މިފްކޯގެ ހިންގުން ހަރުދަނާކުރުމުގެ ގޮތުން ޚަރަދުތައް ކުޑަކުރުމަށްޓަކައިއެކުންފުނީގެ ސިނީއަރ މެނޭޖްމަންޓުގެ މުސާރަތައް ކުޑަކުރުމަށް ނިންމައިފިއެވެ.

މިފްކޯގެ ބޯޑުން މި ބަދަލުތައް ގެންނަން ނިންމާފައިވާކަން އެ ކުންފުނީގެ ހުރިހާ މުވައްޒަފުންނަށް މެމޯއަކުން އަންގައިފައިވާއިރު، މި މެމޯގައި ބުނެފައިވަނީ މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާ އަދި މިފްކޯ ގުޅިގެން މިފްކޯގެ ހިންގުން ހަރުދަނާކުރުމަށް ކުރިއަށް ގެންދާ "މިފްކޯ އެފިޝިއަންސީ އެކްސައިޒް"ގެ ދަށުން މުވައްޒަފުންނާގުޅޭ ކަންކަން ކުރުމަށް ޖުލައި 17 ވަނަ ދުވަހު ބޭއްވި މިފްކޯގެ ޑިރެކްޓަރުންގެ ބޯޑުގެ ބައްދަލުވުމުގައި ނިންމާފައިވާ ކަމަށެވެ.  

މި މެމޯގައިވާ ގޮތުން، ކުންފުނީގެ ސީނިއަރ އަދި މިޑްލް މެނޭޖްމަންޓުގެ ވެރިންގެ އަސާސީ މުސާރައިން 20 އިންސައްތަ ކުޑަކުރުން ހިމެނޭއިރު، މީގެތެރޭގައި ސީ.އީ.އޯ އިން ފެށިގެން ސީނިއަރ މެނޭޖަރ ރޭންކުގައި ތިބި ފަރާތްތައް ހިމެނެއެވެ. އަދި މުވައްޒަފުންގެ މުސާރައިގެ އޮނިގަނޑުގައި ހުރި ފަރަގުތައް ކުޑަކުރުމުގެ ގޮތުން ހުރިހާ ޑިޕާޓްމަންޓްތަކެއްގެ މުސާރައިގެ އޮނިގަނޑު އެއް ހަމަކުރުމާއިއެކު މުވައްޒަފުންގެ ތެރެއިން މަސައްކަތުގެ ޕާފޯމަންސްއަށް ބަލާ ވަޒީފާއިން ވަކި ކުރަންޖެހޭ މުވައްޒަފުން އުސޫލުތަކާއި އެއްގޮތަށް ވަޒީފާއިން ވަކި ކުރުން ވެސް މި މެމޯގައި ހިމެނެއެވެ.

Advertisement

މީގެ އިތުރުންވެސް، ޕްރޮބޭޝަންގައި ތިބި މުވައްޒަފުންގެ ޕަރފޯމަންސަށް ބެލުމަށްފަހު ކޮންމެހެން ކުންފުންޏަށް ބޭނުންވާ މުވައްޒަފުން ފިޔަވާ އެހެން މުވައްޒަފުން ވަޒީފާއިން ވަކިކުރުމާއި،  މިހާރު ދެމުންދާ އެލަވަންސްތައް މުރާޖާކޮށް، ޑެޕިއުޓީ ހެޑް އެލަވަންސް އާއި، އިންޖީނިއަރިން އެލަވަންސާއި، ކޭން ޕްރޮޑަކްޝަން އެލަވަންސާއި، ރިސްކް އެލަވަންސާއި، ނޮން ޕްރެކްޓިސް އެލަވަންސް ދިނުން ހުއްޓާލައި، އިތުރު ގަޑީގައި މަސައްކަތްކުރަން ކޮންމެހެން ޖެހޭ ފަރާތްތައް ފިޔަވާ އިތުރުގަޑީގައި މަސައްކަތް ނުކުރުން ހިމެނެއެވެ.

މިކަމާއި ގުޅިގެން މިފްކޯއިން ބުނީ އެލަވަންސްތަކަކީ އޭގެ އެންމެ ޙައްޤުވެރި މުވައްޒަފުންނަށް ލިބެން ޖެހޭ އެއްޗެއްގެ ގޮތުގައި ދެކޭ ކަމަށާއި، މި ގެނެވޭ ބަދަލުތަކާއެކު އެކަން ހާސިލްކުރެވިގެންދާނެކަމަށެވެ.