ޓައިޓޭނިކާއި އަވަޓަރ ފަދަ ކާމިޔާބު އެތައް ފިލްމެއް ޕްރޮޑިއުސް ކުރި ޖޯން ލަންޑައު މަރުވެއްޖެއެވެ.

އަހަރަކަށް ވުރެ ގިނަ ދުވަސްވަންދެން ކެންސަރާއި ހަނގުރާމަ ކުރުމަށްފަހު މިދިޔަ ހުކުރު ދުވަހު ލަންޑައު މަރުވިއިރު، އޭނާގެ އުމުރަކީ 63 އަހަރެވެ.

ލަންޑައު މަރުވިކަން ކަށަވަރުކޮށްދެމުން އޭނާގެ ކޮއްކޮ ޓީނާ ލަންޑައު ބުނީ، މިއީ ލިބުނު ވަރަށް ބޮޑު ހިތާމަ އެއް ކަމަށާއި އެއީ ކޮއްކޮއަކަށް ލިބޭނެ އެންމެ ރަނގަޅު ބޭބެކަމަށެވެ. ޓީނާ ސޯޝަލް މީޑިއާއަށް ދޫކޮށްލި މެސެޖްގައި އިތުރަށް ބުނީ،  އޭނާ ދަންނަ އަދި އޭނާގެ ފިލްމުތައް ބަލާ އެންމެންނަށް ދިން ލޯތްބާއި ހަދިޔާތަކަށްޓަކައި ފަޚުރުވެރިވެ، ޝުކުރުވެރިވާ ކަމަށެވެ.

ލަންޑައު އަކީ ހޮލީވުޑްގެ ފިލްމް ޕްރޮޑިއުސަރުންކަމުގައިވާ އެލީ އަދި އީޑީ ލަންޑައުގެ ދަރިފުޅެވެ.

ފިލްމު ޕްރޮޑަކްޝަން ކުންފުނި 20 ސެންޗަރީ ފޮކްސްގެ އެގްޒެކެޓިވްއެއްގެ މަގާމު އަދާކުރި ލަންޑައު ޕްރޮޑިއުސް ކުރި ފިލްމުތަކުގެ ތެރޭގައި "ދަ ލާސްޓް އޮފް ދަ މޮހިކަންސް" އަދި "ޑައި ހާޑް 2" ހިމެނެއެވެ.

ހަމައެއާއިއެކު، ކެނެޑާގެ ފިލްމްމޭކަރ އެއް ކަމަށްވާ ޖޭމްސް ކެމަރޮންއާ އެކު، އޭނާ 1997 ވަނަ އަހަރުގެ ހިޓް ފިލްމު "ޓައިޓެނިކް" އުފެއްދިއިރު، މިއީ ދުނިޔޭގެ ބޮކްސް އޮފީހުގައި 1 ބިލިއަން ޑޮލަރު ހޯދި ފުރަތަމަ ފިލްމެވެ.

އޭގެ ފަހުން،ލަންޑައު 2009 ވަނަ އަހަރު ޕްރޮޑިއުސް ކުރި "އެވަޓާ" އާއި 2022 ވަނަ އަހަރު ޕްރޮޑިއުސްކުރިއެވަޓާ: ދަ ވޭ އޮފް ވޯޓަރ"، ވަނީ ޓައިޓެނިކްގެ ރެކޯޑު މުގުރާލާފައެވެ.

ލަންޑައުއަކީ 2025 ވަނަ ނެރުމަށް ފަސްކުރި އަވަޓަރ ގެ ތިން ވަނަ ފިލްމް ގެ ވެސް ޕްރޮޑިއުސަރެއްކަން ފާހަގަކޮށްލަން ޖެހެއެވެ.

ކާމިޔާބު އެތައް ފިލްމެއް ޕްރޮޑިއުސް ކުރި ލަންޑައުގެ މަރާއިއެކު، އެ އިންޑަސްޓްރީގައި މަސައްކަތް ކުރަމުން އަންނަ ގިނަ ފަރާތްތަކެއް ވަނީ އެކަމުގެ ހިތާމަ ފާޅުކޮށްފައެވެ.