ކުރީ ސަރުކާރުން ފެނަކައާއި ހަވާލުކޮށް، އެކުންފުންޏަށް ކުރިއަށް ނުގެންދެވި ހުއްޓިފައި ހުރި މަޝްރޫޢުތައް އެމްޑަބްލިޔުއެސްސީ އާއި ހަވާލުކުރުމުގެ މަސައްކަތް ކުރަމުންދާ ކަމަށް އިމާރާތް ކުރުމާއި، ބިނާރާ ބެހޭ ވުޒާރާގެ ވަޒީރު އަބްދުالله މުއްޠަލިބު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރު މުއްޠަލިބާއި ސުވާލު ކުރުމަށް ލިބުނު ފުރުސަތުގައި ގިނަ މެންބަރުންތަކެއް ވަނީ އެ ދާއިރާ ތަކުގައި ހުއްޓިފައި ހުރި މަޝްރޫއުތައް ފެށޭނެ އިރަކާއި ގުޅޭ ގޮތުން ސުވާލު ކުރައްވާފައެވެ.
އެ ސުވާލު ތަކަށް ޖަވާބު ދެއްވަމުން ވަޒީރު މުއްޠަލިބު ވިދާޅުވީ، މިހާރު ރާައްޖޭގެ އެކި ކަންކޮޅުތަކުގައި 80 އަށްވުރެ ގިނަ ފެނާއި ނަރުދަމާގެ މަޝްރޫޢު ކުރިއަށްދާ ކަމަށެވެ.
އޭގެ ތެރެއިން ހުއްޓިފައި ހުރި މަޝްރޫޢު ތަކަކީ ފެނަކަ އާއި ހަވާލުކޮށްގެން ކުރިއަށް ގެންދާ މަޝްރޫޢުތައް ކަމަށާ، އެ މަޝްރޫއުތައް ހުއްޓިފައި ހުރުމުން، ފެނަކަ އާއިއެކު ހަދާފައި އޮތް އެއްބަސްވުން ބާތިލްކޮށް، މަޝްރޫއުތައް އެމްޑަބްލިޔުއެސްސީއާ ހަވާލު ކުރުމުގެ މަސައްކަތް ކުރައްވަމުންދާ ކަމަށް ވަޒީރު ވިދާޅުވިއެވެ.
އިމާރާތް ކުރުމާއި، ބިނާރާ ބެހޭ ވުޒާރާގެ ވަޒީރު އަބްދުالله މުއްޠަލިބު
އެއްކޮށް ހުއްޓިފައި، ނުވަތަ ކުރިއަށް ނުގޮސް ހުރި (ފެނާއި ނަރުދަމާގެ) މަޝްރޫޢު ތަކަކީ ފެނަކައާއި ހަވާލުކޮށްގެން ކުރިއަށް ގެންދާ (މަޝްރޫޢު). ފެނަކަ އަކީ ކުރިން އެފަދަ މަސައްކަތް ކުރި ބައެއް ނޫން. ކުރީ ސަރުކާރުގައި އެބައޮތް 16 ރަށަކާއި އިތުރު ތިން ރަށެއްގެ މަރާމާތުގެ މަސައްކަތް ހަވާލުކޮށްފައި. ދެން އެބޭފުޅުން ސަބްކޮންޓްރެކްޓް ކޮށްގެން ކުރިއަށް ގެންދަނީ. އެހެންވެ އެއްވެސް ވަރަކަށް ކުރިއަށް ނުދާތީ މިހާރު އަޅުގަނޑުމެންވާނެ އެ އެއްޗެހި ޓާމިނޭޓް ކޮށްފައި. ޓާމިނޭޓް ކޮށްފައި، އެމްޑަބްލިޔުއެސްސީ ލައްވާ ސާވޭ ހަދާފައި، އަގު ހޯދާފައި، މިހާރު އެ މަޝްރޫޢުތައް ޓެންޑަރ ބޯޑަށް ހަވާލުކޮށްފައިވާނީ އެމްޑަބްލިޔުއެސްސީއާ ހަވާލު ކުރުމަށް.
ވަޒީރު މުއްޠަލިބު
ފެނަކައިގެ މަޝްރޫޢުތައް ހުއްޓޭ މައްސަލަ ދިމާވާއިރު، ނިމިދިޔަ ސަރުކާރު ނިމުނުއިރު، އެ ކުންފުނީގެ ދަރަނި 4 ބިލިއަން ރުފިޔާއަށްވުރެ މައްޗަށް އަރާފައިވާ ކަމަށާ، އެކުންފުނިން ފައިސާ ދޭންޖެހި ނުދީ ހުރި އަމިއްލަ ވިޔަފާރިތަކުގެ އަދަދު 1،149 އަަށް އަރާކަމުގައި މި ސަރުކާރުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
