މާލޭގައި މީހަކު ހިފަހައްޓާ ފޭރެން އުޅުނު މައްސަލައެއްގައި މީހަކު ހައްޔަރުކޮށްފިއެވެ.

ހައްޔަރު ކުރެވުނު މީހާގެ ބަންދު އަމުރުގައިވާ ގޮތުން އެއީ އުމުރުން 31 އަހަރުގެ މާލެއަށް ނިސްބަތްވާ ފިރިހެނެކެވެ. އަދި އޭނާގެ މައްޗަށް ތުހުމަތު ކުރެވެނީ ހުއްދަ ނޫން ގޮތެއްގައި މީހުން ހިފެހެއްޓުމާއި، ފޭރުމާއި، ބިރުދެއްކުމުގެ އިތުރުން، އޮރިޔާންކާޑު އުފެއްދުމެެވެ.

މި މީހާގެ މައްޗަށް ތުހުމަތު ކުރެވޭ ކުށް އޭނާ ކުރިކަމަށް ތުހުމަތު ކުރެވޭ މިންވަރަށް ހެކި ގަރީނާ ހުށަހަޅާފައިވާ ކަމަށް ބަންދު އަމުރުގައި ފާހަގަކޮށްފައިވެއެވެ.

Advertisement

އެގޮތުން ފުލުހުން ހުށަހެޅި ސީސީޓީވީ ފޫޓޭޖުން އެނގޭ ގޮތުން، އެމީހާގެ ފަރާތުން އަނިޔާ ލިބުނު މީހާ ފާހަގަކުރި ގަޑިތަކުގައި އޭނާ އެ ސަރަހައްދުގައި ހަރަކާތްތެރިވެފައިވާ ކަން މައްސަލަ ބަލާ ފުލުސް މީހާ ބުނެފައި ވާ ކަމަށް އަމުރުގައިވެއެވެ. އަދި އެ ކުށް ކުރި މީހާ އެކަން ކޮށްފައިވަނީ ދުރާލާ ރާވައިގެންކަމަށްވާއިރު، އޭނާއަކީ މިފަދަ މައްސަލަތަކުގެ ރެކޯޑް އޮންނަ މީހެއްކަންވެސް ފާހަގަކޮށްފައިވެއެވެ. 

މުޖުތަމައުގެ ސަލާމަތާއި ރައްކާތެރިކަމަށް އޭނާގެ ބަންދަށް ކްރިމިނަލް ކޯޓުން ވަނީ 15 ދުވަސް ޖަހާފައެވެ.