ދައުލަތުގެ ރައްކާތެރިކަމުގެ ވިއުގައިން ހަވާސާވެފައި ތިބި ފަރާތްތަކެއް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ކުރިއަށްގެންދާ ހާލު ކިހިނެއް ޕްރޮގްރާމުގެ ތެރެއިން ދެނެގަނެވިފައިވާކަމަށް އެ ވުޒާރާގެ ނައިބު ވަޒީރު މަރިޔަމް ލަހުފާ ޚަލީލް ވިދާޅުވެއްޖެއެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ކުރިއަށް ގެންދާ މަސައްކަތްތަކާއި ގުޅޭގޮތުން އެސްއެސްޓީވީގެ ބާރު ހަތަރެއް ޕްރޮގްރާމުގައި ވާހަކަދައްކަވަމުން ލަހުފާ ވަނީ ނުކުޅެދުންތެރިކަން ހުންނަ ފަރާތްތަކާއި 65 އަހަރުން މަތީގެ މީހުންގެ މައުލޫމާތު ހިމެނޭ ޤައުމީ ދަފްތަރެއް އެކުލަވާލުމުގެ މަސައްކަތަށް އަލިއަޅުވާލައްވާފައެވެ.
މިގޮތުން ލަހުފާ ވިދާޅުވީ، ނުކުޅެދުންތެރިކަން ހުންނަ ފަރާތްތަކާއި ދޮށީއުމުރުގެ މީހުންގެ ޤައުމީ ދަފްތަރެއް އެކުލަވާލުމަކީ އެއްވެސް ފަރުދަކު ބާކީ ނުވާނެހެން ދައުލަތުގެ އެހީތެރިކަން އެންމެނަށް ފޯރުކޮށްދިނުމަށް ކޮންމެހެން ކުރަންޖެހޭ މަސައްކަތެއް ކަމަށާއި، މިހާރު ނުކުޅެދުންތެރިކަން ހުންނަ ފަރާތްތަކާއި ދޮށީއުމުރުގެ މީހުންގެ މަޢުލޫމާތު އެކި އިދާރާތަކުން އެކި މިންވަރަށް ރައްކާކުރަމުން އަންނަކަން ފާހަގަކުރެވޭ ކަމަށެވެ. އަދި މިއީ ދައުލަތުގެ ރައްކާތެރިކަމުގެ ވިއުގައިން ބަޔަކު ހަވާސާވެ، އެމީހުންނަށް އެހީތެރިކަން ފޯރުކޮށްނުދެވި، އިހުމާލުވުމުގެ ފުރުޞަތު އޮތް ކަމަށް ލަހުފާ ވިދާޅުވިއެވެ.
ލަހުފާ ވަނީ "ހާލު ކިހިނެއް؟" ޕްރޮގްރާމުގެ ތެރެއިން ވެސް އެފަދަ ބައެއް މައްސަލަތައް ފާހަގަކުރެވިފައިވާ ކަމަށާއި، އަދި އެ ފަރާތްތައް އެންސްޕާގައި ރަޖިސްޓްރީކޮށް، ދައުލަތުގެ ސޯޝަލް ޕްރޮޓެކްޝަން ނިޒާމުގެ ތެރެއިން ފޯރުކޮށްދޭންޖެހޭ އެހީތެރިކަން ފޯރުކޮށްދިނުމުގެ މަސައްކަތް ކުރެވިފައިވާކަންވެސް ފާހަގަކުރައްވާފައެވެ.
އެ ވުޒާރާގެ މަސައްކަތްތައް މިހާރު ބައްޓަންކޮށްފައިވަނީ އާއިލީ ދުޅަހެޔޮކަން ކަށަވަރުކުރުމަށް ދުރާލާ ރައްކާތެރިކަމުގެ ފިޔަވަޅުތައް އަޅައި، އެ މަސައްކަތް ހަރުދަނާ ކުރުމުގެ މައްޗަށް ކަމަށާއި، އޭގެ ތެރެއިން އެ ވުޒާރާއިން ކުރިއަށް ގެންދާ އިބަމަ އަދި ހާލު ކިހިނެއް ޕްރޮގްރާމަކީ ވެސް ޢާއިލާތަކާއެކު ގާތުން މަސައްކަތްކޮށް، ޢާއިލާތަކުގެ ހާލަތު ވަޒަންކޮށް، ރައްކާތެރިކަން ފޯރުކޮށްދިނުމާއެކު އިޖުތިމާޢީ ދުޅަހެޔޮކަން ކަށަވަރުކުރުމަށް ދުރާލާ މަސައްކަތް ކުރުމަށް އެކަށައަޅާ ކުރިއަށް ގެންދާ ޕްރޮގްރާމުތަކެއްކަމަށް ވެސް ލަހުފާ ވަނީ ވިދާޅުވެފައެވެ.
ލަހުފާ އިތުރަށް ވިދާޅުވީ، މިހާރު ވުޒާރާއިން ފަށާފައިވާ ނުކުޅެދުންތެރިކަން ހުންނަ ފަރާތްތަކާއި ދޮށީއުމުރުގެ މީހުންގެ ގައުމީ ދަފްތަރު އެކުލަވާލެވިގެންދާ ހިނދު ދައުލަތުގެ ރައްކާތެރިކަމުގެ ވިއުގައިން ހަވާސާވެފައި އެއްވެސް ފަރުދަކު ނުހުންނާނެކަމަށާއި، އެމީހުންނަށް ދައުލަތުން އެކި މަރުހަލާތަކުގައި ފޯރުކޮށްދޭން ޖެހޭ އެހީތެރިކަމާއި ރައްކާތެރިކަން ފޯރުކޮށްދެވޭކަން މޮނިޓާވެސް ކުރެވިގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
