އިސްލާމިކް މިނިސްޓްރީން ކުރިއަށް ގެންދާ އިމާމުންނާއި ޚަތީބުންނަށް ތަމްރީން ދިނުމުގެ ޕްރޮގްރާމް ގެ ދަށުން، ބްރޫނާއީގައި ތަމްރީނުވުމަށް ރާއްޖޭގެ 20 އިމާމަކު ގޮސްފިއެވެ.
އިސްލާމީ ކަންތައްތަކާއި ބެހޭ ވަޒީރު އެކްސް ގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ އިމާމުން ތަމްރީނު ޕްރޮގްރާމެއްގައި ބުރޫނާއީއަށް ގޮސްފައިވާކަމަށާއި، އިމާމުންނަށް އިސްތިޤުބާލުކުރެއްވީ ބުރުނާއި އިސްލާމިކް ޔުނިވަރސިޓީގެ ރައީސް ޑރ ނޫރު އިރްފާން ކަމަށެވެ.
މީގެ އިތުރުންވެސް ވަޒީރު ޝަހީމް ވިދާޅުވީ، މިއީ ރާއްޖެއިން ބޭރަށް މިއަހަރު އިމާމުންދާ 3 ވަނަ ފަހަރުކަމަށާއި، މިގޮތުން މިއަހަރު 60 އިމާމުން ރާއްޖެއިން ބޭރަށް އިތުރު ތަމްރީނަށް ފޮނުވާފައިވާ ކަމަށެވެ.
ރާއްޖޭގެ 20 އިމާމަކު އިތުރު ތަމްރީނު ހޯދުމަށް ބުރޫނާއިއަށް ފޮނުވުމަށް ހަމަޖެހިފައިވާކަން ވަޒީރު ހާމަކުރެއްވީ މިމަހުގެ 1 ވަނަ ދުވަހުއެވެ.
މީގެ ކުރިން މި ޕްރޮގްރާމްގެ ދަށުން އިމާމުން މައްކާއަށްވެސް ފޮނުވާފައިވާއިރު، ވަޒީރު ޑރ. ޝަހީމް ވިދާޅުވިގޮތުގައި ޕްރޮގްރާމްގެ ދަށުން ބައިވެރިން ސައުދީގެ އިތުރުން މިޞްރު، މެލޭޝިޔާ، ބުރޫނާއި އަދި އިންޑޮނޭޝިޔާއަށްވެސް ތަޖުރިބާއާއި ތަމްރީނުގެ ދަތުރުތައް ކުރާނެއެވެ.
ހަމައެއާއިއެކު، މިފަދަ ތަމްރީނު ޕްރޮގްރާމެއް މިއަހަރުގެ ފެބްރުއަރީ މަހު ގއ. ގެމަނަފުށީގައި ވެސް ކުރިއަށްގެންދިޔައިރު، އެ ޕްރޮގްރާމްގައި ދެކުނުގެ ރަށްރަށުން 77 އިމާމުން ބައިވެރިވެފައިވާ ކަން ފާހަގަ ކޮށްލަން ޖެހެއެވެ.
މި ޕްރޮގްރާމްގެ މަޤްޞަދަކީ މިސްކިތްތަކުގައި ތިބި އިމާމުންނަކީ އިލްމީގޮތުން ފުދުންތެރި، ތަމްރީނު ލިބިފައިވާ ބަޔަކަށް ހެދުން ކަމަށް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
