އާއްމުކޮށް ބަރުދަން ލުއި ކޮށް ޑައިޓް ޖައްސާއިރުވެސް އެންމެ ގިނައިން ދިމާވާ އެއް ކަމަކީ ރޭގަނޑު ބަނޑުހައި ވެގެން، މާ ލަސްކޮށްފައި ކާންޖެހޭ މައްސަލައެވެ. ރޭގަނޑަށް މިފަދައިން މާ ލަހުން ކާ ނަމަ، ބަރުދަން ލުއި ކުރަން ވަރަށް އުނދަގޫ ވާނެ އެވެ.

އެހެންކަމުން، މިއަދު “ވޮއިސް”ގެ ބަދިގެއިން މި ގެނެސްދެނީ ރޭގަނޑު ގަދަޔަށް ކެއުމުގެ ބަދަލުގައި ކާލާނެ ސެލެޑެއްގެ ރެސިޕީއެވެ. ރޭގަނޑު އިރާކޮޅު 7 ގެ ކުރިން މި ސެލެޑް އެކަނި ކެއުމުންވެސް އެރެއަށް ފުދޭ ވަރަށް ހުންނާނީ ކެވިފައެވެ. 

1 ދަޅު މަސް

2 ޖޯޑު ލެޓިޔުސްފަތް، (ކޮށާފައި) 

1 ކިޔުކަންބާ (ކިޔުބް ކޮށް ކޮށާފައި) 

2 ފެނު ކައްކާފަހުރި ބިސް (ކިޔުބްކޮށް ކޮށާފައި)

1 ބިސް

7 ގ ބަޓަރ ޕޯޝަނެއް

1 ފިޔާ (ތުނިކޮށް ކޮށާފައި)

1 ލުނބޯ

1/2 ސައިސަމުސާ އަސޭމިރުސް

2 ރޯ ޓޮމާޓޯ

1/2 ބެލްޕެޕަރ (ކިޔުބްކޮށް ކޮށާފައި)

ގިތެޔޮ މިރުސް

ލޮނު

1 މޭޒުމަތީ ސަމުސާ ސެލެޑް ސޯސް ނުވަތަ މަޔޮނައިޒް 

1) ފިޔާކޮޅު ލުނބޯ ހުތް ޖަހައިގެން ރަނގަޅަށް މޮޑެލާށެވެ. ދެން މަސްދަޅު، އަދި ގިތެޔޮ މިރުސް އަޅާލުމަށް ލޮނު އަޅައި ލޮނު ހެޔޮވަރު ކޮށްލާށެވެ. 

2) ދެން ނުކައްކާ އޮތް ބިހާއި ބަޓަރ ޕޯޝަނާއި ތައްޓެއްގައި އެކުލަވައި ލުމަށްފަހު، އެއަށް ކުޑަ ލޮނު ކޮޅަކާއި އަސޭމިރުސް އަޅާލުމަށްފަހު ބިސްގަނޑެއް އަޅާލާށެވެ. 

3) ބިސްގަނޑު ކޮށާލުމަށްފަހު، މަސްގަނޑަށް އަޅާލުމަށްފަހު މޮޑެލާށެވެ. ދެން ކެއްކި ބިސްއަޅާލައި އެކުލަވާލާށެވެ. 

4) ދެން، ލެޓިޔުސް ފަތާއި، ޓޮމާޓޯ، ބެލްޕެޕަރ އަދި ކިޔުކަންބާ އަޅައި އެކުލަވާލުމަށްފަހު މަޔޮނައިޒް އާއި އަސޭމިރުސް އަޅާލާ އެކުލަވާލާށެވެ. ލޮނު މަޑު ނަމަ، އިތުރު ލޮނު ކޮޅެއް އަޅާލާށެވެ. 

ޓޫނާ އެގް ސެލެޑް އެހުރީ ތައްޔާރުވެފައެވެ.