މުސްތަގުބަލުގެ އިމާމުން އުފެއްދުމަށް “ފިޔުޗަރ އިމާމް 1446” ނަމުގައި އދ. ދަނގެތީގައި ޚާއްސަ މުބާރާތެއް ފަށަން ތައްޔާރު ވެއްޖެއެވެ. 

އދ ދަނގެތީ ޖަމިއްޔަތުލް ޤަލަމުން އިސް ނަގައިގެން ކުރިއަށް ގެންދާ މި މުބާރާތަކީ އެ ރަށު ސުކޫލުގެ ގުރޭޑް 6 އިން މަތީގެ ފިރިހެން ދަރިވަރުންނަށް އަމާޒުކޮށް ކުރިއަށް ގެންދެވޭ މުބާރާތެއް ކަމަށް އެ ޖަމިއްޔާއިން ބުނެއެވެ. 

އެގޮތުން، އިމާމްކަން ކުރުމަށް ބޭނުންވާ މުހިއްމު މަޢުލޫމާތާއި ހުނަރުތައް ދަރިވަރުންނަށް މިމުބާރާތުގައި ޒަރީޢާއިން ދަސްވެގެންދާނެ ކަމަށްވެސް ބުނެފައިވެއެވެ. 

މިފަދަ މުބާރާތެއް ބޭއްވުމުގެ މަގުސަދަކީ، ކުދިންގެ ހިތްތަކުގެ އިމާމްކަން ކުރުމަށް ލޯބިޖައްސުވައި، އެންމެ ތުއްތުއިރުން ފެށިގެން އިމާމްކަން ކުރުމުގެ ރޫޙް އަށަގަންނުވައި އެކަމަށް އަހުލުވެރި ހުނަރުވެރި ޤާބިލް ކުދިންތަކެއް އުފެއްދުމުގެ އިތުރުން، ދަރިވަރުންގެ ހިތްތަކުގައި މިއަޅުކަމާއިމެދު އޮންނަ ލޯބި އިތުރުކޮށް، ހިތްޖެއްސުން ކަމަށް ޖަމިއްޔަތުލް ޤަލަމުން ބުނެއެވެ. 

ހ. ބަންގި

ށ. ޚުޠުބާ

ނ. ޤަމަތް

ރ. ނަމާދު

މި މުބާރާތް ފެށުމުގެ މަސްދުވަސް ކުރިން މުބާރާތުގައި ބައިވެރިވާ ދަރިވަރުންނަށް ނަމާދާއި، ބަންގިއާއި، ޤަމަތް އަދި ޚުތުބާ ކިޔުމަށް ބޭނުންވާ ޢިލްމީ މާއްދާ ކިޔަވާދެވި ބޭނުންވާ ތަފާތު ހުނަރުތައް މުދައްރިބުން މެދުވެރިކޮށް އުނގަންނައިދެވޭއިރު، ނިމިދިޔަ ހުކުރު ދުވަހު 22 ދަރިވަރުންނާއެކު ތަމްރީންތައް ވަނީ ފަށާފައެވެ. 

އެގޮތުން، ދީނީ ޢިލްމުވެރިޔާ އައްޝައިޚް އާޒިމް ޚާލިދު ވަނީ އެ ދަރިވަރުންނަށް ޚާއްސަ ޓްރެއިން ދެ ސެޝަން ކުރިއަށް ގެންގޮސްފައެވެ. 

މީގެ އިތުރުންވެސް، ހަފްތާ ތެރޭގައިވެސް، ދަނގެތީގައި ތިބި، މި ޢިލްމުގެ ތަޖުރިބާކާރުން، އެ ދަރިވަރުން ތަމްރީން ކުރާއިރު، ހަފްތާ ބަންދުގައި މާލެއިންނާއި، ރަށުން ބޭރުން ކަމުގެ އިލްމު ހުރި ތަޖުރިބާ ކާރުން ގެނެސް ދަރިވަރުން ތަމްރީން ކުރެވޭނެ ކަމަށް އެ ޖަމިއްޔާއިން ބުނެއެވެ. 

ޖަމިއްޔަތުލް ޤަލަމުން އިތުރަށް ބުނީ، މި ތަމްރީން ތަކަށްފަހު، މުބާރާތް ފެށުމުގެ ކުރިން، މުބާރާތުގައި ބައިވެރިވި ކުދިންގެ މެދުގައި އޮޑިޝަންއެއް ބޭއްވޭނެ ކަމަށާ މި އޮޑިޝަންގައި މުބާރާތުގައި ވާދަކުރުމަށް ދިހަ ކުދިން ނެގިގެންދާނެ ކަމަށެވެ. އަދި އެ އޮޑިޝަން އޮންނާނީ މުބާރާތް ފެށުމުގެ ހަފްތާ ކުރިން ކަމަށެވެ. 

އެއަށްފަހު، އަންނަ މަހުގެ މެދު ތެރޭގައި މި މުބާރާތް ފަށާއިރު، މު މުބާރާތް ކުރިޔަށްގެންދާނީ ދެ ރެޔަކަށް ބަހާލައިގެން ކަމަށާ ފުރަތަމަ ރޭގައި އޮންނާނީ ބަންގިއާއި ޤަމަތްދިން، އަދި ދެވަނަ ރޭގައި އޮންނާނީ ޚުތުބާ ކިޔުން ކަމަށް ބުނެފައުވެއެވެ. މިދެރޭ ކުރިއަށް ގެންދާނީ ފަނޑިޔާރުންނާއި ބެލުންތެރިންގެ ހާޒިރުގައި ކަށާ، މުބާރާތަށް އިންސާފު ކުރައްވާނީ ކަމުގެ ތަޖުރިބާ ހުރި ތިން ފަނޑިޔާރުންގެ ޕެނަލަކުން ކަމަށް އެ ޖަމިއްޔާއިން ބުނެފައިވެއެވެ. 

1) 1 ވަނަ އަށް 2،500 ރުފިޔާ

2) 2 ވަނަ އަށް 1،500 ރުފިޔާ

3) 3 ވަނައަށް 1000 ރުފިޔާ 

މުބާރާތުގެ ވަނަވަނަ އަށް އަންނަ ފަރާތްތަކަށް އިނާމް ހުށަހެޅުމަށާއި، އަދި މުބާރާތް ކުރިއަށް ގެންދިޔުމުގައި މާލީގޮތުންނާއި އެނޫންވެސް ގޮތްގޮތުން އެހީތެރިކަން ފޯރުކޮށްދޭން ބޭނުންވާ ފަރާތްތަކަށް އެހީވުމުގެ ފުރުސަތު ހުޅުވާލެވުފައިވާ ކަމަށް ޖަމިއްޔަތުލް ޤަލަމުން ބުނެއެވެ. 

އެހީވާން ބޭނުންވާ ފަރާތްތަކުން އަންނަނިވި އެކައުންޓަށް ފައިސާ ޖަމާކުރުމަށް އެދިފައިވެއެވެ.