ރާއްޖޭގެ ޓޫރިޒަމް ދާއިރާއިން ލިބޭ އާމްދަނީގެ އިންސައްތައެއް ކައުންސިލްތަކުގެ ބަޖެޓަށް ޖަމާކުރަން ނިންމެވި ނިންމެވުން ލަސްތަކެއް ނުވެ ތަންފީޒު ކުރަން ފަށާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ނާރެސް ޕޯޓަލް އާއި ކުރަނގި އެޕަރޭޝަންގެ ދެވަނަ ފިޔަވަހި އިފްތިތާޙުކުރުމަށް ރޭ ދަރުބާރުގޭގައި ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ރައީސް ޑރ.މުޙައްމަދު މުޢިއްޒު ވިދާޅުވީ، ރައްޔިތުންގެ ފަރާތުން ކައުންސިލްތަކުގައި އެދޭ ކަންކަން ކުރުމުގައި ކައުންސިލްތައް ބާރުވެރިކުރުމަކީ ސަރުކާރުގެ މުހިއްމު ސިޔާސަތަކަށްވާއިރު، ރައްޔިތުން ހޮވާފަ ތިބޭ ބަޔަކު ރައްޔިތުންނާއި އެންމެ ގާތުން މަސައްކަތްކުރުމުގެ ޒިންމާ އަދާކުރެވޭނީ ޚިދުމަތް ދިނުމަށް ބޭނުންވާ ބާރުވެރިކަން ސަރުކާރުން ދީގެންކަމަށެވެ.
މިހާރު އަމަލު ކުރަން ފަށާފައިވާ ގަވާއިދުގެ ތެރެއިން އެކިއެކި ފަޅު ރަށްތައް ހޯދައިގެން މެދު ރާސްތާގެ ޕްލޭނެއްގެ ތެރެއިން ކަނޑައެޅޭ މަސައްކަތެއް ކޮށްގެން އާމްދަނީ ހޯދުުމުގެ ފުރުސަތުވެސް ހުޅުވާލެވިފައިވާ ކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، އަދިވެސް ބައެއް ރަށްރަށުގެ ކައުންސިލްގެ އިހްތިޞާސް ތެރޭގައި ބައެއް ފަޅުތަކާއި ބައެއް ތަންތަން ހިމެނުމުގެ ފުރުސަތުވެސް ގާނޫނީ އިމުގެ ތެރެއިން ދެވެން އޮތް އެންމެ ފުޅާ މިނެއްގައި ދެމުންދާ ކަމަށެވެ.
"އަޅުގަނޑު އިޢުލާންކޮށްފައިވާ ގޮތަށް ޤާނޫނުތަކަށް ގެންނަންޖެހޭ ބަދަލާއި މިކަންކަން ކުރުމާއި އެކީގައި ރާއްޖެއަށް ޓޫރިޒަމްގެ ދާއިރާއިން މިލިބޭ އާމްދަނީގެ ވަކި އިންސައްތައެއް ކައުންސިލްތަކުގެ ބަޖެޓަށް ޖަމާވާގޮތައް އެނިންމި ނިންމުންވެސް އިރާދަކުރެއްވިއްޔާ މާލަސްތަކެއްނުވެ އަޅުގަނޑުމެން ތަންފީޒުކުރަން ފަށާނަން"
ރައީސް ޑރ.މުޢިއްޒު ވިދާޅުވިއެވެ.
މިފަދައިން ރައީސް ޑރ.މުޢިއްޒު ވިދާޅުވެފައިވާއިރު، މިދިޔަ މާޗު މަހު، ވ. ކެޔޮދޫ ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން ރައީސް ޑރ.މުޢިއްޒު ވަނީ ރަށްރަށުގައި ހިންގާ ގެސްޓްހައުސް ތަކާއި، އެނޫންވެސް އެކިއެކި ދާއިރާތަކުން، ދައުލަތަށް ނެގޭ ޓެކްސް ފައިސާގެ ވަކި އިންސައްތައެއް އެ ރަށެއްގެ ކައުންސިލަށް ދިނުމަށް ގާނޫނަށް އިސްލާހު ގެންނަވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
