ހިޖުރީ އައު އަހަރާއިއެކު، މާތްވެގެންވާ ގެފުޅުގެ އުރަކޮޅު ނުވަތަ ކިސްވާ ބަދަލުކޮށްފިއެވެ.

ސަޢުދީ ޕްރެސް އޭޖެންސީ ރިޕޯޓްކުރާ ގޮތުން، ހިޖުރީ އައު އަހަރުގެ ފުރަތަމަ ދުވަސް ކަމަށްވާ 1 މުޙައްރަމް، 1446 ގެ ފަތިހުގެ ވަގުތެއްގައި މި މަސައްކަތް ކޮށްފައިވަނީ މަސްޖިދުލް ޙަރަމާއި މަސްޖިދުއް ނަބަވީގެ ކަންތައްތަކާ ބެހޭ ޢާންމު ރިޔާސަތުންނެެވެ.

ކިސްވާ ތައްޔާރުކޮށްފައިވަނީ ކިންގް ޢަބްދުލް ޢަޒީޒް ކޮމްޕްލެކްސް ފޮރ ދަ ކިސްވާ އޮފް ދަ ކަޢުބާގެ ޓީމަކުންނެވެ. މި ޓީމުގައި ހިމެނޭ ހުނަރުވެރި 159 މީހުންނާއި 200 މަސައްކަތު މީހުން ގެފުޅުގެ އުރަކޮޅު ބަދަލުކުރީ، އިންޖިނިއަރުންނާއި ޓެކްނީޝަނުންގެ  އިތުރުން، އެކަމަށް ޚާއްޞަކޮށް ތަމްރީނު ދެވިފައިވާ މީހުންގެ ބެލުމުގެ ދަށުންނެވެ.

Advertisement

އެސްޕީއޭ އިން ރިޕޯޓްކުރާ ގޮތުގައި، މަސްޖިދުލް ޙަރަމަށް އައު ކިސްވާ ގެނައުމުގެ މަސައްކަތް ކުރަމުން ދިޔައިރު، އެ މަސައްކަތުގައި ހިމެނޭ ޓީމަކުން ވަނީ ކަޢުބާގެ ކުރީގެ ކިސްވާގެ ރަން ފޮތިކޮޅުތައް ނަގާފައެވެ.

ރަނާއި ރިހީގެ ރޮދިން ވިޔެގެން ލިޔާ ކީރިތި ޤުރްއަނުގެ އާޔަތްތަކާއެކު އެންމެ މޮޅު ފަށުވިން ތައްޔާރުކުރާ ކިސްވާ އުފެއްދުމަށް ޖުމްލަ 120 ކިލޯގްރާމްގެ ރަނާއި، 100 ކިލޯގްރާމްގެ ރިހި އަދި 670 ކިލޯގްރާމްގެ ފަށުވި ބޭނުންކުރެވެއެވެ. 

ކީރިތި ޤުރުއާން ގެ އާޔަތްތައް ކިސްވާގައި ވިޔަނީ-- ފޮޓޯ: ދަ އިސްލާމިކް އިންފޮމޭޝަން

މި އަހަރު ގެފުޅަށް ފަރުމާކުރެވުނު ކިސްވާގައި 1,300 ކިލޯ ހުންނައިރު، ބަރުދަނަށް ބަދަލުއައިސްފައިވަނީ ބޭނުންކޮށްފައިވާ މޮޅެތި ތަކެއްޗާއި، ފޮތީގައި ޒީނަތްތެރިކޮށްފައިވާ ބަރު އަދި ތަފްޞީލީ ވިޔުމުގެ ސަބަބުންނެވެ. 

ގެފުޅުގެ ކިސްވާގައި ރަނުން ފަހާފައިވާ 53 ފޮތިކޮޅު އެކުލެވެއެވެ. އެއީ ބެލްޓު ސަރަޙައްދަށް 16 ފޮތިކޮޅު، ބެލްޓުގެ ދަށަށް 7 ފޮތިކޮޅު، 4 ކަނުގެ ފޮތިކޮޅު، 17 ފާނޫސް، ދޮރުގެ ފަރުދާއަށް 5 ފޮތިކޮޅު، އަލްރުކްނުލް ޔަމާނީއަށް އެއް ފޮތިކޮޅު، އަދި ޙަޖަރުލް އަސްވަދުގެ އައުޓްލައިންއަށް 2 ފޮތިކޮޅާއިއެކު، ދިޔަދޮވިކޮޅު ވެސް ހިމެނެއެވެ.

އުސްމިނުގައި 14 މީޓަރު ހުންނަ މި ކިސްވާ އުފެއްދުމަށް 20 މިލިއަނަށް ވުރެ ގިނަ ރިޔާލު ސައުދީ ސަރުކާރުން ހަރަދުކުރާއިރު، މީގެ ކުރިން ކިސްވާ ބަދަލުކުރަމުން އައިސްފައިވަނީ ހައްޖު ދުވަހުގައެވެ. ނަމަވެސް މިދިޔަ އަހަރުން ފެށިގެން ސައުދީ ސަރުކާރުން ނިންމީ ކޮންމެ ހިޖުރީ އައު އަހަރަކާއި ގުޅުވައިގެން ގެފުޅުގެ ކިސްވާ ބަދަލު ކުރުމަށެވެ.