އިއްޔެ ބޭއްވުނު ކައުންސިލްތަކުގެ ބައި-އިލެކްޝަންތަކުގެ ނަތީޖާއާމެދު މާޔޫސްވާންވީ ސަބަބެއް ނެތްކަމަށް ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަން ފައްޔާޟް އިސްމާޢީލް ވިދާޅުވެއްޖެއެވެ.އިއްޔެ ބޭއްވުނު ބައި-އިލެކްޝަންތަކުގައި މާލޭ ސިޓީ ކައުންސިލުގެ ތިން ގޮނޑިއަކާއި، ފ. ބިލެތްދޫ ކައުންސިލްގެ ރައީސްކަމާއި، ކުޅުދުއްފުށި ސިޓީ ކައުންސިލްގެ އުތުރު ދާއިރާގެ ކައުންސިލް މެންބަރުކަމާއި އަދި ރ. ރަސްމާދޫ ކައުންސިލްގެ އަންހެން މެންބަރުކަމަށް މެންބަރުން އިންތިޚާބުކުރުމަށް ވޯޓުލުން ބޭއްވުނެވެ.

މި އިންތިޚާބުތަކުގައި ރަސްމާދޫ ކައުންސިލްގެ އަންހެން މެންބަރުކަން ފިޔަވައި އެހެން ހުރިހާ ގޮނޑިއެއް ކާމިޔާބުކޮށްފައިވަނީ ވެރިކަންކުރާ ޕާޓީ، ޕްރޮގްރެސިވް ނެޝަނަލް ކޮންގްރެސް (ޕީއެންސީ) އިންނެވެ.

މި އިންތިޚާބުތަކުގެ ނަތީޖާއާ ގުޅިގެން އެމްޑީޕީއަށް ގިނަ ބައެއްގެ ފާޑުކިޔުންތައް އަމާޒުވެފައިވަނިކޮށް، އެކްސްގައި ކުރެއްވި ޕޯސްޓެއްގައި ފައްޔާޟް ވިދާޅުވެފައިވަނީ، މި ބައި-އިލެކްޝަންތަކުގައި ވާދަކުރި އެމްޑީޕީގެ ކެންޑިޑޭޓުން ކުރެއްވި ހިތްވަރާއި މަސައްކަތަށް ވަރަށް ބޮޑަށް ޝުކުރު ދަންނަވާކަމަށެވެ. އަދި މަދު އަދަދެއްގެ ބަޔަކު ވޯޓުލީ އިންތިޚާބުގެ ނަތީޖާ ނުކުތް ގޮތަކާމެދު މާޔޫސްވާންވީ ސަބަބެއް ނެތްކަމަށްވެސް ވިދާޅުވިއެވެ.

"ޕާޓީގެ ހިންގުން ހަރުދަނާކުރުމަށް މިހާރު މިކުރެވޭ މަސައްކަތްތަކުގެ ތެރެއިން އިރާދަކުރެއްވިއްޔާ މި ޕާޓީއަށް ކުރިއަށް އޮތީ ކާމިޔާބު ދުވަސްތަކެއް،" ފައްޔާޟް ވިދާޅުވިއެވެ.

އިއްޔެގެ ބައި-އިލެކްޝަންތަކުގައި ވޯޓު ދިނުމުގެ ހައްގު އޮތް 13،000އެއްހާ މީހުންގެ ތެރެއިން ވޯޓުލާން ނުކުތީ 3،260 މީހުންނެވެ. 

* މައްޗަންގޮޅި މެދު ދާއިރާ ކައުންސިލަރު: ފާތިމަތު އިޝާން/ ޕީއެންސީ - ވޯޓުލާން ނުކުތީ 22.23 އިންސައްތަ މީހުން

* ހުޅުމާލެ ދާއިރާ ކައުންސިލަރު: އަލީ އައިމަން/ ޕީއެންސީ - ވޯޓުލާން ނުކުތީ 13.80 އިންސައްތަ މީހުން

* ހެންވޭރު ހުޅަނގު ދާއިރާ ކައުންސިލަރު: ފާތިމަތު ޝައުފާ ސަލީމް/ޕީއެންސީ - ވޯޓުލާން ނުކުތީ 12.87 އިންސައްތަ

* ބިލެއްދޫ ކައުންސިލްގެ ރައީސް: އަރީހް އިސްމާއީލް/ ޕީއެންސީ - ވޯޓުލާން ނުކުތީ 83.18 އިންސައްތަ މީހުން

* ކުޅުދުއްފުށި އުތުރު ކައުންސިލަރު: އިބްރާހީމް އަހުމަދު/ ޕީއެންސީ - ވޯޓުލާން ނުކުތީ 61.25 އިންސައްތަ މީހުން

* ރަސްމާދޫ ކައުންސިލްގެ އަންހެން މެންބަރު: އައިޝަތު ޝަރަފިއްޔާ/ އަމިއްލަ - ވޯޓުލާން ނުކުތީ 73.62 އިންސައްތަ މީހުން