ފަލަސްތީނުގެ މުސްލިމު އަޚުންނާއި އުޚުތުންނަށް އެހީވުމަށް ރާއްޖެއިން 1.29 މިލިއަން އަށްވުރެ ގިނަ ޑޮލަރު ހަދިޔާކުރަން ހަމަޖެހިއްޖެއެވެ.

ޚާރިޖީ ވުޒާރާއިން ނެރުނު ބަޔާނެއްގައި ބުނީ، އދގެ މައި އޮފީހުގައި މިއަދު ބޭއްވުނު ޔޫއެންއާރްޑަބްލިޔޫއޭ ގެ ޕްލެޖިންގ ކޮންފަރެންސްގައި ދިވެހިރާއްޖެއިން 1.29 މިލިއަން އެމެރިކާ ޑޮލަރަށްވުރެ ގިނަ އަދަދެއް ފަލަސްޠީނަށް އެހީގެ ގޮތުގައި ދޭނެކަމަށް އިޢުލާނުކޮށްފައިވާ ކަމަށެވެ.

މިކަން ހާމަކޮށްފައިމިވަނީ ދިވެހިރާއްޖެއިން އދ އަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ޢަލީ ނަޞީރު މުޙައްމަދު ދެއްވި ބަޔާނެއްގައެވެ. ރާއްޖޭން މި އެހީ ހަދިޔާކުރުމަށް ހަމަޖެހިފައިވަނީ ޔޫއެންއާރްޑަބްލިޔޫއޭ މެދުވެރިކޮށެވެ.

Advertisement

ޑރ. ޢަލީ ނަޞީރު މުޙައްމަދު ދެއްވި ބަޔާނުގައި އެބޭފުޅާ ވިދާޅުވީ، ދިވެހި ސަރުކާރުން ކޮންމެ އަހަރަކުވެސް ޔޫއެންއާރްޑަބްލިޔޫއޭއަށް ދޭ އެހީ 5،000 ޑޮލަރުން 50،000 ޑޮލަރަށް އިތުރުކުރަން ނިންމާފައިވާކަމަށެވެ.

ރައީސް ޑރ. މުޢިއްޒުގެ އިރުޝާދުގެ ދަށުން، ފަލަސްޠީނުގެ ރައްޔިތުންނާއިއެކު ދިވެހިން ތިބިކަން ހާމަކޮށްދިނުމަށްޓަކައި ގައުމީ ފެންވަރުގައި ބޭއްވި "ފަލަސްތީނާއިއެކު ދިވެހިން" ޓެލެތޯނުން އާންމު ރައްޔިތުންގެ ފަރާތުން 18.4 މިލިއަން ދިވެހި ރުފިޔާ އާއި 49،800 އެމެރިކާ ޑޮލަރު އެއްކުރެވި، މި ފައިސާ ޔޫއެންއާރްޑަބްލިޔޫއޭ މެދުވެރިކޮށް ފަލަސްޠީނުގެ ރައްޔިތުންނަށް ހަދިޔާކުރެވޭނެ ކަމަށް ވެސް ޑރ. ޢަލީ ނަޞީރު މުޙައްމަދު ވިދާޅުވިއެވެ.

މި ކޮންފަރެންސްގެ ތެރެއިން، ޑރ. ޢަލީ ނަޞީރު މުޙައްމަދު ވަނީ ޣައްޒާގައި އިންސާނީ ހާލަތު ވަރަށް ނާޒުކުވެފައިވާ ދަނޑިވަޅެއްގައި، ފަލަސްޠީނުގެ ރައްޔިތުންނަށް މުހިންމު ޚިދުމަތްތަކާއި ކުއްލި އެހީތެރިކަން ފޯރުކޮށްދިނުމުގައި ޔޫއެންއާރްޑަބްލިޔޫއޭ އަދާކުރާ މުހިންމު ދައުރު ފާހަގަކުރައްވައި، މި މަސައްކަތްތައް އިތުރަށް ކުރިއަށް ގެންދިއުމަށް  ޔޫއެންއާރްޑަބްލިޔޫއޭއަށް ބައިނަލްއަޤްވާމީ މުޖުތަމަޢުން އަދާކުރަންޖެހޭ މާލީ އަދި ސިޔާސީ ޒިންމާތައް އަދާކުރުމަށް ގޮވާލައްވާފައެވެ.