އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް) ގެ ދަރިވަރުން ތަޖުރިބާ ހޯދުމުގެ ދަތުރެއްގައި މެލޭޝިޔާގެ ތިން ޔުނިވާސިޓީއަކަށް ދިޔުމަށް ރޭ މެލޭޝިޔާއަށް ހިނގައްޖެއެވެ.

މި ދަތުރުގައި ބައިވެރިވަނީ އައިޔޫއެމްގެ ސްޓޫޑެންޓް ޔޫނިއަންގެ ދަރިވަރުންނާއި އެކި ކެމްޕަސްތަކުގެ ރެޕްރެޒެންޓޭޓިވުން ހިމެނޭހެން 10 ދަރިވަރުންނެވެ. 

އައިޔޫއެމްގެ ސްޓޫޑެންޓް ޔޫނިއަންގެ ފަރާތުން “ވޮއިސް” އަށް މައުލޫމާތު ދީފައިވާ ގޮތުގައި، މި ދަތުރުގެ މަޤްޞަދަކީ މެލޭޝިޔާގެ ޔުނިވަރސިޓީތަކުގެ ސްޓޫޑެންޓް ޔޫނިއަންތަކާ ބައްދަލުކޮށް، ތަޖުރިބާ ހޯދުމާއި އައިޔޫއެމްގެ ދަރިވަރުންގެ ތަޖުރިބާ ހިއްސާކުރުމެވެ.

އަދި މެލޭޝިޔާގެ ޔުނިވަރސިޓީތަކުގެ ސްޓޫޑެންޓް ޔޫނިއަންތަކާ ގުޅުން ބަދަހިކުރުމާއި، އެ ޔޫނިއަންތަކުން ހިންގާ ހަރަކާތްތަކާއި އެބޭފުޅުން ކަންކުރާ ގޮތުގެ މަޢުލޫމާތު ހޯދުމުގެ އިތުރުން މެލޭޝިޔާގެ ޔުނިވަރސިޓީތަކުގެ ކިޔެވުމުގެ ކަންކަން ކުރިއަށްދާ ގޮތުގެ މަޢުލޫމާތު ހޯދުމަކީވެސް މި ދަތުރުގެ މަޤްޞަދެއް ކަމަށް ބުނެފައިވެއެވެ.

އައިޔޫއެމްގެ ދަރިވަރުންނަށް މެލޭޝިޔާއިން މަރުހަބާ ކިޔުން: ފޮޓޯ/ އައިޔޫއެމް

6 ދުވަހުގެ މި ދަތުރުގައި މެލޭޝިޔާގެ 3 ޔުނިވަރސިޓީއަކަށް ޒިޔާރަތްކުރުމަށް ހަމަޖެހިފައިވާ ކަމަށް އައިޔޫއެމް ސްޓޫޑެންޓް ޔޫނިއަނުން ބުނެއެވެ.

އެއީ؛

1) ޔުނިވަރސިޓީ ކެބަންސާން މެލޭޝިޔާ،

2) އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިޔާ 

3) ޔުނިވަރސިޓީ އޮފް ސައިންސް އިސްލާމް މެލޭޝިޔާ

އައިޔޫއެމްއަކީ އެ ޔުނިވާސިޓީގެ ދަރިވަރުންނަށް މިފަދަ ފުރުޞަތުތައް އަބަދުވެސް ހޯދައިދޭ ޔުނިވާސިޓީއެއްކަން ފާހަގަކޮށްލަންޖެހެއެވެ. އެގޮތުން ދަރިވަރުންނާއި ބައިނަލްއަގުވާމީ އެކިއެކި ފަރާތްތަކާއި ގުޅުންތައް ގާއިމްކޮށްދީ، ބައިނަލްއަޤްވާމީ އެކި އެކަޑެމިކް އިވެންޓްތަކުގައި ބައިވެރިވުމުގެ ފުރުޞަތު އެ ޔުނިވާސިޓީން ހޯދައިދެމުންދެއެވެ.