މިއަހަރުގެ މެއި މަހާއި އަޅާ ބަލާއިރު، މިދިޔަ ޖޫންމަހު ފުލުހުންނަށް ރިޕޯޓް ކުރި ވައްކަމާއި ފޭރުމުގެ މައްސަލަތައް މަދުކަމަށް ދިވެހި ފުލުހުންގެ ހިދުމަތުން އާއްމުކޮށްފިއެވެ.

ފުލުހުން އާންމުކޮށްފައިވާ ޖޫންމަހުގެ ތަފާސްހިސާބުތަކުން ދައްކާގޮތުން އެމަހުގެ ތެރޭގައި ވައްކަމުގެ 315 މައްސަލައާއި ފޭރުމުގެ 29 މައްސަލަ ވަނީ ހުށަހަޅާފައެވެ.

ނަމަވެސް މިއަހަރުގެ މެއި މަހު ފުލުހުންނަށް ވައްކަމުގެ 335 މައްސަލައާއި ފޭރުމުގެ 50 މައްސަލަ ހުށައަޅާފައިވާކަން ފުލުހުން ހާމަކޮށްފައިވާ ތަފާސް ހިސާބުތަކުން ހާމަވެއެވެ.

މިކަމާއި ގުޅިގެން އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ، މިދިޔަ ވައްކަމާއި ފޭރުމުގެ މައްސަލަތައް ހުށަހަޅާފައިވާ މިންވަރު ދަށްވުމަކީ ލިބުނު ހިތްވަރެއް ކަމަށެވެ. އެހެންނަމަވެސް، އެހެން ކުށްތަކުގެ ތަފާސްހިސާބުތަކަށް މާބޮޑު ބަދަލެއް އައިސްފައިނުވާކަން ޝިފާން ވަނީ ފާހަގަކުރައްވާފައެވެ.

ޖޫންމަހުގެ ތެރޭގައި ފުލުހުންނަށް ރިޕޯޓް ކުރި މައްސަލަތައް:

1) ވައްކަމާއި ފޭރުން - 344 މައްސަލަ

2) ޓްރެފިކް އެކްސިޑެންޓް - 212 މައްސަލަ

3) މަސްތުވާތަކެތި - 175 މައްސަލަ

4) މުދާ ގެއްލުން - 77 މައްސަލަ  

5)  މުދަލަށް ގެއްލުންދިނުން - 64 

ނިމިދިޔަ އަހަރު ފުލުހުން ހާމަކުރި ތަފާސްހިސާބުތަކަށް ބަލާއިރު، ވައްކަމުގެ 3818 މައްސަލައެއް ހުށަހަޅާފައިވާކަން ފާހަގަކޮށްލަން ޖެހެއެވެ.