އެމެރިކާގެ ރައީސް އަދި އެގައުމުގެ ކުރިއަށް އޮތް ރިޔާސީ އިންތިހާބުގައި ވާދަކުރައްވާ ކެނޑިޑޭޓް ޖޯ ބައިޑަން ކޮވިޑް 19 އަށް ފައްސިވެ، އިންތިޚާބުގެ ނާޒުކު ދަނޑިވަޅެއްގައި ލެޓިނޯ ވޯޓަރުންގެ ތާއީދު ހޯދުމަށް ބޭއްވުމަށް ހަމަޖެހިފައިވާ މުހިންމު ކެމްޕޭން އިވެންޓެއް ކެންސަލް ކޮށްލަން ޖެހިއްޖެއެވެ.
ބައިޑެންގެ ޑޮކްޓަރު ބުނީ، އުމުރުން 81 އަހަރުގެ ބައިޑެންގެ ކިބައިން މި ބަލީގެ އަލާމާތްތައް މަޑުމަޑުން ފެންނަމުންދާ ކަމަށާއި، އޭނާއަށް އެންޓިވައިރަލް ބޭސް ޕެކްސްލޮވިޑްގެ ފުރަތަމަ ޑޯޒް ދެވިފައިވާކަމަށެވެ.
ބައިޑެންގެ ޑޮކްޓަރު މިފަދައިން ބުނެފައިވާއިރު، ޑެލަވެއަރ ހުންނަ ގެއަށް ދިޔުމަށްޓަކައި އެއަރ ފޯސް ވަން އަށް އަރަން ތައްޔާރުވަމުން ބައިޑެން ވަނީ އޭނާގެ ހާލު ރަނގަޅުކަމަށް ބުނެފައެވެ. މި ބައްޔަށް ފައްސި ވުމާއިއެކު، އެމެރިކާގެ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަންގެ އިރުޝާދާ އެއްގޮތަށް ބައިޑެން ކަރަންޓީނު ވާނެއެވެ.
މީގެކުރިންވެސް ބައިޑަން ވަނީ ދެފަހަރު ކޮވިޑަށް ފައްސިވެފައެވެ. އަދި އޭނާ އަށް ވެކްސިންގެ އިތުރުން ބޫސްޓަރ ޑޯޒްވެސް ދެވިފައިވާކަމަށް ބައިޑެންގެ ޑޮކްޓަރު މައުލޫމާތުދެއެވެ.
ބައިޑެން އަށް ކޮވިޑް ޖެހިފައިވާކަން ހާމަކޮށްފައިވާއިރު، އޭނައާއިއެކު މި އިންތިހާބުގައި ވާދަކުރައްވާ އެމެރިކާގެ ކުރީގެ ރައީސް ޑޮނަލްޑް ޓްރަމްޕް ގަޔަށް ބަޑި ޖަހައި އޭނާ މަރާލަން ވަނީ މަސައްކަތްކޮށްފައެވެ. ކެމްޕޭން ހަރަކާތެއްގެ ތެރެއިބް އޭނާގެ ކަނާއަތު ކަންފަތަށް މީހަކު ބަޑި ޖަހައިފައިވާއިރު، ޓްރަމްޕް ކެމްޕޭން އޮފީހުން ބުނީ އޭނާގެ ހާލު ރަނގަޅުކަމަށެވެ.
Advertisement
This content is created and paid for by advertisers and does not involve Voice Journalists
