ކުރީ ސަރުކާރުގައި ފެނަކައިގެ އިސްވެރިންގެ މައްޗަށް ތުހުމަތުކުރެވޭ ބޮޑު 6 މައްސަލައެއް ބަލަމުންދާ ކަމަށް އެންޓިކޮރަޕްޝަން ކޮމިޝަން (އޭސީސީ) އިން ހާމަކޮށްފިއެވެ.
ރައްޔިތުންގެ މަޖިލީހުގެ އެސްއޯއީ ކޮމިޓީއަށް ހާޒިރުވެވަޑައިގެން އޭސީސީގެ ރައީސް އާދަމް ޝާމިލް ވިދާޅުވީ ނިމިދިޔަ ސަރުކާރުގައި ފެނަކައިގެ އިސްވެރިންގެ ގޮތުގައި ތިއްވެވި ބައެއް ބޭފުޅުންނާއި މެދު އާދަޔާ ޚިލާފަށް ގިނައިން ޝަކުވާ ލިބިފައިވާ ކަމަށެވެ.
"ޖުމްލަކޮށް ދަންނަވާކަމަށްވަންޏާ އަޅުގަނޑުމެންނަށް ފެނަކަ ކޯޕަރޭޝަން މިދިޔަ މެނޭޖްމަންޓާއި ގުޅޭ ގޮތުން ހަމަ ޝަކުވާ އާދަޔާ ޚިލާފަށް ގިނައިން، ލިބިފައި އެބަހުރި."
ޝާމިލް ވިދާޅުވިއެވެ.
ޝާމިލް ވިދާޅުވީ، އޭގެ ތެރެއިން އޭރުގައި ފެނަކައިގައި ތިބި ވެރިންނަށް ތުހުމަތުކުރެވޭ 6 މައްސަލައެއް ބަލަމުންދާކަމަށާއި، އެ މައްސަލަތައް ހުށަހަޅާއިރު އެ ހިމެނޭ މައުލޫމާތަށް ބަލާލުމުން އެ 6 މައްސަލައަކީ ހަޤީގަތުގައި ވަރަށް ބޮޑެތި މައްސަލަތައް ކަމަށެވެ.
މި މައްސަލަތައް އޭސީސީއަށް ހުށަހަޅާފައިވަނީ ފެނަކައިން ނޫންކަމަށާއި، ޝަކުވާތައް ލިބުނުއިރުވެސް އެ މައްސަލަތައް އޭސީސީއަށް މީޑިޔާތަކުން ނަގައިގަނެވުނު ކަމަށް ޝާމިލް ވިދާޅުވިއެވެ.
ޝާމިލް ވިދާޅުވީ، އެކަމާއި ގުޅޭ މައުލޫމާތު ފެނަކައިން ލިބުން ލަސްވުމުން ފެނަކައަށް ވަދެ ބަލާ ފާސްކޮށް ކޮމިޝަނަށް ބޭނުންވާ ހުރިހާ މައުލޫމާތު މިހާރު ހޯދާފައިވާ ކަމަށާއި މިކަމާއި ގުޅޭ މައުލޫމާތު ފެނަކައިން އެކޮމިޝަނަށް ފޯރުކޮށްދިނުމުގައި ވަރަށް ލަސްވާކަމަށެވެ.
Advertisement
This content is created and paid for by advertisers and does not involve Voice Journalists
