ޣައްޒާގައި ޔަހޫދީން ހިންގަމުންދާ ގަތުލުއާއްމުގައި ޝަހީދުކޮށްލި 60 އަށްވުރެ ގިނަ މީހުންގެ ހަށިތައް ޣައްޒާގެ ބައެއް ސަރަހައްދުތަކުން ފެނިއްޖެއެވެ.

މިގޮތުން، ޣައްޒާގެ ތަލް އަލް-ހަވާ ސަރަޙައްދުން ގިނަ އަދަދެއްގެ ޝަހީދުންގެ ހަށިތައް ފެނިފައިވާކަމަށް ޣައްޒާގައި މަސައްކަތްކުރާ އެހީތެރިން ވަނީ ބުނެފައެވެ.

ޣައްޒާގެ ސިވިލް ޑިފެންސްގެ ތަރުޖަމާނު މަޙްމޫދު ބަސަލް ވިދާޅުވީ، ޣައްޒާގެ ސިވިލް ޑިފެންސް ޓީމުން އެ ސަރަހައްދުގައި ސަލާމަތުން ތިބި މީހުން ސަލާމަތްކުރުމަށް ދިޔަކަމަށާއި، އެ މަސައްކަތުގެ ތެރެއިން އެމީހުންނަށް ހަމަލާތަކުގައި ޝަހީދުވެފައިވާ ގިނަ އަދަދެެއްގެ މީހުންގެ ހަށިތައް ފެނުނު ކަމަށެވެ. އޭގެ ތެރޭގައި ގިނައީ އާއިލާތަކާއި، އަންހެނުންނާއި ކުޑަކުދިންކަމަށާއި، ޝަހީދުވެފައިވާ ބައެއް މީހުންގެ ހަށިތައް ކުއްތާތަކުގެ ޝިކާރައަކަށް ވެފައިވާކަމަށް ވެސް މަޙްމޫދު ބަސަލް ވިދާޅުވިއެވެ.

ބަސަލް ވިދާޅުވީ، އެމީހުން ގުނިއިރު، ޝަހީދުވެފައިވާ 60 ހަށިގަނޑެއް ފެނިފައިވާ ކަމަށާއި، އޭގެ ތެރެއިން ބައެއް ހަށިތައް އެތަނުގައި ވަޅުލައި، އަނެއް ބައި ހަށިތައް ކައިރީގައި ހުރި ހޮސްޕިޓަލްތަކަށް ގެންދެވުނު ކަމަށެވެ. އަދިވެސް ގިނަ ބައެއްގެ ހަށިތައް ސުންނާފަތިވެފައިވާ އިމާރާތްތަކުގެ ދަށުގައި ތާށިވެފައި ހުރި ކަމަށާއި، ޔަހޫދީން އެ ސަރަހައްދާއި ކައިރީގައި ތިބެ، މީހުން ސަލާމަތްކުރުމުގެ މަސައްކަތަށް ހުރަސް އަޅަމުންދާކަމަށް ވެސް ބަސަލް ވިދާޅުވިއެވެ.

މި ސަރަހައްދުގެ އިތުރުންވެސް، ޣައްޒާގެ ޝުޖާއިއްޔާ ސަރަޙައްދުން ހައްދުފަހަނައަޅާފައިވާ ޔަހޫދީން ފޭބުމާއިއެކު، މިދިޔަ ބުރާސްފަތި ދުވަހު އެ ސަރަހައްދަށް ދިޔަ ޣައްޒާގެ ސިވިލް ޑިފެންސް ޓީމުތަކުން ވަނީ ޝަހީދުވެފައިވާ ގިނަ އަދަދެއްގެ ހަށިތައް ހޯދާފައެވެ. މި ސަރަހައްދު އެއްކޮށް ސުންނާފަތިކޮށްލާފައިވާއިރު، ބަސަލް ވިދާޅުވީ، އެ ސަރަހައްދަކީ މިހާރު ދިރިއުޅެން ކުޅަދާނަ ސަރަހައްދެއް ނޫންކަމަށެވެ.

ބަސަލް ވިދާޅުވީ، އެ ސަރަޙައްދުގައި ތިބި ރައްޔިތުންނަށް އަމާޒުކޮށް ޔަހޫދީން ބަޑިޖަހާފައިވާކަން ލިޔެކިޔުމުން ފެންނަން ހުރި ކަމަށެވެ.

ޣައްޒާ ސިޓީގެ އިތުރުން ޣައްޒާގެ ދެކުނުގައި އޮތް ޚާން ޔޫނިސަށް ވެސް ޔަހޫދީ ފައުޖުން ވަނީ ލާއިންސާނީ ހަމަލާތަކެއް އަމާޒުކޮށް، އެތައް ބަޔަކު ޝަހީދުކޮށްލާފައެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ޔަހޫދީން ޣައްޒާއަށް އަރައިގަނެ، ހިންގަމުން އަންނަ ގަތުލުއާއްމަށް ނުވަ މަސް ވެފައިވާއިރު، މި އުދުވާންގައި ޝަހީދުވި މީހުންގެ އަދަދު ވަނީ 38,345 އަށް އަރާފައެވެ. އަދި ހަމަލާތަކާއި ގުޅިގެން  88,295 މީހުން ވަނީ މިހާތަނަށް ޒަހަމްވެފައެވެ.