ވަރަށް ފަސޭހައިން ގައިން ގަޔަށް އަރާ ބަޔެއް ކަމަށްވާ އޫރު ރޯގާ، ނުވަތަ އެފްރިކަން ސްވައިން ފީވަރ އިންޑިއާގެ ކެރެލާގެ ތްރިސޫރުގައި ފެތުރެންފަށައިފިއެވެ.
ކޭރަލާގެ ތުރިއްސޫރު ސަރަޙައްދުގެ ރަށެއްގައި ހުރި ފާމެއްގައި އޫރު ބަލި ފެތުރިފައިވާކަން އެގައުމުގެ އޮފިޝަލުން ވަނީ ކަށަރުކޮށްދީފައެވެ.
ތުރިއްސޫރު ސަރަޙައްދުގެ މަދައްކަތާރާ ޕަންޗާޔަތުގައި ހުރި އަމިއްލަ މީހެއްގެ ފާމެއްގައި ގެންގުޅޭ 310 އޫރަކުން މި ބަލި ފެނިފައިވާ ކަމަށާއި، އެ އޫރުތައް މަރާލައި ވަޅުލުމަށް ސަރަޙައްދުގެ އެނިމަލް ހަސްބަންޑްރީ އޮފިސަރަށް އަންގާފައިވާ ކަމަށް ވެސް ކަމާ ބެހޭ ފަރާތްތަކުން ބުނެއެވެ.
މި އޫރުތައް ފެނުނު ފާމާއި 1 ކިލޯމީޓަރުގެ ސަރަޙައްދު އާއްމުންނަށް ބަންދުކޮށްފައިވާއިރު، މި ފާމުން ފެށިގެން 10 ކިލޯމީޓަރުގެ ސަރަޙައްދަކީ ބަލީގެ އިތުރު ވޭދަނަ ތަކެއް ފެނިދާނެ ސަރަހައްދުތަކެއް ކަމަށް އެގައުމުން ވަނީ ކަނޑައަޅާފައެވެ.
ޓްރިވެންޑްރަމާއި 277 ކިލޯމީޓަރު ދުރުގަައި އޮންނަ ޑިސްޓްރިކްޓުން ފެނުނު މި ބައްޔަކީ އޫރުތަކުގެ ޒަރީއާއިން އެހެން ޖަނަވާރުތަކުގެ ގަޔަށް ވަރަށް ފަސޭހައިން އަރާ ބައްޔެއް ނަމަވެސް، މި ބަލި އިންސާނުންގެ ތެރޭގައި ފެތުރުމުގެ ފުރުސަތު ކުޑައެވެ. އެހެންނަމަވެސް، އިންސާނުންގެ ގައިން މި ބަލީގެ ކޭސްތަކެއް މީގެ ކުރިން ވަނީ ފެނިފައެވެ.
Advertisement
This content is created and paid for by advertisers and does not involve Voice Journalists
