ހުއްދަ ނެތި އޮންލައިން ކޯސްތައް ހިންގާނަމަ ފިޔަވަޅު އަޅާނެކަމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) އިން ބުނެފިއެވެ.

އީ-ލާރނިންގ ހުއްދަ ނުހޯދާ ޕްރޮގްރާމް ހިންގުމާ ގުޅޭގޮތުން އެ އިދާރާއިން ގެޒެޓުގައި ޝާއިއު ކުރި ބަޔާނެއްގައި ބުނީ، މަތީ ތަޢުލީމުދޭ މަރުކަޒުތަކުން އީ-ލާރނިންގ ހުއްދަ ނުހޯދާ ޕްރޮގްރާމްތައް އިސްތިހާރުކޮށް، ހިންގާ ކަމުގެ ޝަކުވާތަކެއް އެ އޮތޯރިޓީއަށް ލިބެމުން އަންނަ ކަމަށެވެ.

މިކަމާއި ގުޅިގެން އެމްކިއުއޭއިން ބުނީ، 28 އޭޕްރިލް 2022 ގައި އެ އޮތޯރިޓީން ނެރުނު ސަރކިއުލަރ އަކުން، ކޮވިޑް-19 ގެ ވަބާ ގެ ތެރޭގައި ދިވެހިރާއްޖޭގެ ހުރިހާ މަތީ ތަޢުލީމެދޭ މަރުކަޒުތަކަށް އީ-ލަރނިންގ ޑެލިވަރީ މޮޑަލިޓީގައި ޕްރޮގްރާމްތައް ހިންގުމަށް ދެވުނު ހުއްދަ ބާޠިލްކޮށް ޢާއްމުކޮށް ޢިއުލާން ކުރެވިފައިވާ ކަމަށެވެ.

ހަމައެއާއިއެކު، 16 މޭ 2022 ގައި 'ޕްރޮގްރާމް އެކްރެޑިޓޭޝަން ގަވާއިދު' އަދި 24 އޮގަސްޓް 2022 ގައި 'ގައިޑްލައިންސް ފޯ އީ-ލާރނިންގ' ގެޒެޓްގައި ޝާއިއު ކުރެވުމާ ގުޅިގެން ދިވެހިރާއްޖޭގެ ހުރިހާ މަތީ ތަޢުލީމުދޭ މަރުކަޒުތަކުން އެ ގަވާއިދާ އެއްގޮތަށް، ޕްރޮގްރާމްތައް ހުށަހަޅާ ހުއްދަ ހޯދުމަށް އެންގިފައިވާކަމަށާއި، މި ގަވާއިދުތަކާ އެއްގޮތަށް ގިނަ މަރުކަޒުތަކުން ޕްރޮގްރާމް ހުށަހަޅާ ހުއްދަ ހޯދައިގެން ކުރިއަށް ގެންދާކަން ފާހަގަކުރެވޭ ކަމަށް ވެސް އެމްކިއުއޭއިން ބުނެއެވެ.

ދިވެހިރާއްޖޭގެ މަތީ ތަޢުލީމުދޭ މަރުކަޒަކީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާ ގައި ރަޖިސްޓަރީކޮށްފައިވާ ތަނެއްކަން ކަށަވަރު ކުރުމުގެ އިތުރުން، އެ މަރުކަޒަކުން ހިންގާ ޕްރޮގްރާމަކީ އެމްކިއުއޭ އިން ހުއްދަ ދީފައިވާ ޕްރޮގްރާމެއްކަމާއި، އެ ޕްރޮގްރާމެއްގެ 'ޑެލިވަރީ މޮޑަލިޓީ' އެ އޮތޯރިޓީގެ ވެބްސައިޓްގެ ކޮލިފިކޭޝަންސް ރަޖިސްޓްރީއިން ކަށަވަރު ކުރުމަށްފަހުގައި ކިޔެވުން ކުރިއަށް ގެންދިޔުމަށް އެމްކިއުއޭއިން ވަނީ އިލްތިމާސްކޮށްފައެވެ.

ހަމައެއާއިއެކު، އެކްރެޑިޓް ކޮށްފައިނުވާ ޕްރޮގްރާމަކުން ޙާސިލްކުރާ ސަނަދެއް  އޮތޯރިޓީން ޤަބޫލު ނުކުރާނެ ކަމާއި އެކަމުގެ ޒިންމާ ނުނަގާނެ ކަން ފާހަގަކުރަމުން އެމްކިއުއޭއިން ބުނީ އޮތޯރިޓީން ކަނޑައަޅާފައިވާ މިންގަނޑުތަކާ ޙިލާފަށް މަރުކަޒުތަކުން ޕްރޮގްރާމްތައް އިސްތިހާރުކޮށް، ހިންގާ ކަމަށް ވާނަމަ 'ޕްރޮގްރާމް އެކްރެޑިޓޭޝަން ގަވާއިދު' ގެ ދަށުން އެ މަރުކަޒަކަށް ފިޔަވަޅު އަޅާނެ ކަމަށެވެ.