ގަވާއިދާ ޚިލާފަށް އުޅޭ ބިދޭސީންނާ ގުޅޭ މައްސަލަތައް ރިޕޯޓުކުރުމަށް "އިމިގްރޭޝަން ވޮޗް" ނަމުގައި އައު ޕްލެޓްފޯމެއް އިމިގްރޭޝަން މޯލްޑިވްސްއިން ތަޢާރަފްކޮށްފިއެވެ.
މި ޚިދުމަތް ތަޢާރަފްކޮށްދެއްވީ މިއަދު އިމިގްރޭޝަނުން ނޫސްވެރިންނާއެކު ބޭއްވި ބައްދަލުވުމެއްގައި ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދެވެ.
ކޮންޓްރޯލަރ ޖެނެރަލް ވިދާޅުވި ގޮތުގައި، ބިދޭސީން ހިންގާ ވިޔަފާރިތަކަށް ހާއްސަކޮށްގެން މިހާރު ފަށާފައިވާ އޮޕަރޭޝަންތަކަށް އާއްމުންގެ ބޮޑު ތަރުޙީބެއް ލިބިފައިވެއެވެ. އަދި ގިނަ ބިދޭސީންނާ ގުޅޭ މަޢުލޫމާތު ސޯޝަލް މީޑިއާ ފަދަ އެކި ޕްލެޓްފޯމްތައް މެދުވެރިކޮށް ހިއްސާކުރަމުންދާ ކަމަށް އޭނާ ފާހަގަކުރެއްވިއެވެ. "އިމިގްރޭޝަން ވޮޗް" ތަޢާރަފްކުރުމުގެ ސަބަބުން އެންމެނަށް އެއް ޕްލެޓްފޯމެއްގެ ދަށުން މައްސަލަތައް ރިޕޯޓު ކުރުމުގެ ފުރުސަތު ލިބިގެންދާނެ ކަމަށްވެސް އޭނާ ވިދާޅުވިއެވެ.
މި އައު ޚިދުމަތް ތަޢާރަފްކުރުމުގެ މައިގަނޑު މަޤްޞަދަކީ މުޖުތަމަޢުގެ ރައްކާތެރިކަން އިތުރުކޮށް، އިމިގްރޭޝަންގެ ޤާނޫނުތައް ދެމެހެއްޓުމެވެ. މީގެ ސަބަބުން ގަވާއިދާ ޚިލާފަށް އުޅޭ ބިދޭސީންގެ މައްސަލަތަކާއި، އޮޅުވާލައިގެން ރާއްޖެ އެތެރެވުމަށް މަސައްކަތްކުރާ ބިދޭސީން ދެނެގަތުމާއި، އިމިގްރޭޝަނާ ގުޅުންހުރި އެހެނިހެން މައްސަލަތަކުގައި ޝާމިލްވާ ބިދޭސީން ރިޕޯޓުކުރުން މިހާރަށްވުރެ ފަސޭހަވެގެންދާނެއެވެ.
އިމްގްރޭޝަނުން އިތުރަށް މައުލޫމާތު ދެއްވި ގޮތުގައި، "އިމިގްރޭޝަން ވޮޗް" ޕްލެޓްފޯމުން ރިޕޯޓުކުރާ ފަރާތާއި މައްސަލައިގެ ސިއްރިއްޔާތު ދެމެހެއްޓޭނެއެވެ. އެގޮތުން މަޢުލޫމާތު ފޯރުކޮށްދޭ ފަރާތުގެ މަޢުލޫމާތު ހާމަނުކޮށްވެސް ރިޕޯޓުކުރެވޭނެ ކަމަށާއި އާންމުންނަށް މުހިންމު މަޢުލޫމާތު ހިއްސާކޮށް ބޮޑެތި ކުށްތައް ހުއްޓުވުމުގެ ފުރުސަތު ލިބޭނެ ކަމަށްވެސް އިމިގްރޭޝާނުން ބުނެއެވެ.
އަދި ތަފްސީލީ މަޢުލޫމާތުގެ ސަބަބުން ބޮޑެތި ކުށްކުރާ ފަރާތްތައް އަވަހަށް ދެނެގަނެވޭނެ ކަންވެސް އިމިގްރޭޝަނުން ވަނީ ފާހަގަކުރައްވާފައެވެ.
"އިމިގްރޭޝަން ވޮޗް" ގެ ޚިދުމަތް 24 ގަޑިއިރު އޮންލައިންކޮށް އިމިގްރޭޝަންގެ ވެބްސައިޓުން ލިބޭނެއެވެ. އަދި ވެބްސައިޓުން "އިމިގްރޭޝަން ވޮޗް" ޚިޔާރުކޮށް މައްސަލައިގެ ތަފްސީލާއި ފޮޓޯ ހުށަހެޅޭނެއެވެ.
Advertisement
This content is created and paid for by advertisers and does not involve Voice Journalists
