އިންޑިއާގައި ޖުލައި މަހު 10-14 އަށް ބާއްވާ އައިއެޗްއެފް ޓްރޮފީގައި ވާދަކުރާ ރާއްޖޭގެ ގައުމީ ހޭންޑްބޯލް ޒުވާން ޓީމާތަކާއި ޖާޒީ ހަވާލުކޮށްފި އެވެ.

ސޯޝަލް ސެންޓަރުގައި މިއަދު ހެނދުނު ބޭއްވުނު ރަސްމިއްޔާތެއްގައި ގައުމީ ޓީމުތަކުގެ ކުޅުންތެރިންނާ ޖާޒީ ހަވާލުކޮށްދެއްވީ ކުޅިވަރާބެހޭ ވަޒީރު އަބްދުالله ރާފިއު އެވެ.

ޖާޒީ ހަވާލުކޮށްދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ރާފިއު ވިދާޅުވީ, މެޑަލާއި ވަނަތައް ހޯދުމަށް އެތުލީޓުންނަކީ އަހުލާގު ރަނގަޅު ބަޔަކަށް ވާންޖެހޭނެ ކަމަށެވެ. އެގޮތުން, ކޯޗުންގެ އިރުޝާދުތައް އަޑުއަހައި, ގަޑިއަށް ސަމާލުކަންދިނުން ފަދަ އެތުލީޓުގެން ގައިގައި ހުންނަން ޖެހޭ ކަންކަން ފުރިހަމަވާ ބަޔަކަށް ވާންޖެހޭނެ ކަމަށް ވަޒީރު ވިދާޅުވި އެވެ.

ރާފިއު އިތުރަށް ވިދާޅުވީ, ގައުމީ ޓީމު ޖާޒީގެ މޭމަތީގައި ޖަހާފައިވާ ގައުމީ ދިދައަށް އިހުތިރާމްކޮށް, އެންމެން އެއް އަޒުމެއްގައި ވާދަވެރިޓީމުތައް ބަލިކޮށް މުބާރާތުގައި ކާމިޔާބު ހޯދުމަށް އަޒުމް ކަނޑައަޅަންޖެހޭކަމަށެވެ.

މި ރަސްމިއްޔާތުގައި ވާހަކަފުޅު ދައްކަވަމުން ހޭޑްބޯލް މޯލްޑިވްސްގެ ރައީސް އަހުމަދު މުޖްތަބާ ވިދާޅުވީ, އައިއެޗްއެފް ޓްރޮފީއަށް ހޭންޑްބޯލް ޓީމް މިފަހަރު ދަނީ މެޑަލެއް ހޯދުމުގެ އުއްމީދުގައި ކަމަށެވެ. އަދި މިއަހަރުގެ މުބާރާތާއެކު އަންނަ އަހަރުގެ މުބާރާތުގެ ތައްޔާރީތައްވެސް މިހާރު ފަށާފައިވާ ކަމަށް މުޖްތަބާ ފާހަގަކުރެއްވި އެވެ.

ޖުލައި މަހު 10-14 އަށް އިންޑިއާގައި ކުރިއަށްދާ މި މުބާރާތުގައި 20 އަހަރުން ދަށުގެ ގައުމީ ފިރިހެން ޓީމާއި, 18 އަހަރުން ދަށުގެ ގައުމީ ފިރިހެން ޓީމް ވާދަކުރާނެއެވެ. މި މުބާރާތުގައި ވާދަކުރުމަށް ގައުމީޓީމް އިންޑިއާއަށް ފުރުމަށް ހަމަޖެހިފައިވަނީ މިމަހުގެ 8ވަނަ ދުވަހު އެވެ.