ކުއްޖާގެ ފުރަތަމަ 1000 ދުވަހަށް އަމާޒުކޮށްގެން ތައްޔާރު ކުރެވިފައިވާ "ތުއްތު ދަރިފުޅުގެ "މިންހެޔޮ ކާނާ ފޮތް" ލޯންޗް ކޮށްފިއެވެ.

މި ފޮތް ލޯންޗްކޮށްދެއްވީ މިކަމަށްޓަކައި މިއަދު މިނިސްޓްރީގައި ބޭއްވި ރަސްމިއްޔާތެއްގައި މިނިސްޓަރ އޮފް ހެލްތު ޑޮކްޓަރ އަބުދުالله ޚަލީލް އެވެ. 

މި ރަސްމިއްޔާތުގައި ޔުނިސެފް އިން ރާއްޖެއަށް ކަނޑައަޅުއްވާފައިވާ ޑެޕިއުޓީ ރެޕްރެޒެންޓެޓިވް، އިސީ ފޭންގޯލްޑްއާއި، ކަމާގުޅުންހުރި ބައެއް ވުޒާރާތަކާއި ޞިއްޙީ ޚިދުމަތްތެރިންނާއި އަމިއްލަ ޖަމްޢިއްޔާތަކުގެ ބޭފުޅުންނާއި އަދިވެސް ގުޅުންހުރި އެހެނިހެން އިދާރާތަކުގެ ބޭފުޅުން މިރަސްމިއްޔާތުގައި ބައިވެރިވެ ވަޑައިގެންނެވިއެވެ.

ކުއްޖާގެ ފުރަތަމަ 1000ދުވަހަށް އަމާޒުކޮށްގެން ތައްޔާރު ކުރެވިފައިވާ "ތުއްތު ދަރިފުޅުގެ "މިންހެޔޮ ކާނާ ފޮތް" ލޯންޗްކުރުން: ފޮޓޯ/ މިނިސްޓްރީ

ތުއްތު ދަރިފުޅުގެ މިންހެޔޮ ކާނާ ފޮތަކީ ކުޑަކުދިންގެ ނިއުޓްރިޝަންގެ ޙާލަތު ރަނގަޅުކޮށް، ދުޅަހެޔޮ ޞިއްޙަތަކަށް މަގުފަހިކޮށްދިނުމުގެ ގޮތުން ކުއްޖާގެ ފުރަތަމަ 1000 ދުވަހަށް އަމާޒު ކޮށްގެން ހެލްތު ޕްރޮޓެކްޝަން އެޖެންސީ އާއި ޔުނިސެފް ގުޅިގެން އެކުލަވާލެވިފައިވާ "ސޯޝަލް އެންޑް ބިހޭވިއަރ ޗޭންޖް ކޮމިއުނިކޭޝަން ސްޓްރެޓަޖީ" ގެ ދަށުން ކުރެވޭ މުހިއްމު މަސައްކަތެކެވެ.

މިފޮތް "ތުއްތު ދަރިފުޅުގެ މިންހެޔޮ ކާނާ" ތައްޔާރު ކުރެވިފައި މިވަނީ ހެލްތު ޕްރޮޓެކްޝަން އޭޖެންސީ އާއި ޔުނިސެފް އަދި އެޑްވަކޭޓިންގ ދަ ރައިޓްސް އޮފް ޗިލްޑްރެން (އާކް) ގުޅިގެން ކަމަށް ހެލްތު މިނިސްޓްރީން ބުނެއެވެ. 

ކުއްޖާގެ ފުރަތަމަ 1000ދުވަހަށް އަމާޒުކޮށްގެން ތައްޔާރު ކުރެވިފައިވާ "ތުއްތު ދަރިފުޅުގެ "މިންހެޔޮ ކާނާ ފޮތް" ލޯންޗްކުރުން: ފޮޓޯ/ މިނިސްޓްރީ

ފޮތުގައި ހިމެނޭ ބައެއް މަޢުލޫމާތުތައް : 

o އަލަށް ކާންދޭ ފަށާއިރު ބަލަންވީ ކަންކަން.

o ތަފާތު ކާނާގެ ބާވަތްތަކާއި ލިބޭ ފައިދާ އަދި ކާންދިނުމުގައި އިތުރަށް ސަމާލުވާންވީ ކަންކަން.

o ކާނާ ރައްކާތެރި ކަމާއެކު ތައްޔާރުކޮށް ރައްކާ ކުރުން.

o ދަރިފުޅު ނުކާން އުޅުން ނުވަތަ ވަކި ކަހަލަ ކާނާ އެއް ނުކާން އުޅޭނަމަ ހަދާނެ ގޮތާއި ބަލިވެ އުޅޭ ދުވަސްވަރު ކާންދޭނެގޮތް

o މާބޮޑަށް ބަރުދަން ލުއިވެ ނުވަތަ މާ ބަރު ވަމުންދާނަމަ ކާންދިނުމުގައި ގެނެވިދާނެ ބަދަލުތައް.

ކުއްޖާގެ ފުރަތަމަ 1000ދުވަހަށް އަމާޒުކޮށްގެން ތައްޔާރު ކުރެވިފައިވާ "ތުއްތު ދަރިފުޅުގެ "މިންހެޔޮ ކާނާ ފޮތް" ލޯންޗްކުރުން: ފޮޓޯ/ މިނިސްޓްރީ

ހެލްތު މިނިސްޓްރީން ބުނެފައިވާ ގޮތުން، މިންހެޔޮ ކާނާ ފޮތުގެ އިތުރުން ކުޑަކުދިންގެ ނިއުޓްރިޝަން ހާލަތު ރަނގަޅު ކުރުމަށް، ކުއްޖާގެ ފުރަތަމަ 1000 ދުވަހަށް އަމާޒު ކޮށްގެން މާބަނޑު ދުވަސްވަރު ސަމާލުކަން ދޭންވީ ކަންކަމާއި ކުއްޖާގެ ކެއިން ބުއިމާއި އިޖުތިމާޢީ ހުނަރުތައް ތަރައްޤީ ކުރާނެ ގޮތާއި އެހެނިހެން މުހިއްމު މަޢުލޫމާތުތަކުގެ މައްޗައް ތައްޔާރު ކުރެވިފައިވާ ވީޑިއޯތަކުގެ އިތުރުން ސޯޝަލް މީޑިއާ އިންފޯރގްރަފިކްސް ވެސް ޢާއްމު ކުރެވޭނެއެވެ.

ކުޑަދަރިފުޅު ހެދިބޮޑުވުމަށް އެންމެ މުހިއްމު ދުވަސްވަރަކީ، ދަރިފުޅު މައިމީހާގެ ރަޙިމުގައި ގަރުބަގަތީއްސުރެ ޢުމުރުން ދެއަހަރު ވަންދެން ނުވަތަ ހަޔާތުގެ ފުރަތަމަ 1000 ދުވަހެވެ.

މި ދުވަސްވަރަކީ ކުއްޖާ ޖިސްމާނީ ގޮތުންނާއި ނަފުސާނީ ގޮތުން ހެދިބޮޑުވަމުން އަންނައިރު ހާއްސަ ގޮތެއްގައި ވަރަށް އަވަސް މިނެއްގައި ސިކުނޑި ތަރައްގީ ވަމުން އަންނަ ދުވަސް ވަރެކެވެ. މި 1000 ދުވަހުގެ ތެރޭގައި ކުޑަދަރިފުޅު ހެދިބޮޑުވުމަށް ބޭނުންވާ ފައިދާ ހުރި ކާނާއާއި ލޯތްބާއި އަޅާލުން އެންމެ އެކަށީގެންވާ ގޮތުގައި ނުދެވިއްޖެނަމަ ކުއްޖާ ހެދިބޮޑުވުމުގައި ތަފާތު ޞިއްޙީ މައްސަލަތަކާ ދިމާވެއެވެ.