅުވީ، މިފަދައިން ނިންމި ނަމަވެސް، މިހާރު ވެސް އެ ހޮސްޕިޓަލުން ހިދުމަތް ހޯދާ މީހުންނަށް ފަރުވާ ކުރިއަށް ގެންދެވޭނެ ކަމަށާއި، އާސަންދަ ނުލިބޭނީ އަލަށް ފަރުވާ ބޭނުންވާ މީހުންނަށް ކަމަށެވެ.
"މަނިޕާލަށް ފޮލޯއަޕް ކޭސްތަކަށް ދާ މީހުންނަށް މިހާރު ވެސް އާސަންދަ ލިބޭނެ. އާ ކޭހަކަށް ނުފޮނުވާނެ."
ހީނާ ވިދާޅުވިއެވެ.
ބޭރުގެ 57 ހޮސްޕިޓަލެއް އާސަންދައިގައި އެމްޕެނަލް ވެފައިވާއިރު، އޭގެ ތެރެއިން، 49 ހޮސްޕިޓަލަކީ އިންޑިއާގެ ތަންތަނެވެ.
Advertisement
This content is created and paid for by advertisers and does not involve Voice Journalists
