މިހާރު އިދިކޮޅު މައި ޕާޓީ އަކީ އެމަނިކުފާނު އިސްވެ އުފެއްދެވިޕާޓީ، ޕީޕަލްސް ނެޝަނަލް ފްރޮންޓް، ޕީއެންއެފް ކަމަށް ކުރީގެ ރައީސް އަބްދުالله ޔާމީން އަބްދުލްޤައްޔޫމް ވިދާޅުވެއްޖެއެވެ. 

ރޭ ޕީއެންއެފްގެ ފްރަންޓް އޮފީހުގައި ބޭއްވުނު ޖަލްސާއެއްގައި ވާހަކަފުޅު ދައްކަވަމުން، ޔާމީން ވިދާޅުވީ، ޕީއެންއެފްގެ ޅަފަތުގައިވެސް، ޕާޓީ ފުޅާވެ، އިދިކޮޅު ޕާޓީ ކަމަށް ލޭބަލް ކުރެވިފައިވާ ކަމަށެވެ. 

ރޭގެ ޖަލްސާގެ ތެރެއިން: ފޮޓޯ/ ވޮއިސް

ޔާމީން ވިދާޅުވިގޮތުގައި، ރައްޔިތުންގެ ހައްގުތަކުގެ ވާހަކަ އެންމެ ގަދައަށް ދައްކާ ކަމަށް އެމްޑީޕީއިން ވަކާލާތު ކުރި ނަމަވެސް، ކޮންމެ ފަހަރަކު ވެސް ވެރިކަން ލިބުމުން ބަހާއި އަމަލާ ދިމާނުވާ ކަމަށެވެ.

އަދި އެމްޑީޕީން މިހާރު އެއްވެސް ކަމެއް ކުރާ ތަނެއް ފެނިވަޑައި ނުގަންނަވާ ކަމަށާ، އެންމެ ފަހުންވެސް ފެނި ވަޑައިގެންނެވީ ރައީސުލްޖުމްހޫރިއްޔާ، ރާއްޖޭގެ އިގްތިޞާދަށް ގެއްލުންވާ ކަންކަން ކުރެއްވުމުން ވެސް އެމްޑީޕީން އެއަށް ތާއީދު ކުރަމޭ ބުނިތަން ކަމަށް ޔާމިން ވިދާޅުވިއެވެ.

ރައީސް ޔާމީން މިހެން ވިދާޅުވެފައި ވާއިރު، އެމްޑީޕީން ދާދިފަހުން ވަނީ އިގުތިސާދު ރަނގަޅު ކުރުމަށް ސަރުކާރުން މަޖިލީހަށް ވައްދާ މައިގަނޑު ތިން ބިލަކަށް ތާއީދުކޮށް ވާހަކަދައްކާފައެވެ.