މާލެ ސިޓީ ކައުންސިލާއި އިތުރު ތިން ރަށެއްގެ ކައުންސިލުން ހުސްވި ގޮނޑިތަކަށް މެމްބަރުން އިންތިހާބު ކުރުމަށް ބާއްވާ ބައި އިލެކްޝަންގައި މެންދުރު 1 އާއިހަމައަށް ވޯޓްލީ %14 މީހުން ކަމަށް އިލެކްޝަން ކޮމިޝަން (އީސީ) ގެ ތަފާސް ހިސާބުތަކުން ދައްކައިފިއެވެ.

މި އިންތިހާބުގައި، މާލެ ސިޓީ ކައުންސިލުގެ ހެންވޭރު ހުޅަނގު ދާއިރާ އާއި މައްޗަންގޮޅި މެދު ދާއިރާ އާއި ހުޅުމާލެ ދާއިރާ އަށް ކައުންސިލަރުން އިންތިހާބު ކުރުމަށް ހަމަޖެހިފައިވާއިރު، ކުޅުދުއްފުށި އުތުރު ދާއިރާ އަށް ވެސް ކައުންސިލް މެމްބަރަކު އިންތިހާބު ކުރުމަށް ވަނީ ހަމަޖެހިފައެވެ. ހަމައެއާއިއެކު،  ފ. ބިލެތްދޫ ކައުންސިލްގެ ރައީސާއި ރ. ރަސްމާދޫ ކައުންސިލްގެ އަންހެން މެންބަރު ހޮވުމަށް ވެސް ވަނީ ހަމަޖެހިފައެވެ.

ހަތަރު ބައި އިލެކްޝަންގައި ވޯޓުލުމުގެ ހައްގު 13،112 މީހުންނަށް ލިބެއެވެ. އޭގެ ތެރެއިން 6،703 މީހުންނަކީ ފިރިހެނުންނެވެ. އަދި 6،409 މީހުންނަކީ އަންހެނުންނެވެ.

މި ބައި އިލެކްޝަން ތަކުގެ ވޯޓްލުން މިއަދު ހެނދުނު 8 ޖެހިއިރު ފަށާފައިވާއިރު، މެންދުރު 1 ޖެހުމާއި ހަމައަށް ވޯޓްލާފައިވަނީ އޭގެ ތެރެއިން 14.44 އިންސައްތަ (1894 މީހުން) އެވެ. މި އިންތިހާބުގައި ވޯޓްލުމުގެ ހައްގު ލިބިފައިވާ މީހުންގެ ތެރެއިން %85.56 (11218 މީހުން) މިހާތަނަށް ވޯޓު ލާފައެއް ނުވެއެވެ. މި ބައި އިލެކްޝަންތަކުގެ ވޯޓްލުން ބަންދުވާނީ މިއަދު ހަވީރު 4 ޖަހާއިރުއެވެ.

މި އިންތިހާބުތަކުގައި ހދ.ކުޅުދުއްފުށި ސިޓީ ކައުންސިލާއި މާލެ ސިޓީ ކައުންސިލުން ހުސްވި ގޮނޑިތަކަށް ވާދަކުރައްވަނީ ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އާއި އިދިކޮޅު އެމްޑީޕީއަށް ނިސްބަތްވާ ކެނޑިޑޭޓުންނެވެ.

މި ގޮނޑިތައް ހުސްވީ، މީގެ ކުރިން އިންތިހާބުވެވަޑައިގެންނެވި ބޭފުޅުން ރައްޔިތުންގެ މަޖިލީހުގެ އިންތިހާބު ކާމިޔާބު ކުރައްވާ، މަޖިލީހުގެ ގޮނޑި ކަށަވަރު ކުރެއްވުމުންނެވެ. 

މިގޮތުން، މާލެ ސިޓީ ކައުންސިލުން ހުސްވި ހެންވޭރު ހުޅަނގު ދާއިރާގެ މެންބަރު އަހްމަދު އައިފާން އާއި މައްޗަންގޮޅި މެދު ދާއިރާގެ ކައުންސިލަރު ކަން ކުރެއްވި އަހްމަދު ޒަމީރު އެ ދެ ދާއިރާގެ މަޖިލިސް ގޮނޑި ކާމިޔާބު ކުރެއްވިއިރު، ހުޅުމާލެ ދާއިރާގެ ކައުންސިލަރަށް ހުންނެވި އިބްރާހިމް ޝުޖާއު ވަނީ ބާރަށު ދާއިރާގެ ގޮނޑި ކާމިޔާބު ކުރައްވާފައެވެ.

ހަމައެއާއިއެކު، ކުޅުދުއްފުށި އުތުރު ދާއިރާގެ ކައުންސިލަރަށް ހުންނެވި މުހައްމަދު ދާއޫދު ވެސް ވަނީ ރައްޔިތުންގެ މަޖިލީހުގެ ގޮނޑި ކަށަވަރު ކުރައްވާފައެވެ.