ގަވާއިދާ ހިލާފަށް ވިޔަފާރި ކުރަމުންދިޔަ 6 ބިދޭސީން މޯލްޑިވްސް އިމިގްރޭޝަނުން ހައްޔަރުކޮށްފިއެވެ.

އިމިގްރޭޝަނުން ބުނީ، ގަވާއިދާ ހިލާފަށް ބިދޭސީން ހިންގަމުންދާ ކުދި އަދި މެދުފަންތީގެ ވިޔަފާރިތަކަށް ހާއްސަކޮށް ކުރިއަށްގެންދާ ރެއިޑް އޮޕަރޭޝަންތަކުގެ ތެރެއިން ރޭގައި މާލެ ސަރަހައްދުގައި ހިންގަމުންދާ ދެ މާރުކޭޓެއް ބަލައި ފާސްކޮށްފައިވާ ކަމަށެވެ.

މި އޮޕަރޭޝަންގައި 4 ބިދޭސީ ފިރިހެނަކާއި 2 ބިދޭސީ އަންހެނަކު އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށް އެ އިދާރާއިން މައުލޫމާތުދެއެވެ.

އިމިގްރޭޝަނުން އިތުރަށް ބުނީ، މިފަދަ އޮޕަރޭޝަންތައް ކުރިއަށް އޮތްތަނުގައި ވެސް ހުއްޓުމެއްނެތި ކުރިއަށް ގެންދިއުމަށް ހަމަޖެހިފައިވާ ކަމަށެވެ.

ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދަން އިއްޔެ ހިންގި އޮޕަރޭޝަންގައި އަމިއްލަ ވިޔަފާރި ކުރާ ބިދޭސީން ފެނިފައިވާ ކަމަށާއި އެ އެންމެން ވެސް ޑީޕޯޓްކޮށްލާނެ ކަމަށް އިމިގްރޭޝަން ކޮންޓްރޯލަރު މުހައްމަދު ޝަމްއާން ވަނީ މީގެ ކުރިން ވިދާޅުވެފައެވެ.

ޝަމްއާން ވިދާޅުވީ، ގަވައިދާ ހިލާފަށް ވިޔަފާރި ކުރާ ބިދޭސީން ހޯދުމަށް އިމިގްރޭޝަނާއި، ފުލުހުން ގުޅިގެން ހިންގާ އޮޕަރޭޝަނުގެ ތެރެއިން، ގިނަ އަދަދެއްގެ ބިދޭސީން އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށާއި، މި މީހުންގެ ތެރޭގައި ސައްހަ ހުއްދައެއް ނެތި އަދި ހުއްދަ ދޫކުރެވިފައިވާ މަސައްކަތުގެ ބޭރުން އަމިއްލައަށް ވިޔަފާރި ކުރާ މީހުން ދެނެގަނެވިފައިވާއިރު، އުސޫލުގެ ތެރެއިން މި ފަރާތްތައް ރާއްޖެއިން ޑީޕޯރޓްކޮށް ފޮނުވާލެވޭނެކަމަށެވެ.

އެގޮތުން މިހާތަނަށް މި އޮޕަރޭޝަނުގެ ތެރެއިން ގަވާއިދާއި ހިލާފަށް ޑޮލަރުގެ ވިަޔފާރި ކުރާ 2 ބިދޭސީ އަކާއި ގަވާއިދާ ޚިލާފަށް ޓޭކްއަވޭ ކޮފީޝޮޕް ހިންގަމުންދިޔަކަމަށް ތުހުމަތުކުރެވޭ 8 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެސްފައެވެ.

ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރަން އިމިގްރޭޝަނުން އިސްނަގައިގެން ކުރިއަށް ގެންދާ އޮޕަރޭޝަންގެ ތެރެއިން މިހާތަނަށް 1،800 އަށްވުރެ ގިނަ ބިދޭސީން ވަނީ ޑީޕޯޓުކޮށްލައިފައެވެ. އޭގެ އިތުރުން ވެސް 100 އަށްވުރެ ގިނަ މީހުން މި ފަހުން ވެސް ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.