މާލޭގައި ގްރޫޕް މާރާމާރީއެއް ހިންގި މައްސަލައަކާއި ގުޅިގެން 5 މީހަކު ހައްޔަރުކޮށްފިއެވެ.

މި މައްސަލައިގައި ހައްޔަރުކޮށްފައި ވަނީ އުމުރުން 19 އަހަރާއި 24 އަހަރުގެ ދިވެހި ފިރިހެނުންނެވެ.

މި މީހުންގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ކޯޓުން ވަނީ އެ މީހުންގެ ބަންދުގެ ގޮތުގައި އެކަކު ތަހުގީގު ނިމެންދެން އަދި ދެންތިބި މީހުން ފަސް ދުވަހަށް ބަންދުކުރުމަށް އަމުރުކޮށްފައެވެ.

އެމީހުން ބަންދުކުރުމަށް ނެރުނު ކޯޓު އަމުރުގައި، އެމީހުންގެ މައްޗަށް ކުރަނީ، ޖަމާއަތް ހަދައިގެން ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގި ކަމުގެ ތުހުމަތުކަމަށް ވަނީ ބަޔާންކޮށްފައެވެ.

މި މައްސަލައިގެ ބަންދު އަޑުއެހުމުގައި މައްސަލައިގެ ސީސީޓީވީ ފުޓޭޖާއި މާރާމާރީގައި އަނިޔާ ލިބުނު މީހާގެ ފޮޓޯތަކާއި ގުޅުންހުރި އެހެން ލިޔެކިޔުންތައް ވެސް ފުލުހުން ހުށަހަޅާފައިވާއިރު، މިކަންކަމަށް ރިއާޔަތްކޮށް މައްސަލަ ބެއްލެވި ގާޒީ ވަނީ ތުހުމަތެއް ވުޖޫދުވާ ވަރަށް ހެކި ހުށަހަޅާފައިވާ ކަމަށް ނިންމަވާފައެވެ.