މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ހާޝިމް މަގާމުން ވަކިކުރަން ރައީސުމްޖުމްހޫރިއްޔާ އަށް ލަފާ ދިނުމާއިގުޅޭ މައްސަލައަށް ޖަވާބުދާރީވާން މިއަދުވެސް ހާޒިރުވެވަޑައިގެންފައި ނުވާތީ، މާދަމާ ކޮމިޓީއަށް ހާޒިރު ނުވެއްޖެނަމަ ރިޕޯޓަށް ބަލައި، މައްސަލައާއި ގުޅޭ ގޮތުން ގޮތެއް ނިންމަން ކޮމިޓީން ފާސްކޮށްފިއެވެ.
މި މައްސަލައަށް ޖަވާބުދާރީވާން ކޮމިޓީގެ ދެ ބައްދަލުވުމަށް ވެސް ގަވަރުނަރު އާލާސްކަންފުޅާއި އުޅުއްވާތީ ހާޒިރުވެފައެއް ނުވެއެވެ.
އެކަމާއި ގުޅިގެން މާލިއްޔަތު ކޮމިޓީގެ މުގައްރިރު އަދި މާމިގިލި ދާއިރާގެ މެމްބަރު ގާސިމް އިބްރާހިމް ވަނީ އާލާސްކަންފުޅާ އުޅުއްވާތީ މިއަދުގެ ބައްދަލުވުމަށް ވެސް ވަޑައިނުގެންނެވޭ ކަން އަލީ ހާޝިމް އަންގަވާފައިވާ ކަމަށެވެ. އަދި މާދަމާ އަކީ އެންމެ ފަހު ދުވަސްކަމަށް ބަލައި، މާދަމާ ހާޝިމް ކޮމިޓީއަށް ހާޒިރުވެވަޑައިނުގަންނަވައިފި ނަމަ ގަވަރުނަރު ވަޒީފާއިން ވަކިކުރުމާ ގުޅޭގޮތުން އިތުބާރު ނެތް ކަމުގެ ވޯޓާ މެދު ގޮތެއް ނިންމާނެކަމަށް ގާސިމް ވިދާޅުވިއެވެ.
"މާދަމާ ވެސް އަނެއްކާ އެ މައްސަލަ މިޖަހަނީ. އެންމެ ފަހު ދުވަސް ކަމަށް މި ބަލަނީ. މާދަމާ ގަވަރުނަރު ވަޑައިގަތަސް ނުގަތަސް އެމަނިކުފާނު ފޮނުވާފައިވާ ސިޓީއަށް ބަލައި ގޮތެއް ނިންމުމަށް ކޮމިޓީން ވަނީ ނިންމާފައި,"
ގާސިމް ވިދާޅުވިއެވެ.
އެ ހުށަހެޅުމަށް ތާއީދުކޮށް، ކޮމެޓީން ވަނީ މާދަމާ 11 ޖަހާއިރު ކޮމެޓީއަށް ހާޒިރުވާން ގަވަރުނަރަށް އެންގުމަށް ނިންމާފައެވެ.
ގަވަރުނަރު ކަމުގެ މަގާމުން ހާޝިމް ވަކިކުރުމަށް ހުށަހަޅުއްވާފައިވަނީ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް އެވެ.
މިފަދައިން ނާޒިމް ހުށަހެޅުއްވީ، ގަވަރުނަރުގެ މައްޗަށް ޤާނޫނުން ލާޒިމުކުރާ ޒިންމާތައް އޭގެ އެންމެ އެދެވޭ ގޮތުގައި އަދާކުރަމުންދާތަން ނުފެންނަ ކަމަށް ވިދާޅުވެއެވެ.
އޭގެ ތެރޭގައި، ދައުލަތުގެ މާލީ ހާލަތު ރަނގަޅުކުރުމަށް ސަރުކާރަށް ލަފާދިނުމާއި އަދި އެމްއެމްއޭއަށް ޤާނޫނުން މަތިކޮށްފައިވާ މަޤްސަދުތައް ހާސިލުކުރުމަށް ގަވަރުނަރު ޢަމަލީގޮތުން މަސައްކަތްނުކުރާކަމަށާއި، ގައުމުގެ މާލީ ހާލަތު ގޯސްވެ، އިޤްތިސާދީ ކާރިސާއަކުން ގައުމު ސަލާމަތްކުރަން ހާޝިމް މަސައްކަތް އެއްވެސް ވަރަކަށް މަސައްކަތްނުކުރާ ކަމަށް ވެސް ނާޒިމް ވަނީ ވިދާޅުވެފައެވެ.
މިއާއިއެކު، ހާޝިމް ވަކި ކުރުމާއި ގުޅޭގޮތުން ކޮމިޓީއަށް ހުށަހަޅުއްވަމުން ނާޒިމް ވިދާޅުވީ، ބެންކުތަކާއި ފައިނޭންޝަލް އިންސްޓިޓިއުޝަންތަކުން އާންމުންނަށް ލޯނު ދޫކުރާވަރު ނުސީދާކޮށް ހިފަހައްޓައި ބެންކުތަކުގެ ރިޒާވް އެމްއެމްއޭގައި ބެހެއްޓުމަށް ގަވަރުނަރު ބާރު އަޅާތީ، އެކަމުގެ ސަބަބުން އިގުތިސާދުގެ ތެރޭގައި ދައުރުވާން ހުރި ފައިސާ މަދުވެ، އިގުތިސާދީ މަސައްކަތްތައް ހުއްޓި އިގުތިސާދުގެ ދުވެލި މަޑުޖެހެމުންދާކަމަށެވެ.
ރައީސް ޑރ.މުޢިއްޒުގެ ސަރުކާރު ވެރިކަމަށް ހަވާލުވިފަހުން 7 މަސް ވެފައިވާއިރު، މިހާތަނަށް ގަވަރުނަރުގެ ފަރާތުން ސަރުކާރާއި މަޖިލީހަށް އެއްވެސް ލަފައެއް ލިބިފައި ނުވާކަން ނާޒިމް ފާހަގަ ކުރެއްވިއެވެ.
އެމްއެމްއޭގެ ގަވަރުނަރު ކަމަށް ހާޝިމް އައްޔަނުކުރެވުނީ 2019 ވަނަ އަހަރުއެވެ.
Advertisement
This content is created and paid for by advertisers and does not involve Voice Journalists
