ޣައްޒާގެ މުސްލިމުންނާއި ދެކޮޅަށް ޔަހޫދީން ކުރިއަށްގެންދާ އުދުވާން ހުއްޓާލުމާއި ގުޅޭ މަޝްވަރާތައް އަންނަ ހަފްތާގައި ފަށާނެ ކަމަށް އިސްރާއީލުގެ ހައްދުފަހަނައަޅާފައިވާ ބޮޑުވަޒީރު، ބެންޖަމިން ނަތަންޔާހޫ ބުނެފިއެވެ.

ނަތަންޔާހޫ ނެރުނު ބަޔާނެއްގައި ބުނީ، ގަތުލުއާއްމުގެ މަޝްވަރާތަކަށް އެގައުމުގެ ވަފުދެއް ފޮނުވާނެ ކަމަށެވެ.

މިމަޝްވަރާތަކަށް ނަތަންޔާހޫ ފޮނުވަން ނިންމި ޓީމާއި އަރިސް ފަރާތަކުން ބުނީ، މި މަޝްވަރާތަކުގެ ތެރެއިން ގަތުލުއާއްމު ހުއްޓާލުމާއި ގުޅޭ އެއްބަސް ވުމަކަށް އާދެވިދާނެ ކަމުގެ ޔަގީންކަން މިފަހަރު އެބަ އޮތް ކަމަށެވެ.

Advertisement

މިކަމާއި ގުޅޭ ގޮތުން ހަމާސްގެ ތަރުޖަމާނު ޖިހާދް ތާހާ ވިދާޅުވީ، ޣައްޒާގައި ހަނގުރާމަ ހުއްޓުވުމަށް އެމެރިކާއިން އެންމެ ފަހުން ހުށަހެޅި ޕްލޭނަށް ހަމާސުން ހުށަހެޅި އިސްލާހުތަކަށް ރަނގަޅު ރައްދެއް ލިބިފައިވީނަމަވެސް، މިކަމާއި މެދު އިސްރާއީލުން ދެކޭގޮތް އަދިވެސް ސާފު ނުވާ ކަމަށެވެ.

ހަމާސް އާއި އިސްރާއީލާއި ދެމެދު ކުރިއަށްދާ މަޝްވަރާތަކަށް އަދި ތާރީޚެއް ކަނޑައަޅާފައި ނުވާ ކަމަށްވެސް ޖިހާދް ތާހާ ވިދާޅުވިއެވެ

މީގެ ކުރިންވެސް ހަނގުރާމަ ހުއްޓާލުމަށް ހަމާސް އިން އެއްބަސްވާނެ ކަމަށް ބުނި ނަމަވެސް އަނިޔާވެރި ޔަހޫދީން ބުނަނީ ހަމާސް ނައްތާލުމުގެ ކުރިން ހަނގުރާމަ ނުހުއްޓާނެ ކަމަށެވެ. އެހެންނަމަވެސް، ދެ ފަރާތުން ދިން މި ސިގްނަލާއިއެކު، މިއީ ޣައްޒާގެ ގަތުލުއާއްމު ހުއްޓުމަށް އެމެރިކާ އާއި، ގަތަރާއި މިސްރުން ކުރަމުން އަންނަ މަސައްކަތްތަކަށް ލިބޭ ކުރިއެރުމެއްކަމަށް ގިނަ ބަޔަކު އަންނަނީ ސިފަ ކުރަމުންނެވެ.