ކައުންސިލްތަކާއި މަޖިލިސް މެންބަރުންގެ އަދަދު މަދުކުރުމުގެ ކުރިން ރައްޔިތުންގެ ޚިޔާލާއި މަޝްވަރާ ފުޅާ ދާއިރާއެއްގައި ހޯދަންޖެހޭ ކަމަށް ކުރީގެ އިކޮނަމިކް މިނިސްޓަރ އަދި އެމްޑީޕީގެ ޗެއަރޕާސަން ފައްޔާޒު ޢިސްމާޢިލް ވިދާޅުވެއްޖެއެވެ.
ރޭ ބޭއްވި ޕީއެންސީ ހަރުގެ ޖަލްސާގައި ވާހަކަ ދައްކަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކައުންސިލްތަކާއި މަޖިލިސް މެންބަރުންގެ އަދަދު ކުޑަކުރައްވާނެ ކަމަށް ވިދާޅުވެފައެވެ.
އެކަމާއި ގުޅިގެން އެކްސް ގައި ކުރެއްވި ޕޯސްޓެއްގައި ފައްޔާޒު ވިދާޅުވީ ސިސްޓަމަށް ބަދަލުތަކެއް އަންނަން ޖެހޭ ކަމަށާއި، ނަމަވެސް މިފަދަ ބަދަލުތައް ގެނައުމުގެ ކުރިން ރައްޔިތުންގެ ޚިޔާލު ހޯދުން މުހިންމު ކަމަށެވެ. އަދި މިހާރުން މިހާރަށް ކުރެވެން ހުރި ކަންކަން ކުރުމަށް އިސްކަން ދޭންޖެހޭ ކަމަށްވެސް އޭނާ ފާހަގަކުރެއްވިއެވެ.
މީގެއިތުރުން، ފައްޔާޒު ވިދާޅުވީ ސަރުކާރުން ވިޔަފާރިތަކާއި ކިޔަވަން ބޭރުގައި ތިބި ދަރިވަރުންނަށް ދޭންޖެހޭ ފައިސާ ދޭނެ ގޮތެއްގެ ވާހަކަ ހާމަކުރަން ޖެހޭ ކަމަށެވެ. އަދި ސިޔާސީ މުވައްޒަފުންގެ އަދަދާއި، ރަށްރަށުގެ ކައުންސިލަރުން މަދުކުރުމުގެ ކުރިން ސިޔާސީ މުވައްޒަފުން ވަޢުދާ އެއްގޮތަށް މަދުކުރާކަން ހާމަކުރަންޖެހޭ ކަމަށްވެސް އޭނާ ވިދާޅުވިއެވެ.
މާލިއްޔަތު ރަނގަޅު ކަމަށް ވަޒީރުން ވިދާޅުވާއިރު އާންމު ރައްޔިތުން ހިތި ބޭސް ބޯންޖެހޭ ވާހަކަ ދެއްކީމައި މާލިއްޔަތު އަދި އިގްތިސާދު ރަނގަޅަށް އޮތަސް ރައްޔިތުން އަދި އިންވެސްޓަރުންނާއި ފައިނޭންސަރުންގެ އިތުބާރު ގެއްލި ނުބައި ދިމާލަކަށް ގޮސްދާނެ. ގެންނަށް ހުށަހަޅާފައި ހުރި ބަދަލުތަކުގައި އިހްލާސްތެރިކަމެއް ހުރިކަމަކަށް ނުފެނޭ
ފައްޔާޒު އިސްމާޢީލް
ފައްޔާޒު އިތުރަށް ވިދާޅުވީ، އެމްޑީޕީއިން ރައްޔިތުން ބަލައިގަންނާނެ ހަރުދަނާ ބަދަލުތަކަކަށް މަރުޙަބާ ކިޔާނެ ކަމަށާއި، ނަމަވެސް މާލީ ހާލަތު 'ވާނުވާ' ގައި ބާއްވައިގެން ޤައުމަށް ލިބޭނެ އެއްވެސް ކުރިއެރުމެއް ނެތް ކަމަށެވެ. އަދި ގެންނަން ހުށަހަޅާފައި ހުރި ބަދަލުތަކުގައި އިޚްލާޞްތެރިކަމެއް ހުރިކަމަކަށް ނުފެންނަ ކަމަށްވެސް އޭނާ ފާހަގަކުރެއްވިއެވެ.
ރޭގެ ޖަލްސާގައި ވާހަކަ ދައްކަވަމުން ރައީސް މުޢިއްޒު ވަނީ، ދައުލަތުގެ ޚަރަދު ކުޑަ ކުރުމަށް، ގައުމަށް ކަތާވަރަށް ގައުމުގެ ނިޒާމު ބައްޓަންކުރާން ޖެހޭ ކަމަށް ވިދާޅުވެފައެވެ.
އެގޮތުން، ރައީސް މުޢިއްޒު ވިދާޅުވީ، އެމަނިކުފާނަށް ފެނިވަޑައިގަންނަވާ ގޮތުގައި މަޖިލިސް މެންބަރުންގެ އަދަދުގެ ގޮތުގައި އެންމެ ރަނގަޅު އަދަދަކީ 77 ކަމަށެވެ. ހަމައެހެންމެ، ކުދިކުދި ރަށްތަކުގައި ކައުންސިލަރުންގެ ގޮތުގައި ރައީސްއަކާއި ނައިބު ރައީސުން ތިބުމުން ފުދޭނެ ކަމަށާ އާބާދީ ބޮޑެތި ރަށްތަކަށް އެއަށްވުރެ ގިނަ ކައުންސިލަރުން އިންތިހާބު ކުރުން އެންމެ ރަނގަޅު ކަމަށެވެ. އަދި އަތޮޅު ކައުންސިލްތައް މިހާރު އޮތް ގޮތް ބަދަލު ކުރަން ޖެހޭ ކަމަށް ވެސް ރައީސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
