ބަންގްލަދޭޝްގައި މިހާރު ހިނގަމުންދާ ހަމަނުޖެހުންތަކާ ގުޅިގެން، ބަންގްލަދޭޝްގައި ދިރިއުޅޭ އަދި އެ ގައުމަށް ދަތުރުކުރާ ދިވެހީން މިދުވަސްވަރު ސަމާލުވުމަށް ޚާރިޖީ ވުޒާރާއިން އިލްތިމާސްކޮށްފިއެވެ.

ބަންގްލްދޭޝްގައި ސަރުކާރު ވަޒީފާތަކަށް މީހުން ޢައްޔަންކުރުމުގައި އަމަލު ކުރަމުންދާ ކޯޓާ ނިޒާމާއި ސިޔާސަތުތަކާ ދެކޮޅަށް އެގައުމުގައި ކުރަމުންދާ މުޒާހަރާ ހޫނުވެ ބަންގްލަދޭޝުން ވަނީ ހައި ސެކިއުރިޓީ އެލާޓް ނެރެފައެވެ.

އެއާއެކު ދިވެހި ޚާރިޖީ ވުޒާރާއިން ނެރުނު ނޫސްބަޔާނެއްގައި ވަނީ، ބަންގްލަދޭޝް ސަރުކާރުން އިރުޝާދު ދެއްވާފައިވާ ގޮތަށް ބޭރަށް މިދަނޑިވަޅުގައި ނުކުމެ ނޫޅުމަށާއި ބަންގްލަދޭޝް ސަރުކާރާއި ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަންގެ އިރުޝާދާ އެއްގޮތަށް އަމަލުކުރުމަށް އިލްތިމާސް ކޮށްފައެވެ.

އަދި ބަންގްލަދޭޝްގައި ދިރިއުޅޭ ދިވެހި ކިޔަވާކުދިންނާއި ދިރިއުޅޭ ދިވެހިންގެ ސަލާމަތާއި ރައްކާތެރިކަން ކަށަވަރުކުރުމަށް ދިވެހި ސަރުކާރުން މަސައްކަތްކުރަމުން އަންނަ ކަމަށާ، މިކަމާ ގުޅިގެން އެއްވެސް އެހީތެރިކަމެއް ބޭނުންނަމަ، ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނާ ގުޅުމަށް އެދިފައިވެއެވެ.

ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނާ ގުޅޭނެ މައުލޫމާތު

ގުޅޭނެ ނަންބަރު

(+) 8801329748885 

(+) 8801708120318

-އީމެއިލް އެޑްރެސް

[email protected]

ބަންގްލަދޭޝްގެ މުޒާހަރާތައް އިތުރަށް ވަރުގަދަ ކުރަމުންދާތީ، އެ ކަމަށް ހުރަސް އެޅުމުގެ ގޮތުން މޮބައިލް އިންޓަނެޓާއި ފޯނު ލައިންތައް ވެސް ވަނީ ކަނޑާލައިފައެވެ.

އިއްޔެ ހަވީރު ވެސް އެތައް ހާސް މީހުންނެއް ވަނީ ދައުލަތުގެ ބްރޯޑްކާސްޓާ ބީޓީވީއަށް ވަދެ ފަރުނީޗަރާއި، ކުޑަދޮރުތަކާއި ލައިޓްތައް ތަޅާލައި އޭގެ ބައެއް ތަންތަނުގައި އަލިފާން ރޯކޮށްފައެވެ.

މި މުޒާހަރާގައި މިހާތަނަށް 19 މީހުން މަރުވެ، އެތައް ބަޔަކު ޒަޚަމްވެފައިވާއިރު، މުޒާހަރާ ހުއްޓުވުމަށް ބަންގްލަދޭޝްގެ ފުލުހުން ދަނީ ބާރުގެ ބޭނުންކޮށް, ރަބަރު ވަޒަނާއި ކަރުނަ ގޭސް ފަދަ ހަތިޔާރު ބޭނުންކުރަމުންނެވެ.