އިންޑިއާގައި މިހާރު ކުރިއަށް އައިއެޗްއެފް ޓްރޮފީ 2024 ގައި 20 އަހަރުންދަށުގެ ތިންވަނަ ހޮވަން ކުޅުނު މެޗުގައި ފަސޭހަކަމާއެކު 33-23 ގެ ނަތީޖައަކުން ނޭޕާލް ބަލިކޮށް ރާއްޖެއިން މުބާރާތުގެ ބްރޯންޒް މެޑަލް ހޯދައިފިއެވެ.

މުބާރާތުގެ ލީގު ބުރުގައި މިދެޓީމު ކުޅުނު މެޗު ވާދަވެރި ކުޅުމަކަށްފަހު 29-31 ގެ ނަތީޖާއަކުން ކާމިޔާބުކުރީ ދިވެހި ޓީމެވެ.. އަދި ލީގުބުރުން ރާއްޖެ ތިންވަނަ ހޯދިއިރު، ނޭޕާލަށް ލިބުނީ ހަތަރުވަނައެވެ.

މެޗުގެ ފުރަތަމަ ހާފުގައި ރާއްޖޭގެ ޓީމުގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ އަށް ލަނޑުގެ ލީޑަކާއެކު 18-10 ގެ ނަތީޖާއަކުން ރާއްޖެ ކުރީގައި އޮވެގެންނެވެ.

މެޗުގެ ދެވަނަ ހާފުގައި ނޭޕާލް ޓީމުން ކުޅުން ރަނގަޅުކޮށް ރާއްޖެގެ ގޯލަށް ގިނަ ހަމަލާތަކެއް ފޮނުވާލި ނަމަވެސް އެޓީމުން ފޮނުވާލި ގިނަ ހަމަލާތަކެއް ރާއްޖެ ޓީމު ކީޕަރު ހުސެއިން ޔަނާލް އަކްރަމް ވަނީ ހުޝިއާރުކަމާއެކު ދިފާއުކޮށްފައެވެ. އަދި މިހާފުގައި ރާއްޖެ ޓީމުން އިތުރު 15 ލަނޑު ކާމިޔާބުކުރިއިރު، ނޭޕާލު ޓީމުން ވަނީ މިހާފުގައި އިތުރު 13 ލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ރާއްޖެ ޓީމުގެ ކީޕަރު ހުސެއިން ޔަނާލް އަކްރަމް އެވެ.

މި މުބާރާތުގައި ރާއްޖޭގެ 20 އަހަރުން ދަށުގެ ގައުމީ ފިރިހެން ޓީމާއި, 18 އަހަރުން ދަށުގެ ގައުމީ ފިރިހެން ޓީމް ވާދަކުރާއިރު، މިދެ އުމުރުފުރާގެ މެޗުތައް ވެސް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއެކު އެއްމެޗު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލުގައި ކުޅޭ ގޮތަށެވެ. އަދި ތިންވަނަ ހޮވާ މެޗުގައި ވާދަކުރާނީ ލީގުބުރުގެ ތިންވަނަ ޓީމާއި ހަތަރުވަނަ ޓީމެވެ.