ބަންގަލަދޭޝްގައި ސަރުކާރު ވަޒީފާތަކަށް މީހުން އައްޔަނުކުރުމުގައި އަމަލު ކުރަމުންދާ ކޯޓާ ނިޒާމާއި ދެކޮޅަށް އެގައުމުގެ ދަރިވަރުން އިސްވެ ކުރަމުންދާ މުޒާހަރާތައް ހުއްޓުވުމަށް އެގައުމުގެ އޮފީސްތައް ބަންދުކޮށް ކާފިއު އިއުލާންކޮށްފިއެވެ.

މި މުޒާހަރާތަކުގައި މިހާތަނަށް 114 މީހަކު މަރުވެފައިވާއިރު، އެގައުމުގެ ބޮޑުވަޒީރު،ޝެއިޚް ހަސީނާގެ ސަރުކާރުން ވަނީ އާދިއްތަ ދުވަހާއި ހޯމަ ދުވަހަކީ ސަރުކާރު ބަންދު ދުވަހެއް ކަމުގައި ކަނޑައަޅައި، އެ ދެދުވަހު ހަމައެއަކަނި އެމަޖެންސީ ސާވިސްތަކަށް ހަރަކާތްތެރިވުމުގެ ހުއްދަ ދީފައެވެ.

މި މުޒާހަރާތަކާއި ގުޅިގެން މިދިޔަ ހަފްތާގެ ބުދަ ދުވަހުން ފެށިގެން އެގައުމުގެ ޔުނިވަރސިޓީތަކާއި ކޮލެޖްތައް ވެސް ވަނީ ބަންދުކޮށްފައެވެ.

ބަންގްލަދޭޝްގައި މި މުޒާހަރާތައް ފެށިގެން އައީ، ބަންގްލަދޭޝްގެ މިނިވަން ކަމަށް ކުރި ހަނގުރާމައިގެ ބައިވެރިންގެ ޢާއިލާތަކަށް ސަރުކާރު ވަޒީފާތަކުގެ 30 އިންސައްތަ ޚާއްޞަ ކުރުމަށް އެ ޤައުމުގެ ހައި ކޯޓުން ހުކުމް ކުރުމާ ގުޅިގެންނެވެ.

އެގައުމުގެ ހައި ކޯޓުގެ މި ނިންމުމާއިއެކު، ވަކި ބަޔަކަށް ހާއްސަކޮށްފައިވާ  ވަޒީފާތަކުގެ ނިސްބަތް 50 އިންސައްތައަށް ވުރެ އިތުރުވިއިރު، ފަހުން ކޯޓުން ވަނީ ނިންމުން ބާތިލްވެސް ކޮށްފައެވެ. އެހެންނަމަވެސް، އޭގެ ފަހުންވެސް މުޒާހަރާތަކަށް ނިމުމެއް އައިސްފައެއް ނުވެއެވެ.

މުޒާހަރާ ހުއްޓުވުމުގެ ގޮތުން އެގައުމުގެ ސަރުކާރުން ވަނީ މިދިޔަ ހަފްތާގެ ބުރާސްފަތި ދުވަހުން ފެށިގެން މޮބައިލް އިންޓަރނެޓުގެ ޚިދުމަތް ހުއްޓާލައި، އެގައުމުގެ މީޑިއާތަކުގެ ވެބްސައިޓްތަކާއި ސޯޝަލް މީޑިއާވެސް އަޕްޑޭޓް ކުރުން ހުއްޓާލާފައެވެ.

މި މުޒާހަރާތަކުގެ ތެރެއިން އެގައުމުގެ ސަރުކާރުގެ އިމާރާތްތަކާއި ދައުލަތުގެ މީޑިއާތަކާއި ފިހާރަކާއި އެނޫންވެސް ތަންތަނުގައި ހުޅުރޯކުރުމާއު، ގާފަދަ ތަކެތި އުކައި، ބޮޑެތި ގެއްލުންތަކެއް ވަނީ ދީފައެވެ. މުޒާހަރާ ރޫޅާލުމުގެ ތެރޭގައި އެގައުމުގެ ފުލުހުން ކަރުނަ ގޭހާއި، ރަބަރު ބުލެޓް އަދި ސައުންޑް ގްރެނޭޑްސް ބޭނުންކުރުމުގެ ސަބަބުން އެތައް ބަޔަކު ޒަހަމްވެފައިވާކަން ފާހަގަކޮށްލަން ޖެހެއެވެ.